ÁÁN NIPWPWEY

WE CHÚNNÚMEI

written by Alvios William
illustrated by Peter Saffery

Raa nónnómw, nakkich me nipwpwei. Nón eew ráán raa nó túútú nón eew kónik. Nipwpwei aa túttúútú nge aa kúna ngúnún éwumw faach me nón ewe kónik. Aa netá wóón ewe faach aa kúna ewe faach pwe aa nupw.

"Nakkich," nipwpwei aa asori. "Téétá kopwe asumwaatiw ngútach eei faach."

"Een pwún ke kan kuruppich nee téétá," nakkich aa pénúweni.

"Wet, kosapw fen kan pwan urumwmwot," nipwpwei aa takir.

"Aapw kan een pwún e aro metek fáán tangei nee téétá," nakkich aa ereni nipwpwei. Iwe nipwpwei aa téétá, téétá aa túnútiw efóch éútun. "Nakkich nee," aa asori nakkich. "Kaa kan túmwúnú éúti kena pwún kote fen éssúngúrú iwe úwaa kan owupwpwang."

"Pwata ko úpwe kan éssúngúrú éútún pwii," nakkich aa kéétá. "Iei úpwe rúsi iwe iaa anomwu chék ekis pwe kopwe kúna iká kaa téétiw." Iwe nipwpwei aa pwan téétá, téétá, aa pwan túnútiw ekkóóch éútún kewe. Aa aro epwe ne faassútiw me wóón ewe faach.

"Nakkich nee," aa pwan kéétiw reen nakkich. "Kose kan mwochen kopwe pwan túmwúnú ekkena raa pwan turutiw?"

"Ewer," nakkich aa pwan kéétá. "Kosapw fókkun ekieki pwún iei ngaang mei túmwúnú."

Iwe nakkich aa angeei éútún nipwpwei kewe aa ineienong nón eew pwaang iwe aa nó éssúngúrúeno nón. Iwe, aa pwan toowow me nón ewe pwaang aa kan éménúngngawenó pen ewe kónik. Nipwpwei aa téétá, téétá, téétá, pwan tunutiw nussun éútún kewe iwe aa turutiw nipwpwei nón ewe kónik.

"Nakkich ifaan éúti kewe?"  Nipwpwei aa ais ngeni nakkich.

"Ikkena faan ena chéé mei pwas ina ú oopaa nóng faan," nakkich aa atupwu nipwpwei. Iwe ewe nakkich aa mweteei iwe aa téétá wóón ewe faach.  Aa téétá iwe aa ngúti nguti ewe faach eitaanó ese mwo ngeni eféú nipwpwei pwe epwe ngúti. Nipwpwei e kan túngóreei pwe epwe móneetiw reen eféú pwe ngútan ese páátikin moneetiw. E kan ngúti, ngúti chék ekkewe faach aa angeei piin kewe anna ngeni niwitin iwe aa móneetiw reen nipwpwei. Aa ngúti ngúti ewe faach eitaanó iwe aa mwetetiw iwe aa sú.

Nakkich aa nó kóón nón kian ewe pwe itá nge aa annut. Epwe nee rú nge aa war nipwpwei. Aa kan ekis fókkun eméúrúúrú mesan pwe itá nge mei annut.  Nipwpwei aa toonong nón imweer we aa kúna nakkich.

Nipwpwei aa kóón nón kian we nge aa kan anchaangeei meet epwe ne asona ngeni nakkich. Meet kopwe fééri iká pwe een ewe nipwpwei? Iwe aa fééri eew áán chúnnúmei aa amomwu nón aar we kapet. Aa asakka ooch taka iwe aa isettá wóón ewe chúnnúmei. Nipwpwei aa kan kóón nón kian we.

"Nakkich nee," nipwpwei aa asori. "Kose mwón ánei?"

"Ee." Nakkich aa péppénú. "Anomw meet?"

"Ánei iik." Nipwpwei aa apasa.

"Úse mwón ena, úse mwón ena," nakkich aa pénúweni.

"Nakkich nee," nipwpwei aa pwan asori. "Kose mwón ánei?

"Ee." Nakkich aa pwan péppénú. "Anomw meet?"

"Ánei pinawa," nipwpwei aa apasa.

"Úse mwón ena, úse mwón ena," nakkich aa pénúweni. Nipwpwei aa ekieki meet sókkun mwéngé nakkich epwe saani, "Oo, ina epwe saani mwéngé tempúra."

"Nakkich nee," nipwpwei aa pwan asori. "Kose mwón ánei?"

"Ee." Nakkich aa péppénú. "Anomw meet?"

"Ánei tempúra," nipwpwei aa apasa.

"Úse mwón ena, úse mwón ena," nakkich aa pénúweni.

Nipwpwei aa pwan ekieki meet epwe ne pwan ááni kapas ais ngeni nakkich. "Oo, úwaa sineei meet nakkich epwe mwochen mwéngé."

"Nakkich nee," nipwpwei aa pwan asori. "Kose mwón ánei?"

"Ee." Nakkich aa péppénú. "Anomw meet?"

"Ánei taka," nipwpwei aa apasa.

"O, Ina ú mwón ena, ú mwón ena." Nakkich aa mwetemwet fetán reen áán we pwaapwa. "Ifa e nómw ia?" Nakkich aa ais.

"Ina nón ena kapet," nipwpwei aa ereni.

Iwe nakkich aa sááiti ewe kapet pwe aa suuki. Aa kúna ewe taka. Ina e mweteri ewe taka pwe epwe áni nge ewe chúnnúmei enó pich, pichchiiti chimwan iwe aa peenó. Nipwpwei aa úri, úri nakkich iwe aa oturaanó neeset.  Iwe nipwpwei aa nómw nón imweer we pwe aa imwenaanó ese chúwen wor e pwan awosukosuka. Aa fókkun pwaapwa.