written by Alvios William
illustrated by Chris Layne

Aa fis eew áán ekkewe chóón sukuunen Mwáán pikinik wóon ewe pi South Field. Meinisin áát me nengngin seni aeewin mwiich toori awanuwen mwiich iir mei fiti eei pikinik. Néúúr kewe sense meinisin iir mei pwan fiti néúúr kewe chóón sukuun nee nó pikinik.

Chómmóng mwéngé raa amonnaatá pwe mwéngéén aar we pikinik. Ekkóóch chóón sukuun raa uwow iik, ekkóóch raa uwow mwatúnún kón, ekkóóch raa pwan uwow úkún tééki, nge pwan ekkóóch raa uwow futuk me chukó. Ekkewe sense raa saata waar tarakkú pwe repwe epi ekkewe chóón sukuun ngeni  South Field.

Nikken aa únteng wóón efóch ekkewe tarakkú. Sioda aa pwan únteng wóón efóch. Nupwen aan ekkewe chóón sukuun meinisin raa nómw wóón ewe pi, ekkóóch raa pwopwutá nee kuku áneer kewe mwéngé. Ekóóch raa urumwmwot fetán wóón ewe pi. Raa fókkun túkken, sá, pwan kéén me wóón ewe pi. Ekkewe áát watte raa kan eki ekkóóch ekkewe semiriit iwe raa aturuurewow nón ewe sáát. Nge ekkóóch ekkewe nengngin raa itiit sáát nón péén tiin iwe raa kan achéchchénú ngeni ekkewe sense me pwan ekkewe ekkóóch chóón sukuun.

Neeanowas raa mwéngé mwéngé iwe raa fókkun mét. Mei chék chúwen chómmóng nussun áneer kewe mwéngé. Ichiro aa énúkúnúkaanó nussun ekkewe mwéngé nón aar kewe kama me sepieer kewe. Ekkewe semiriit raa fókkun urumwmwot wóón ewe pi ese iáán sókkun urumwmwot meet raa ááni.

Fetán, fetán ewe akkar aa feitiw pwe epwe ne tupwunó. Mei wor emén kúkkún áát itan Minton aa ménúúnú reen aar we fókkun urumwmwot iwe aa toonong fáán efóch ekkewe irá pwe aa annutenó. Iwe ekkewe chóón sukuun raa énúkúnúk pwe repwe ne niwin ngeni imweer pwún aa pwin. Meinisin iir raa téétá wóón waar kewe tarakkú iwe raa niwin pwún aa wees aar we pikinik. Raa ménúúkaanó Minton fáán ewe irá. Minton ese mwo nenó me annut pwún aa fókkun ménúúnú.

Mei wor ekkóóch énú re nómw wóón ewe téé Etten iir mei chék nennetáái ekkewe semiriit me wóón ewe pi. Nón ena atun nge mei unus ewe maram nge aa arapakkan ngeni aan epwe ne tupwunó. Ekkewe énú raa kéén ngeni ewe maram pwe epwe tupwunó pwe repwe ettá wóón ewe pi pwe repwe kút ocháár aramas. Iei aar we kéén.

"Tupwunó maram, tupwunó maram, úpwe kút ocháái aramas tupwunó maram."

"Tupwunó maram, tupwunó maram, úpwe kút ocháái aramas tupwunó maram."

"Tupwunó maram, tupwunó maram, úpwe kút ocháái aramas tupwunó maram."

Iwe atun aan ewe maram aa tupwunó, ekkewe énú raa ettá wóón ewe pi. Raa tini fetán neein ewe petewen iwe raa kúna Minton me fáán ewe irá pwe mei chék annut. Raa fókkun pwaapwa pwe raa kúnékún ocháár aramas. Iwe raa ekitiweei Minton pwe repwe nó ocheei wóón Etten. Ina atun nge Minton aa nenó me annut pwe aa meefi patan nón péún ekkewe énú. Ekkewe énú raa eki eki toori núkún áán Kunian we sitoowa, iwe raa pwisaatiw núkún ewe sitoowa iwe raa erá, "Siaa ochooch ikeei." Iwe Minton aa kéétá reen ekkewe énú, "Ousapw apaachchewen ochooch ikeei, oupwaapw nó ocheeiei núkún imwen inei me semei pwe repwe nenó nesossoor raa kúna úkkún pei ukkun pecheei chune ma ou pwisiei pwisiei rewe." Iwe ekkewe énú raa pwan pwisi pwisi toori núkún imwan Witni we raa pwan erá, "Sia ochooch ikeei."

Minton aa pwan kéétá reer, "Ousapw apaachewen ochooch ikeei, oupwaapw nó ocheeiei núkún imwen inei me semei pwe repwe nenó nesossoor raa kúna úkkún pei úkkún pecheei chune ma ou pwisiei pwisiei rewe." Iwe raa pwan pwisi pwisi toori awenewenan imwan Racki we iwe raa pwan pwisaatiw raa erá, "Sia ochooch ikeei."

"Ousapw apaachchewen ochooch ikeei, oupwaapw nó ocheeiei núkún imwen inei me semei pwe repwe nenó nesossoor raa kúna úkkún pei úkkún pecheei chune ma ou pwisiei pwisiei rewe." Iwe ekkewe énú raa pwan pwisi pwisi toori núkún áán Sasao we sitoowa iwe raa erá, "Sia ochooch ikeei." Iwe Minton aa pwan kéétá reer, "Ousapw apaachchewen ochooch ikeei, oupwaapw nó ocheeiei núkún imwen inei me semei pwe repwe nenó nesossoor raa kúna úkkún pei úkkún pecheei chune ma ou pwisiei pwisiei rewe."

Iwe ekkewe énú raa pwan pwisi pwisi toori imwen Masaru we iwe raa pwisaatiw iwe raa erá, "Sia ochooch ikeei." Minton aa pwan kéétá, "Ousapw apaachchewen ochooch ikeei, oupwaapw nó ocheeiei núkún imwen inei me semei pwe repwe nenó nesossoor raa kúna úkkún pei úkkún pecheei chune ma ou pwisiei pwisiei rewe."

Iwe raa pwan pwisi pwisi Minton toori núkún imwen Benton we iwe raa erá, "Siaa ochooch ikeei." Iwe ekkewe énú raa pwisaatiw Minton nón ewe sipa fáán efóch núú. Minton aa úreni ekkewe énú pwe mei ééch aar repwe ne ocheei me ikewe ie. Iwe nge me mwen aar repwe ocheei, repwe nó akkoomw kut cheen pwuna me nón áán Masao we pwéén pwe repwe effúrúenong chaan nón pwe ete soonap. Iwe ekkewe énú raa erá pwe mei pwúng. Iwe raa saanong nón áán Masao we pwéén pwe raa en me nó kút sepian chéén pwuna.

Minton echék kitipéppéétá iwe aa sáánong nón imwan ewe. Aa féngúnaatá Benton, Kinington me Machsi pwe repwe pwáátá pwe ekkewe énú repwene ocheei. Chóón imwen Minton kewe raa pwáátá iwe raa ettinaatá néúúr kewe naam. Benton aa angeei néún we sewi aa chék nómw únúkkún ewe asam. Kinington aa angeei eew péén tiinnen pisikit iwe aa úútá únúkkún ewe asammwacho. Machsi aa angeei néún we peen iwe aa operi únúkkún ewe tikot.

Ekkewe énú raa war me kút sepicer chéén pwuna. Rese chúwen kúna Minton iwe raa ennifenó núkún ewe iimw. Ina re keráán emweseni ewe asam nge Benton aa apwu néún we sewi. Kinington aa apwuni néún we tiin. Machsi aa necheei néún we peen. Iwe ekkewe énú raa fókkun mááirú chék iwe raa súúnó. Minton aa kan apworausa ngeni chóón imwan kewe meet ekkewe énú re féér ngeni iwe raa kan fókkun takir. Minton aa fókkun pwaapwa pwe e chék asona ekkewe énú nge raa sononó reen. Chóón imwen Minton kewe raa pwan fiti Minton nee pwaapwa.