written by Rioichy Johnny
designed and illustrated by Donald L. Buchholz

Nengeni eei nioos. Meet ka kúna? Ifa usun áán ekkeei maan méngúúngú iká fóós?

Ekkewe maan raa mwochen repwe ááni eew mwiichen kakutái.

Meet sókkun pisekin ettik kaa ekieki repwe mwochen néúnéú?

Aa nónnómw emén tongki me emén néún masta. Áán eei tongki angaang ekan wiisen kaap pisek ngeni ewe neenien féér pisek. Mwúrin fitu ier ewe tongki aa ekieki pwe néún we masta epwe ne opwut pwe aa fetán ngeni aan apwangapwang nge esapw chúwen toongeni eki ekkewe pisek mei chou. Iwe, aa ekieki pwe epwe ne súúseni néún we masta.

Nupwen áán feinnó wóón ewe aan, aa chuuri emén konaak aa kan kókkóón nepeekin ewe aan "Pwata ina ka chék kókkóón nge eieménú?" ewe tongki aa eis.

"Mei pwúng!" ewe konaak aa pénúweni. "Ngaang úwa apwangapwangen chinnap. Nei we masta ese chúwen saanieei. Iwe, ieei úwa sú pwe úpwe ne nó kút fetán neeniei."

"Pwata kose ne fiti ei sipwe nó féératá eew áách mwiichen kakutái wóón enan sóópw itan Bremen? Een kopwe wiisen ettik úkúneene nge ngaang úpwe chóón opwuni ewe tirongkang."

Ewe konaak aa tipe-eew ngeni, iwe ra mwinenó wóón ewe aan. Ese mwo tam aar fetán nge ra chuuri káttu. Káttu aa kan mómmóót pwan nón aan netipengngaw.

"Pwata usun een mei netipengngaw ko káttu?" ewe tongki aa eis. "Mwa ié esapw netipengngaw iká aa sineei pwe epwe ne fór úwan," ewe káttu aa apasa. "Ngaang úwa chinnap úse chúwen toongeni cheei nakkich. Ieei neei we masta aa erá pwe epwe ne esúweei. Iwe, ngaang úse chúwen sineei meet úpwe ne fééri."

"Etto kopwe fitikem sipwe nó kakutai nón enaan sóópw, ewe tongki aa pwan erá. Een mei sineei ettik kitar?"

Ewe káttu aa tipeeew ngeniir iwe aa fitiir nó. Ese mwo pwan tam aar fetán nge ra pwan chuuri chukó aan kan kékké wóón eew tit.

"Mwa pwata ad ina me pwan eingeingen néúwomw ko chukó ne kékké? Meet aa fis ngonuk?" ewe tongki aa pwan eis.

"Ngaang úwa fen sineei pwe nón ráninfen epwe wor waasééna. Iwe, ngaang repwe niiei neekunión pwe nofitin suupw. Iwe, ieei úse chúwen sineei meet úpwe ne fééri," ewe chukó aa apasa.

"Iwe, mei ééch kopwe ne fitikem sipwe nó kakutái nón enaan neeni me mwen óómw kopwe ninniinó. Iká pwe sa tipe-eew epwe fókkun ééch."

Ewe chukó ad tipe-eew ngeniir iwe iir me fémén raa fetán nó.

Iwe, nupwen aar pwepwpwerenó nge aa pwinitiir, iwe raa ekiekin pwe repwe ne annutunó fáán efóch irá. Iwe tongki me ewe konaak raa annut fáán ewe irá wátte. Ewe káttu ad téétá annut wóón efóch panan nge ewe chukó aa téétá wóón wúnúchikin ewe irá pwe aa nó annut. Mesemwmwen aar repwe ne annut nge ewe chukó ad kúna eew saram mei chék arapakkan. Iwe, ad féngúnatá chienan kewe.

"Sipwe ne nó mwan pi iká eew iimw enaan," ewe tongki aa erá. Iwe, iir meinisin raa fetán nó. Nupwen aar fetán nó nge ewe saram aa watteenó. Nupwen raa arapakkan ngeni, ra sineei pwe imwen chóón sooná ewe.

Iwe, ewe tongki aa erá pwe pwokiten ii wátte, ii epwe wiisen téétá annámwenong me nón ewe asammwacho. Iwe, nupwen raa toori ewe iimw, ewe tongki aa ánnámwetá me nón ewe asammwacho.

"Meet ka kúna?" ewe konaak aa eis. "Mei wor eew cheepen mei wur reen mwéngé. Ekkeei chóón sooná ieei iir mei móót ngeni nge akkapworaus," ewe tongki aa pénúweni.

"Mei fókkun ééch," ewe chukó aa erá. "Mei pwúng, amwoitá sa fen toonong," ewe tongki aa pwan erá. Iwe, ina atun ra pwúngúpwúng iká meet repwe fééri pwe ekkewe chóón sooná repwe máirú, iwe raa súúseni ewe iimw.

Iwe, raa tipe-eew fengen pwe ewe tongki epwe uwaatá péún pen ewe asammwacho, ewe konaak epwe téétá núkúsékúrún ewe tongki, ewe káttu epwe téétá wóón ewe konaak, iwe ewe chukó epwe ássitá mwóot wóón mékúrén ewe káttu.

Nupwen iir meinisin repwe mónnetá, iwe ra pwopwutááni aar we kakutái. Ewe tongki epwe mááu, ewe konaak epwe wuwu, ewe káttu epwe ngááwu, ewe chukó epwe kokokako, iwe repwe emékkanong ewe iimw. Iwe, nupwen raa fééri ewe sókkun, ekkewe chóón sooná raa wesewesen máirú, are pwan nuwokkus, iwe raa wesewesen nikásásá seni ewe iimw pwe tittipeer nge eew mwichon énú. Iwe, raa sú seni ewe iimw, súúnó, neein petewen. Ekkewe maan raa toonong pwe raa ááni ewe cheepen pwe raa mwéngé.

Nupwen raa wees ne mwéngé, raa een me kút neenian ne annut, iwe raa kunuenó ewe naam. Ewe tongki aa annut núkún wóón eew pinúkún koiasi, ewe konaak aa nómw núkún ewe asam, ewe káttu aa nómw pen ewe ekkei, ewe chukó aa nómw wóón ewe tinéú.

Iwe, nukenipwin ekkewe chóón sooná raa kúna pwe ewe iimw ese chúwen tin are saram. Ewe wátte me neiir aa erá pwe ese wor weeween aar we súúseni imweer we.

Iwe aa tinanó emén me neeiir pwe epwe nó katon. Ewe emén aa etinó, aa ánnifenong me nón ewe imwen kuk, iwe aa kúna tinen mesan ewe káttu kewe me pen ewe ekkei. Tittipan chék nge ewe ekkei nge mei chúwen kú. Aa angeei aan we masis pwe epwe ne keni wóón.

Iwe, mwet ewe kattu mweteri mesan, sáwu ii nón ewe asam nge ewe konaak e nó mwet, kúú pecheen, ásiu ii núkún nge ewe tongki enó mwet kikkini fáán mwárin. Ina atun ewe chukó aa nenó reen ewe ékúrang, iwe aa kékké nge erá pwe repwe turufi ewe mei sooná.

Ewe chóón sooná aa niwinnó nge chienan kewe raa eis iká meet we aa fis. Ii aa apasa, "mwa meet reen ekkanaan énú nón enaan iimw. Ennet itá úpwe keni áái we masis wóón ewe ekkei nge enó mwet ewe emén mweteri mesei. Itá úpwe sááwu nón ewe asam nge ewe emén epwan nó mweteriei posu ngeni pecheei néún we saar. Itá upwe pwan súúwu núkún nge ewe emén epwan nó mweteriei kikkini fáán mwári. Áái sá seni ewe iimw nge emén aa kékké pwe repwe turufiei. Ngaang uwa sá nge úse chúwen finiei."

Ieei wesewesen ewe metóóch.

Ieei ewe mettóóch ewe chóón sooná aa ekiekii pwe aa kúna.

Een mei kan núokkus reen óómw rong ékúrang iká kúna ngúnúen mettóóch? Apasa ekkóóch mettóóch een mei piin rong iká kúna.