Garigi
Me Fela
Re Ligekirimwe
written
by Augustin Uolai
illustrated cy Eric Woo
Serane nge gaale we fela ye la piipi lago
nge ye la weri semaliu garigi le ye gekerage lago getaali piye.
Ye sa lago iiye fela we ye sa lago mmmwaliyeliye ngali garigi
we. Ye sa gaaingeli be ye tai ttiri. Ye sa gaaingeli be ye be
piipiiye iiye. Iwe shagiu nge ye sa lago fela we le gaasefaliuwe
mele we fetane.
Garigi we ye sa piipiiye. Ye la tefaali fela
we nge garigi we ye sa gaaingeli be, "Ye nete be go ttiri
nge gaangiu i tei ttiri. Iwe nge i gatiwegiliiye le gare si
ligekirimwe nge i be gewaagilugo. Fela we ye sa seoriu be, "Ye
te mwashogo yewamwu. Ye be ifa ssengale nge go sa gewaagiliyei
le i be ili nge i weeye shagiu werewere nge geele imwu go be
gerage nge go weeye shagiu semaliu togofai kawe ye bele mase."
Iwe nge garigi we ye sa seoriu be , "Ila
nge laiu nge si ya ligekirimwe. Si be shapi me reeli porou ye
si logo iyange nge si ya lago reeli liu la ye garepe tiwe mwashengatteti.
Geele go be iii letteti nge gaangiu i sa gerage weli ppiye."
Iiye fela we ye sa biitiwe feffase fetale
nge ye sa seoriu be, "Go chiile gemase. Ye be ifa ssengale
nge i sa giula biuleiu ye go sa gola?" Garigi we ye sa
seoriu be, "Ye masheragi gemaase. Go be gale iliili lago
nge go sa gale feffaseongiuwei nge gaangiu ila i be gale mmwaliyeliye."
Iwe ye lago iiye fela we le ye sa feffase lago shagiu.
Iwe nge garigi we iwe ye chiile nge ye gachiu
shimwele. Mele we ye bongi lago shagiu nge gaale we garigi ye
sa tegari yelaili ppiye we le ye sa gekepate ngaliire garigi
kawe re logo woali ppiye we. Ye sa seoriu be, "Gai be tepangiyei
be si be piipiiye fela ye ye gaboso gemase."
Ye sa gaaingeliire garigi kawe be re be ragi
sheogiu me reeli porou we re sa lago reeli liu we ye garepe
tiwe mwashengatteti. Ye sa bale seoriu be, "Laiu le fela
ye be mmwaliyeliye le ye be gassiye be gare i sa togo iiya nge
semaliu gaami ye sa mmwaliyeliye. Ila nge ye be seoriu sheogiu
be gaangiu mele i shiuweli gommwe."
Iire garigi kawe iwe re tipeli mele we yaale
liniwane garigi we. Re sa seoriu be re be foori. Ye la nisoro
tage shagiu nge re sa shu fengani garigi we me fela we me reeli
porou we ye be shapi yaare ligekirimwe me iyange. Re sa shapi
me biuleiu we nge re sa lago. Ye sa lago fela we le ye weeye
shagiu ngeoniu piipi. Iwe nge garigi we iwe ye tai rigi be iiye
iwe ye matto lago shagiu biuleiu we laniyale. Ye sa seoriu be,
"Igela mele i bele ffesaagilugo geele fela." Ye tai
ssiuyelai nge ye sa mmwaliyeliye tage me letteti gaale we fela
nge ye sa seoriu be, "Garigi, garigi, ifa geele?"
Iwe nge semaliu garigi kawe re logo weli ppiye ye sa seoriu
be, "Gaangiu iye i logo shagiu me imwowamwu."
Mele we nge fela ye sa gareta ngale seokiute
mele we fetane. Ye sa garepe shagiu le ye bele yali lago me
woali taati. Ye sa lago seokiute nge ye sa bale faseongiu garigi
we. "Garigi, garigi, ifa geele?" Iwe nge semaliu garigi
kawe ye sa bale seoriu be iiye ila ye shiuweli logo shagiu me
imwowale. Iwe nge fela we ye gareta ngali seokiute mele we fetane.
Ye sa iwe shagiu ssengale. Ye feffaso fela we nge semaliu garigi
kawe ye mmwaliyeliye.
Ye sa kaile kaile yale sige fela we. Ye sa
kashige gemase reeli mele we ye sa gekareta ngali fetane. Ye
la gola lago liu we nge ye bele la piipi lago ila mele we semaliu
garigi iwe ye sa ssiuyelai sheogiu yaale logo faale nge ye sa
seoriu be, "Go mwaashiu togo togo go fela?"
Ye sa memmeni sheogiu ye bele tangi geele
fela reeli yaale sige. Ye sa niutu tage me letteti yale la ffato
lago mele we yewale reeli shapili liu we. Ye sa lago chechengagi
lago reeli shapili iiye liu we. Ye sa biitage tapiungiu fetale
yee ye la biuniu lago sepeigi mele we yewale nge ye la ppiungiu
tiwe. Iwe . shagiu nge ye ili weiu ketabo waiu le seokiute me
seokiute. Ye la liwaneeye be gare ye be maliuwegili lago liwaneli
ligekirimwe we nge ye tammwele be iwe ye sa mwoshomwoosho lago
sepeigi. mele we yewale.
Ila ye shapi sheogiu yato la yee iye ye sa
gola togo igela nge iye ilegiire lago fela nge ye sa mwoshomwoosho
sepeigi yewaare.