text by Alvios William
illustrated by Starla Stone

Nóómw, nóómw, nón fénúwen wóón, mei wor emén mwáán. Eei mwáán mei pwan wor únúmén néún áát. Ekkóóch ier me mwúrin aan ewe kúkkún upwutiw, aa máánó ewe mwáán. Iwe, nge me mwan aan ewe mwáán epwe ne máánó, aa einetii-ngeni néún kewe en me wiisan.

Aa ngeni ewe e watte fénúweer we pwe ii epwe wiisen nómwetiw wóón. Ewe watte aa fókkun pwaapwa reen wiisan we me reen semeer we. Aa pwopwutá nee angaang wóón ewe fénú. Aa fótokaatiw sókko-paatin iráán mwémwmwéngé pwan kéúútiw imwan wóón.

Ewe saam aa ngeni ewe nampa ruu aan we tittin kou pwe epwe wiisen túmwúnúw. Iwe aa úreni pwe iwe wiisan we me reen. Ewe nampa ruu aa pwan fókkun pwaapwa reen wiisan ewe. Aa kan ekieki pwe epwe fóóneni ekkewe maan iwe aa amééméénó pwe epwe wor néún mwooni.

Iwe, ewe saam aa ngeni ewe kúkkún emén káttu pwe wiisan. Ewe kúkkún áát fókkun osukosuk ne resin anchaangeei meet sókkun tuufich epwe angeei seni ewe káttu. Ewe áát ese kinamwmwe reen aan we ese sineei meet sókkun namwot epwe angeei seni wiisan we. Iwe nón eew ráán, aa mómmóót nón aan we ruumw nge kan fókkun eiengngaw.

"Meeta eei kaa kan fééri?" ewe káttu aa ais ngeni. "Ngaang mei sineei meeta na ke ekieki. Iwe, kosapw nóniinen pwe iei úpwe anisuk reen úkúúkún meet ngaang mei toongeni."

Mwúrin aan we pworaus ngeni ewe áát, aa angeei chék eew tuuk iwe aa fetán nó neein ewe petewen. Fansoun aan aa toori neein ewe petewen, aa achopwu ekkóóch taka iwe aa isenaanong nón ewe tuuk. Káttu aa nó oponó neein ewe petewen.

Iwe ese mwo pwenninó nge aa kúna rúwemén chukó pwe raa toonong áni ekkewe taka nón ewe tuuk. Káttu aa sáánó angeei ewe tuuk iwe aa riienó awan ewe. Iwe aa uwei ekkewe chukó uwei enó reen ewe kiingen ewe fénú pwe ochaan.

"Kiing!" ewe káttu aa kékké. "Ochóómw keei chukó me reen áái naan maasta. "Oo!" ewe kiing aa péppénú. "Kinisou chapwúúr ngonuk pwan uwei áái kinisou ngeni óómw na maasta. Kete pwan afáánni," ewe káttu aa pénúweni iwe aa nó.

Nón pwan eew ráán káttu aa pwan uwei aan we tuuk aa pwan nó neein ewe petewen. Káttu e chúwen okkop neein ewe petewen nge aa kúna emén watteen piik pwe aa tupw nón aan we tuuk. Iwe aa pwan mweteri ewe piik mwareengeni imwan ewe kiing we.

"Kiing!" káttu aa pwan asori ewe kiing. "Pwan iei ochóómw eei emén piik me reen áái we maasta. E erá pwe kopwe fókkun amusóónó aan tipis pwún ese wor mettóóch pwe fókkun iei chék eei piik e toongeni ááni niffang ngonuk."

"Oo!" kiing aa fókkun mááirú. "Káttu, fókkun kinisou ngonuk iwe kaa ereni óómw na maasta áái kinisou. Úwaa men sááweiti een pwan óómw na maasta reen aan eei ese wor mettóóch úpwe toongeni anisi ngeni kemi Iwe, nge má iei úpwe ekieki meet úpwe pwan má toongeni ááni aninnis ngeni kemi." "Ewer," káttu aa erá. "Iwe kone pwan nómw kiing pwe úpwe nee pwan nó."

Káttu aa pwerenó chék nón ewe aan iwe aa niwiniiti imwen ewe kiing we pwe aa op núkún áán ewe kiing we ruumw. E chúwen op nge aa rong aan ewe kiing ereni néún we nengngin pwe neesor repwe nó túkken nón ewe pwuupwu. Iwe ewe káttu aa sáánó reen imweer we me aan we maasta aa nó ereni néún we maasta meet we e rong me nón imwen ewe kiing we.

"Neesor kaa nó etinó nón enaan pwuupwu," ewe káttu aa ereni néún we maasta. "Kopwe etinó kaa nó túkken. Kosapw opwut pwe ina kopwe kúna meeta epwe fis mwúrin."

Iwe ewe áát nónnómw nge resin ekieki iká epwe nó túkken nón ewe pwuupwu. Neesossoor chék nge aa nó túkken nón ese pwuupwu. Atun aan chúwen túkken nge ewe káttu aa angeei úfan kewe aa óópaanó fáán eféú watteen faaw.

Ese mwo pwepwpwenninó nge aa war ewe killng me néún we féépwún pwe repwe ne túkken. Atun aar pwere-ngeni ewe kónik nge ewe káttu aa pwúpwpwúchéér. "Ooo! Cheeri, cheeri áái naan maasta pwe aa túúnó nge epwe ne má me nón enaan kónik."

Ewe kiing aa esinna pwe ewe káttu ekan niffang ngeni ewe. Iwe, aa pwúchéér ngeni emén néún kewe chóón angaang pwe epwe cheeri ewe áát. Ewe chóón angaang aa cheeri ewe áát nge ese mwo wor úúf wóón. Ewe kiing aa angeei eché úfan kewe pwe aa ngeni ewe áát pwe epwe úféúf.

Atun aan ewe áát we aa úféúf úfan ewe diing we aa fókkun pwáánó ate mwúrinnéén we. Ewe kiing aa asori ewe áát iwe aa kan apasa ngeni áán kinisou reen ocháán kewe chukó me piik seni. Iwe ewe kiing aa erá pwe ewe áát epwe ne fiti wóón waan we óris pwe repwe nó kukkunow.

Ena atun nge ewe dáttu aa sá me mwen ewe áát me ewe kiing aar repwe pwereto nón ewe aan. Aa chuuri ekkóóch chóón atake rekan fééri aar kewe atake. Iwe káttu aa ereniir pwe iká kiing aa pwereto nge e ais aan ié eei watteen atake iwe oupwe erá pwe áán áái we maasta. Nge iká pwe ouse erá pwe áán áái we maasta ina úpwe niwiniiti kemi iaa nii kemi nó. Káttu aa pwan sá.

Kiing me ewe áát raa pwereto reen ekkewe chóón atake. "Áán ié eei watteen atake?" kiing aa ais. Ewe ekkewe chóón atake raa kéépékútá, "Áán ena áát e fituk." Ewe kiing aa fókkun ingenó reen ewe atake.

Káttu aa sá, sá, sá toori eew watteen titin kou. Aa pwan ereni ekkewe chóón túmwúnú kou pwe iká kiing aa pwereto nge e ais áán ié eei titin kou iwe oupwe erá pwe áán áái we maasta. Iwe nge iká pwe ouse erá pwe áán áái we maasta ngaang úpwe nii kemi nó.

Kiing me ewe áát raa pwereto toori ewe titin kou. Kiing aa pwan ais án ié ewe titin kou. Ewe ekkewe chóón túmwúnú ewe titin kou raa déé pékútá pwe áán ewe áát. Ewe kiing aa fókkun ingenó reen pisekisekin ewe áát.

Káttu aa pwan sá, sá, sá toori eew teniniimw. Aa kúna kiingen ewe tenin-iimw pwe mei móót ngeni aan we cheepen iwe aa pwerenó reen. "Kiing," ewe kAttu aa asori. "Mei pwúng pwe een mei fókkun tipáchchem? Ú rong pwe een mei kan toongeni éúnúkénó kaa winiiti emén watteen korira. Iwe re pwan erá pwe een mei pwan toongeni éúnúkénó kaa winiiti emén kúkkún nakkich. Mei pwúng?" "Mei pwúng," ewe kiing aa erá. "Iwe sótun kopwe pwan éúnúkénó ngeni emén nakkich?" ewe káttu aa ereni. "Ewe kiing aa pwan éúnaanó éúni ngeni emén nakkich."

Atun aan ewe kiing we winiiti emén nakkich nge ewe káttu e chék mweteri ocheeienó. Iwe ewe káttu aa nómw pen ewe asam pwe aa witi ewe kiing me ewe áát aar repwe ne pwereto. Kiing me ewe aat raa pwereto, pwereto, toori ewe tenin-iimw?" Ewe káttu aa kéétá, "imwen áái na maasta."

Ewe kiing aa fókkun ingenó reen ewe tenin-iimw. Iwe aa erá pwe ewe áát me éún we nengngin repwe ne pwúpwpwúnú pwún aa sineei pwe ewe áát emén mei pisekisek. Raa amonaatá mwéngéén aan ewe áát me néún kiing we nengngin we apwúpwpwúnú. Iwe ewe áát me néún kiing we nengngin raa pwúpwpwúnú raa nómw nón ewe tenin-iimw. Iir raa kiingen ewe tenin-iimw nge ewe káttu aa fis pwe néúúr meinapen sounfiu.