Semaliu
Tugofai
Shoabuto
Me Laiule Siilo
translated
by Tino Uolai
illustrated by Starla Stone
Semaliu shoabuto tugofai iwe ye peopeo fetale
lani mele we imwale nge ye lago weri wolofaiu siinisi. "Metta
i bele foori ngali mele kaale? I bele lago maarkete nge i sa
lago chuwaaiiye seewe siilo," tugofai we yale seoriu.
Ye lago tefaali me maarkete nge ye lago togo
togo reeli seewe gateoteo nge siilo we ye tamweshali teo tage
woalo.
Ye lago shuungi seewe gelaagu. Ye sa gaaingeli
be, "Gelaagu! Gelaagu! Giuwe siilo yeele be ye tamweshali
teo tage woali gateoteo yeele nge iye ye bele bongiitiyei."
Gelaagu we ye tamweshali.
Ye lago shuungi sefoasho ira. Ye sa gaaingeli
be, "Ira! Ira! Wauti gelaagu yeele be ye tamweshali giuwe
siilo la ye tamweshali teo tage woali gateoteo laale nge iye
ye bele bongiitiyei." Ira we ye tamweshali.
Ye lago shuungi seewe yaafi. Ye sa gaaingeli
be, "Yaafi! Yaafi! Fisigi ira yeele be ye tamweshali wauti
gelaagu la ye tamweshali giuwe siilo la ye tamweshali teo tage
woali gateoteo laale nge iye ye bele bongiitiyei." Yafi
we ye tamweshali.
Ye lago shuungi seewe shaaliu. Ye sa gaaingeli
be, "Shaaliu! Shaaliu! Guluuwe yafi yeele be ye tamweshali
fisigi ira la ye tamweshali wauti gelaagu la ye tamweshali giuwe
siilo la ye tamweshali teo tage woali gateoteo laale nge iye
ye bele bongiitiyei." Shaliu we ye tamweshali.
Ye lago shuungi seewe karebau. Ye sa gaaingeli
be, "Karebau! Karebau! Iuliumi shaliu yeele be ye tamweshali
guluuwe yafi la ye tamweshali fisigi ira la ye tamweshali wauti
gelaagu la ye tamweshali giuwe siilo la ye tamweshali teo tage
woali gateoteo laale nge iye ye bele bongiitiyei." Karebau
we ye tamweshali.
Ye lago shuungi semaliu shoali niili maaliu.
Ye sa gaaingeli be, "Shoali niili maliu mwuulo! Shoali
niili maliu mwuulo! Liiye karebau yeele be ye tamweshali iuliumi
shaliu la ye tamweshali guluuwe yafi la ye tamweshali fisigi
ira la ye tamweshali wauti gelaagu la ye tamweshali giuwe siilo
la ye tamweshali teo tage woali gateoteo laale nge iye ye bele
bongiitiyei." Shaoli niili maliu we ye tamweshali.
Ye lago shuungi seewe taali. Ye sa gaaingeli
be, "Taali! Taali! Geogeowe shoali niili maliu yeele be
ye tamweshali liiye karebau la ye tamweshali iuliumi shaliu
la ye tamweshali guluuwe yafi la ye tamweshali fisigi ira la
ye tamweshali wauti gelaagu la ye tamweshali giuwe siilo la
ye tamweshali teo tage woali gatoeteo laale nge iye ye bele
bongiitiyei." Tali we ye tamweshali.
Ye lago shuungi semaliu geeshi. Ye sa gaaingeli
be, "Geeshi! Geeshi! Ngarisi tali yeele be ye tamweshali
geogeowe shoali niili maliu la ye tamweshali liiye karebau la
ye tamweshali iuliumi shaliu la ye tamweshali guluuwe yafi la
ye tamweshali fisigi ira la ye tamweshali wauti gelaagu la ye
tamweshali giuwe siilo la ye tamweshali teo tage woali gateoteo
laale nge iye ye bele bongiitiyei." Geeshi ye tamweshali.
Ye lago shuungi seewe gaattu. Ye sa gaaingeli
be, "Gaattu! Gaattu! Gangi geshi yeele be ye tamweshali
ngarisi tali la ye tamweshali geogeowe shoali niili maliu la
ye tamweshali liiye karebau la ye tamweshali iuliumi shaliu
la ye tamweshali guluuwe yafi la ye tamweshali fisigi ira la
ye tamweshali wauti gelaagu la ye tamweshali giuwe siilo la
ye tamweshali teo tage woali gateoteo laale nge iye ye bele
bongiitiyei." Gaattu we ye sa gaaingeli shaobuto we be,
"Gare go lago gasi togo seewe tegagiuliu miiniki me reeli
karebau laale be iuliumei nge ila nge i be gangi geeshi."
Iwe shagiu nge tugofai we ye sa lago reeli karebau.
|
|
Iwe nge karebau
we ye sa gaaingeli tugofai we be, "Gare go lago
reeli teoiyeli hay laale nge go sa lago gasi
togo semweoiu be gelai nge ila nge i be ganoogo miiniki."
Iwe shagiu nge tugofai we ye lago gake togo hay
reeli karebau we.
Kare bau we ye gangini
lago shagiu hay kawe nge ye sa ganeeye tugofai
we miiniki. Tugofai we ye sa gasi lago reeli gaattu
we.
|
|
|
|
|
|
|
|
Gaattu we ye iuliumi lago shagiu miiniki
we nge ye sa shageeye geshi we be ye bele gangi. Geshi we ye
sa shapi yale ngarisi tali we. Tali we ye sa shapi yale geogeowe
shoali niili maliu we. Shoali niili maliu we ye sa shapi yale
liiye karebau we. Karebau we ye sa shapi yale iuliumi shaliu
we. Shaliu we ye sa shapi yale guluuwe yafi we. Yafi we ye sa
shapi yale fisigi ira we. Ira we ye sa shapi yale wauti gelaagu
we. Gelaagu we ye sa shapi yale giuwe siilo we. Siilo we ye
gasi sheogiu niutiu tage woali gateoteo we yale lago me peige
we sepeigi iwe shaobuto tugofai we ye sa togo lago reeli mele
we imwale lani bongile we.