retold by Alvios William
illustrated by Starla Stone

Ia ke saani óómw kopwe nómw ia? Fénúfaan iká Nááng?

Aa nónómw emén mwáán itan Anepet. Fansoun meinisin, me mwen aan Anepet epwe ne kan annut e kan ióótek.

"Uwa chipwang ne nómw ikeei," anoon nón aan kan ióótek.

"Amwo itá emén chóón nááng aa etto nukei ei nó nááng. Úwa fen pwos, fókkun pwan chipwang. Ese wor áái pwaapwa me wóón eei fénúfaan. Amwo itá emén chóón nááng aa fen uwey ei seni eei fénúfaan aa uwei ei nó nááng."

Fetán, fetán nón eew pwinin, Kawaichy aa pwereto núkún imwen Anepet we nge aa rong aan Anepet aa pwan ióótek. "Amwo itá emén chóón nááng aa fen uwei ei seni wóón eei fénúfaan, uwei ei nó nááng pwún úwa fen riaffeú reen osukosuken wóón eei fénúfaan."

Iwe Kawaichy aa sáánó nón imwan ewe. An angeei eché kuus mei pwech iwe aa fittienó nón. Aa sáánó úútá núkún imwen Anepet we. Anepet mei rong mwaataaten Kawaichy me núkún ewe iimw.

"Een ié?" Anepet aa ais.

Kawaichy aa erá, "Ngaang emén chóón nááng. Ú chék etto pwe úpwe ne angeeiuk pwe sipwe nee nó nááng."

Anepet aa kéé ngeni pwúnúwan ewe pwe epwe úreni ewe chóón nááng pwe ese nómw. Iwe aa oponó fáán aar we peet. Pwúnúwan ewe ese mwo fóós. Iwe Kawaichy aa pwan kéénong, "Anepet, feitto pwe sia mang. Ngaang mei kúna aukúúkún óómw angaang weires me wóón eei fénúfaan ina pwata kopwe etto sia nó nááng."

"Anepet ese nómw," pwúnúwan Anepet we aa kééwow reen ewe chóón nááng. "Kopwaapw pwan niwinto."

Iwe ewe chóón nááng aa erá, "Iwe iká pwe ese nómw Anepet, een kone etto fitiey."

"Anepet, toowu me fáán ena peet ke nó fiti enaan chóón nááng." pwúnúwan Anepet we aa kéénong reen faan ewe peet.

"Ke mwo kan akkaneian eei pwe amwo itá emén chóón nááng aa uweiuk enó nááng nge pwata ina kaa op?" pwúnúwan we aa pwan erá.

Anepet ese mwo fóós. Aa chék op fáán ewe peet. Ewe chóón nááng aa pwan kéénong, "Feitto mwaa sia nó pwún ina Anepet ese nómw."

"Kose rong?" pwunuwan Anepet we aa úreni Anepet. "Fetán ke nó fiti."

"Nge kose rong ina e erá pwe een kopwe ne fiti?" Anepet aa apasa ngeni pwúnúwan we.

"Ngaang úsapw fiti. Een ke akkaneianeeyi óómw kopwe nó nááng. Ke meen iaa pwááruk pwe een mei nomw." pwúnúwan Anepet we aa erá.

"Mwittir mwaa nemin!" ewe chóón nááng aa pwan kéénong.

"Enaan chóón nááng, ieeii Anepet fáán eei peet," ewe feefin aa kééwow reen ewe chóón nááng.

"Anepet feitto sia nó nááng," ewe chóón nááng aa pwan kéénong.

Anepet aa ekis me fókkun ammanga nee toowu me fáán ewe peet. Aa kééwow reen ewe chóón nááng pwe epwe witi pwe epwe toonong nón úfan kewe. Weesin, iwe aa feinnó úútá reen ewe asam.

"Chóón nááng! Een emén aramas mei pin napanaap pwan fókkun tekia seni ei," Anepet aa úreni ewe chóón nááng. "Kose mwochen kopwe ekis kiinenó toowaaw seni ana ie ke nómw ie?"

Iwe fansoun áán ewe chóón nááng aa fetánenó ekis toowaaw seni ewe iimw, Anepet aa mwetewu me nón ewe asam iwe aa wesewesen émwmwúchchú nee sá. Iwe ewe chóón nááng aa upwuupwutiw ne sa me mwirin.

Mwirin únúngát ráán Anepet aa wareiti  imwan ewe. Aa fókkun ménúúnú aan epwe fééri ooch mettóóch.

"Meet kaa saani óómw kopwe ne nómw wóón fénúfaan?" pwúnúwan we aa ais ngeni.

"Ewer!" Anepet aa úreni pwúnúwan ewe. "Eei fénúfaan, mei mwúrinné aach sipwe nónnómw wóón. Mei pwan mwúrinné aach sipwe pwan máánó wóón iká sise saani. Ina pwata ngaang úwa finaatá neetipei pwe upwe nónnómw wóón fénúfaan."