Ewe Énúwén Aa Winiiti
Emen Kúúwen

written by Alvios William
illustrated by Mathias Omwan

Aa nónnómw emén feefin me néún emén áát wóón fénúweer we eew téé. Iir chék wóón fénúweer we ese pwan wor chieneer wóón. Fetán, fetán nón eew ráán ewe áát aa éra pwe epwe ne pwúpwpwúnú. Iwe inan we aa ereni pwe iká aa mwochen pwúpwpwúnú iwe mei ééch. Ewe inenap aa ereni pwe mei mwúrinné nge epwe chék finiééchchú ié epwe pwúnúweni pwún ii aa apwangapwang. Iwe pwúnúwán epwe toongeni túmwúnúú ngeni pisekin me anan mwéngé iká pwe aa máá seni.

Ewe énúwén aa nó wóón ewe eew fénú pwe aa nó kút pwúnúwan. Aa kúna emén féépwún mei fókkun niaééch iwe aa uwei pwe pwúnúwan. Iwe nge me mesemwmwan aan we epwe ne nó kút pwúnúwan, inan ewe aa ereni pwe esapw chék attona mesééchchún aramas iwe aa ekiekin pwe epwe ne pwúnúweni. Epwe attona mwékútúkútún iwe epwe pwan káé ngeni ekiekin iká mei aramas ééch iká mei ngaw.

Ewe énúwén aa waato pwúnúwan we iwe raa nónnómw reen ineer we. Fetán fetán toori aan ewe feefin aa chiinnap ese chúwen kúna reen mesan. Iwe raa eimwúúnó nón eew imwan. Ewe énúwén aa men fókkun éúcheááni inan we pwe iwe chék emén inan e chúwen manaw ngeni. Iká pwe e kan wor ekis aneer mwéngé iwe ewe énúwén e kan chék ngeni pwúnúwan ewe epwe waanó reen inan we pwe epwe áni.

Fetán, fetán ekkóóch maram me mwúrin, ewe féépwún aa wor aan ekiek mei ngaw ngeni ineer we. Ese saani aan ineer we epwe chék ákkáni annéén áneer mwéngé nge ii ese áni. Iwe ewe énúwén aa kan nó attaw iwe aa kan ngeni pwúnúwán we anan ineer we iik pwe epwe nó kuku ngeni. Ewe féépwún e kan chék nó supw fetán kúúwén aa ápwichi iwe aa kan ngeni ineer we pwe epwe áni. Ewe chiinnap ese sineei pwe kúúwén ekkewe e kan áni pwún aa pach mesan. Ewe féépwún aa ina chék aan we angaang ngeni ineer we chiinnap  Ewe énúwén ese sineei pwe pwúnúwan we e kan awochoocha ngeni inan we kúúwén.

Fetán, fetán nón eew ráán, ewe énúwén aa nó áámwa inan we. Ewe énúwén aa etinó reen inan we iwe inan we aa ereni pwe epwe isettiw anan kewe iik pwe repwe mwéngé. Iwe ewe énúwén aa angeei áán inan we neenian mwéngé pwe aa isettiw. Aa kúna pwe masowan kewe esapw iik pwe kúúwén. Iwe aa ais ié we e amwéngééni. Iwe ewe chiinnap aa erá pwe pwata nge iwe anan kewe iik e ngeni pwúnúwan we pwe epwe waanó reen. Ina chék nge ewe énúwén aa kechiw pwún aa fókkun tongeei inan we. Inan we aa ereni pwe esapw kechiw pwún iwe úkúúkún áán pwúnúwan we tongeei. Ewe énúwén aa kechiw, kechiw ee wees. Inan we aa ereni pwe epwe nó nón aar we pwéén iwe aa wiietá fétaar kewe oot. Epwe pwooni, mwatúnú iwe aa waanó reen inan ewe.

Iwe ewe énúwén aa nó kamaani fétaar kewe oot wees iwe aa waanó reen inan we. Inan we aa ereni pwe epwe ne etinó pwe epwe ne mwéngé ewe mwatúnún oot. Ewe énúwén aa móóttiw pwe aa mwéngé. Aa mwémwmwéngé ewe sepian oot nge aa pwan sissiiwin únúchchan ngeni únúchchan kúúwén. Inan we aa kan kechiweiti pwún aa pwan tongeei. Aa ereni néún we énúwén pwe epwe ne wees me mwéngé ewe mwatúnún oot nge ewe énúwén ese mwóchen pwún reen aan we fókkun tongeei inan we. Aa tongeei reen ewe napanap pwúnúwan we e fééri ngeni.

Aa mwéngé, mwéngé ee ina e itenó ewe mwatúnún oot nge aa pwan unusenó inisin we pwe aa winiiti emén kúúwén. Iwe ewe kúúwén aa té, té, té ee toori imweer we me pwúnúwan we. Aa kékkééri pwúnúwan we pwe epwe suuki ewe asam. Pwúnúwan we aa suuki ewe asam nge aa fókkun mááirú reen aan aa kúna ewe watteen kúúwén. Aa pwúpwpwúchéér nge sá seni ewe kúúwén. Ewe kúúwén aa asori pwe esapw sú pwe ii pwúnúwan we. Ewe féépwún aa fókkun chék sá nge pwúchéér. Ina nge ewe kúúwén tattapweei chék ese nikitaanó. Ewe kúúwén aa kan asori nge ereni pwe esapw sú pwún má iwe aan mwochen pwe epwe iwe usun. Ewe féépwún aa sú sú sú ee aa sááwow neeset nge ewe kúúwén fókkun pwan tapw chék me mwúrin.

Fetán, fetán ee toori aan ewe féépwún aa turuwu neemataw ina mwo nge ewe kúúwén ese nikitaanó. Ewe féépwún aa fókkun sénúk aan we niwokkus iwe aa ááwu ááwu nón ewe mataw iwe aa mwoonó ese chúwen wor e sineei ifa mwúrimwúrin.