Semaliu
Mwaale
Me Riuwemaliu
Shoabut Fitiyale
translated
by Joseph Yarsfaisaf
illustrated by Joy Goodenow
Semaliu
Mwaale Me Riuwemaliu Shoabut Fitiyale
Semaliu mwaale iwe ye fitiyeli riuwemaliu
shoabuto. Mena mwali fitiyale ila ye tugofaiy tangi mwaale we,
ye sa lifeoiumware. Iwe nge ila semaliu ila ye shiuweli sari
nge ye ilegili kemwatiyetiy gemase.
Iire shoabut kela riuwemaliu ila re ilegili
gachiu fengani, ye gale seew shagiu faurumile mele re tai tipe
seew iyang. Shoabut we ye shiuweli sari ye liuwaneeye be mele
we fitiyeere ye be mate sari nge ye tarimwaale gachiu lago shagiu
le ye be tappile shagiu iiye. Iwe nge iwe ye tugofaiy ye bale
liuniuwaneey be mele we fitiyeere ye be mate tugofaiy le ye
pwale tapile iiye.
Iiye mwaale we ila ye teit la tugofaiy gemase
nge ye tai bale tarimwaale gemase. Mele shagiu ye nage yale
mwaale iyang ila mele kela yani shimwele. Ye shiuweli umwulape
nge gale ila ye sa mwousu.
Semaliu iire shoabut kawe nge ye liuwaneey
mele ye be fori ngali mwaale we fitiyeere le ye be gachiu iyange.
Iligili rane iga mwaale we ye be gemmasiuriu lago me mwirili
yale mwongo, shoabuto tugofaiy we ye bele buutogo wiwini lago
yani shimwe kawe ye teit mwousu.
"Yee, ye be ifa mwo iga ye be nage lago be
go sa mwaale iga ye toaro lago yani shimwe ka ye chochoalo."
Yaale gale mwaliyeliy sheoiu lago shagiu shoabuto we.
Ye be mano shoabuto we le ye be lago nge
ye buutogo iwe ye sari. Ye buutogo shagiu iiye nge ye buutogo
wiwi mwousu.
"Yee, ye be ifa mwo iga ye be toaro lago
mele ka mwousumwu, go bele weey shagiu semaliu tarimwaale kemwatiyetiy
kawe." Yaale bale mwaliyeliy lago shagiu iiye.
Ye sa iwe shagiu yee rane we serane nge mwaale
we ye lago mmate lago me masiuriu nge ye sa meyafi be ye sa
yangiileoiule woali mele we shimwele. Ye lago gettape tage ila
mele we ye taai yoro lago yani shimwele be mele kawe weli fitiyale
re sa wini lago ilegile.