PDF version (243k)

Giishe Me Woosho

Picture

translated by Augustin Uolai
illustrated by Joy Goodenow

Baabiyoro yeele ila faale ngaligishe. Ye kapeta semweiu mele ka giishe yaremate si gale foori ngali wosho ka yaashe. Ye farigiti farigiti pilaali woosho yaale logo, be ila mele ye melawe iige iyange. Ila lani baabiyoro yeele igela ila si bele giula semweiu me reeli mele kela giishe yaremate si gale foori ngali woosho le ye gale mase iyange. Fiyango yeele ila kofaare semweiu reeshugu yare gale gatewasiiye yaare wosho.

Picture

Semaliu tarimwaale me mena temale re gale fita lago shagiu. Ilegili rane le re be la fita le re be tefaali nge ye gale sseogiu sheogiu yare fa. Matemetali igeli weliwosho nge re gale gola.

Ye taai shiuwe tipeere me reeli fita we yaare. Yatola nge gaasefaliuwe yaale fegire iige. Re be buuweiu letteti nge iige ye gale buutogo ili fetale shagiu yarooro. Geraamwo re iliili fetale nge ige kawe re tai gale lawe.

Picture

Iwe nge ila shagiu ila iiye tarimwaale we me mele we temale ila re sa gale masheragi sheogiu reeli iiye fita we yaare. Re gale gake clorox re sa gale lago gasessere lago letteti. Ye tewai gale ssiuyelai nge re sa mase iige. Iwe nge re buutogo gaapiyepi. Re be gasini sheogiu ikawe re tipeli nge re ligitini lago ikawe semweiu.

Picture

Lago seewe raagi, lago seewe raagi le ila shagiu mele re sa foffoori. Re sa masheragi gemase be iwe ye tai gale rete clorox me lani stoowa. Ye sa gachiu sheogiu tipeere reeli mele we. Re giula masheragiire iyange.

Ye la fitouwe lago raagi me weli mwirile nge ye sa chichiile togo golaayaare iige. Ye sa sige iiye mele we temali tarimwaale we. Ye sa seoriu be, "Metta mele ye sa foori le ye sa gale gaffite-maliu sheogiu mele si gale gola? Metta igawe nge ye gale toulape gemase?"

Ye mile semaliu mwaale le ye la tabeeye seewe tteiuye seebiuleiu le ye mwaashiu tefaali togo. Ye la seewe fegaafile nge ye sa lago reeli iiye tarimwaale we me mele we temale. Ye sa gaaingeliire be iiye ila ye mwaashiu tefaali me reeli seewe tteiuye le kofali iige me woosho.

Ye sa gaaingeliire be woosho ila ye melawe. Ye gale tetteo lago. Iwe nge clorox ila ye gale liiye maliu kela ye paashigishigi le ila me le kela ye gekemalewa woosho. Ye be mase woosho nge si tei gale giula be ye tai gale ppesi tage le tappili iige iga ye be mase nge ye sa gale ppesi tage.

Picture

Mwaale we ye sa bale gaaingeliire be yooro ige kela ye gale mongo shagiu wosho kela ye melawe. Ila gare ye be mase woosho nge ila nge re bele bale mase ige kaale be ye tewaai yoro mele re be shiuweli gangi.

Picture

Iwe nge ye sa bale gassiyaare gare ye shiuweli yoro ige farigikiti le re shiuweli weri me yaroli wosho kawe. Biuleiu kawe re gale googo clorox iyange. Tarimwaale we me mele we temale re sa seoriu be ye taai yoro ige farigikiti ka re shiuweli weri. Mwaale we ye sa gaaingeliire be, "Faali mene ye taai yoro iyange ila ye taai yoro mele re be shiuweli gangi. Be ige kawe re paashigishigi mele re gekangi nge ye taai yoro. Iwe ye taai yoro ige kawe ye paashigishigi be ye sa mase wosho kawe re gale gangini."

Picture

Picture

Picture

Ye taai mmwaliyeliye mele we temali tarimwaale we. Ye saro ssiuyelai lago nge ye sa seoriu be, "I tei la liuniuwaneeye lago mwo lepali mele i sa foori ngali iige me woosho igela. Metta iwe, ye sa raagi me raagi yaamami liniiye lago shagiu woosho. Ifa ssengali iga ila shagiu mele malewashe nge si ya buutogo liniiye lago shagiu. Giishe shagiu yaashe gekefageogishe.

Mwaale we ye sa gaaingeliire be ye taai yoro pilaali ragi kawe be ye sa mano. Ika ye mwaashiu bupwuutogo mele re be liuwaneeye. Mwaale we ye ligitiire nge iire re sa liuniuwaneeye mele kawe re gekapeta.

Yatola shagiu nge ye taai yoro serane le re shiuweli gale fita reeli clorox. Iwe nge gare semaliu me liuweniure mele kawe laiuliu mwaale we ye be la fita le ye be googo clorox nge mwaale we ye sa gale fitegi ngali.

Ila gare si be ppaiu lago me yashe googo clorox reeli fita ila nge ye be toulape shagiu iige nge ye be gachiu sheogiu wosho ka yaashe. Go be mile geele semaliu nge go sa liuniuwaneeye gare ifa mele ye be gachiu le si be foori. Si be gale googo clorox gare si tewai gale googo reeli fita. Gaami metta yaami liuniuwane iyange?

Picture