adapted by Leo D. Pugram
illustrated by Lee Samson

Qimmoey neel' i pumoqon ni yaed ba maqëw. Yaed maa paer u toqobean ea kanaawoq. Yaed maa taamaen ko girdiiq ni maa yaen u kanaawoq. Pii chaaq ney ea daawor ra guy-eed ba elephant reeb ea rraan. Quw rogon ni yaed raa guy? Ma chanea ka ra rungaqag-eed marungaqagean. Ma yaed ba qadaag ni nga ra maath gaed nga doew reeb ea elephant.

Pii chaaq ney ea taqareeb rogoraed ni yaed ba maqëw. Ma chanea raa ba gayaed ma baay ban'ean ni ba thiil rook' ha gayaed. Ba thiil yaqaraed. Ba gayaed ea ba ngochngooch ma ba gayaed ea ba n'uw. Ba gayaed ea ba piichooqay ma ba gayaed ea ba manaen'ug yaqan. Ma chanea ku baay ban'ean ni taqareeb rogoraed riy. Raa ba gayaed ma maa leam naag hi ti ni bea yoeg ea riyul'.

Qeree reeb ea kaakadbuul mea yib beaq ni baay ba elephant ni faak. Mea yib i tal nga toqobean fa pi maqëw.

Mea gaqar ngooraed, "Moeg-eed, maang ea gimeed bea leam naag ko rea elephant roog ney? Mu baed moeg-eed ko ba diqin ea rea elephant roog ney."

I yib fa pi maqëw nga ra langabiy-eed fa rea elephant. Daab i yog ni nga ra guy-eed fa rea elephant nga qawochraed. Ma chanea yaed bea leam naag ni yaed raa naang rogon yaqan ni faqan yaed raa maath nga doew.

Qeree yaen ea chaaq ni soomm'oon i maath nga doew fa rea elephant. I thiithiy paaq u p'eeyoen fa rea elephant. "Ka gu naang qurngin ban'ean ni nga gu naang u marungaqagean ea rea gamanmaan ney. Kew mus ni ka gu maath ngaak' ma ka gu naang. Ba woed baang i rungrung." Kea feal' u waen' ni kea naang ko quw rogon yaqan ea elephant. Mea suul nga tagiil' u toqobean ea kanaawoq.

Mea yaen ea bi Ni magid fa pi maqëw. I yaen i maath nga nguwealean fa rea elephant. Mea gaqar, "Ka ri mu qalooboch. Daathii ba woed baang i rungrung. Yaa ba n'uw ma ba m'uuth ni woed ba sarey ni wasey."

Mea yaen ea bi ni dalip fa pi maqëw. Mea yaen i maath nga p'eethunguun fa rea elephant. "Gimeew l'agruw ni ka mu qalooboch gow." I noon ni kea damuumuw. "Raa beaq ni ma naang ban'ean ma ma naang ni rea elephant ney ea ba woed baparchooyog. Ka yigii dubqag ma be manguuy ni ngea woed ba sarëy."

Bi ni qaningeeg ea maqëw ea beaq ni ba ngochngooch. I yaen i maath nga qaay fa rea elephant. "Goeg ngoomeew, riyul' ni gimeew ba maqëw! Daariy faan ni gimeew ra maath nga ban'ean. Daakuriy ea thamthaem u bugul i paqmeew. Rea elephant ney ea ba n'uw ma ba k'iy ni woed ba kea gaak'iy."

Qeree yaen fa bi ni laal ea maqëw. Chaaq ney ea beaq ni ba n'uw. I yaen mea yaen i maath nga teel fa rea elephant. Mea gaqar, Gu ba n'uw. Qeree raa gu maath nga baang ni ba toelaang ma gi ni th'abii gaaq faan. I gaeg ea gu bea leam naag ni rea elephant ney ea ba woed ba ripöw ni ba gaaq. Gimeed ea daa ku mu naang-eed rogon i maath nga doew ban'ean ma gimeed yoeg yaqan."

Qeree yib fa bi ni neel' ea maqëw. Chaaq ney ea riyul' ni ri ba geel ea maqëw rook'. Ba n'uw nap'an nii gëy fa rea elephant fin i pat ngaay. I yaen i koel pachan fa rea elephant. Mea gaqar, "Gu bea leam naag ni nga mu matooyil gaed ngoog gimeed ea ti niir ea maqëw. I gaeg ea ka ba feal' ea thämthaem roog. Kea kireeb-aen'uug ni daab i yog ni nga mu thaamiy-eed ban'ean ni ba feal' rogon ni woed gaeg. Elephant ea woed ba yael' i gaaf ni goomaa."

Ngiyaal' neam mea yaen fa rea elephant. Qeree qii paer fa pi maqëw ni tuugthiin ea qu ra taay-eed ni gubiin ngiyaal'. Qu ra tuugthiin naag-eed marungaqagean yaqan fa rea elephant. Yaed bea tuugthiin ma yaed bea taamaen u toqobean ea kanaawoq.