written by Bernard Yiftheg
illustrated by June Urada

Kaakaroorn ni kaakaroom u Waqab ea ri gaafgow. Daariy ea th'iib. Ku dea naang ea girdiiq marungaqagean ea nifiy. Qeree yi maa gilk'aed ea ggaan. Raa ni gilk'aed ni gilk'aed ea ggaan nga ni malik'. Ma raa ni kaay ma ka ba kireeb lamean. Fa reeb ea ka ba mak'adk'aad. Yi maa kaay ea ggaan ni ri gaafgow.

Quree reeb ea rraan mea yaen beaq ni bpiin u Gitaem nga teed ni ngea gilk'aed ea ggaan. Rea piin ney ea beaq ni ka rii pilibthir. Yaen nga teed ni bea gilk'aed ea ggaan rooraed pi faak mea chub ea dirraq. Ma rii gin mea baalyaang yaa roofean neam ea n ba feal' ea laang. Chub ea dirraq nga charean nga raan' ba kea chooy'. Qeree yaen i qaaw qadow nga but' ni kea yim' ko marus. Faqän i changar nga raan' fa kea chooy' ma bea gälgael raqën ni bea kankaen nga qawochean. Faqän i tartareag ea changar rook' ni yaen i changar, ma baay beaq ni ba moqon u raan' fa kea chooy' ni baay poen. Baay poen ma ku bea gälgael raqën doew, ni bea känkaen nga qowchean.

Mea gaqar fa rea moqon-ni dirraq ko fa rea piin. "Daab mu rus, moeg ngoog ko maang ea ga bea riin.'"

Mea fulweeg fa rea piin nu gaqar, "Gu bea gilk'aed tarn ea ggaan roomaed pi faakaag."

Mea gaqar fa rea dirraq ngaak', "Qa mu piiq baang ea pi ggaan niir ngoog.

Mea feek fa rea piin baang fa pi ggaan mea piiq ko fa rea dirraq. Feek fa rea dirraq fa gi ggaan mea taay nga taan poen mea n'ag. Mea suulweeg ngea piiq ko fa rea pilibthir. Mea gaqar ngaak', "Qa mu koey nga moeg ngoog ko ba diqin?"

Mea kaay fa rea piin fa gi ggaan ma ri ba feal'. Mea gaqar ko fa rea dirraq. "'Daawor gu waey tarn baang ea ggaan biqid ni qaraay fean ea feal'. Moeg maang ea ka mu riin' ngaay?"

Mea gaqar fa rea dirraq ngaak', "Kea feal' yaa kea n' ag, qer faan ni kea feal' lamean. Mu teeliim nga goeg rogon ea n ' ean ni nga qu mu riin' ko ggaan room mea feal' ngea qer rogon lamean."

"Mu keer ea loew i qer u buut'. Baay mu pirqeg ea buut' ni weachweach ma qeree mu feek. Mu feek nga mu qathkuy ko raen ngea muuq, ma ga ngoongoliy ea th'iib riy. Mu ngoongoliy ni boed ba rabaaq i leq ni ba gaaq .Ga ra guy rogon ni ngea taaw ea ggaan nga laanggin ni ba yoqor. Raa m'aay i ngoongoliy ma qeree mu taay ngea malik'. Ra malik' ma qeree mu palpaliy nga dakean ea raarey nga mu k'eeg ea nifiy u taanggin. Mu k'eeg ea nifiy u taanggin nga ni feal' fean i malik' mea qeal ni ba feal' rogon."

Kii yoeg ea rea dirraq neam rogon i fil ea liyog ngea yib ea nifiy riy. Mea yoeg rogon ea luum ngea moquruuf. Qaram mea sum ea th'iib mea pat ea liyog Liyog ea garear u Waqab i yaen. Th'iib ea paer ni ba walbuw rook' yuu Gitaem. Raa ngea yog reeb ea th'iib ngaak' beaq qu Waqab ma yaed ea yi maa piiq ea machaaf riy ngooraed. Ra ni piiq ea machaaf riy ngooraed ma ra ngoongoliy-eed ea th'iib nga ra piiq-eed.

Qaraay rogon chepin ea n'ean nu riin' mea pat yuu Waqab ko th'iib nga qu ni liith ea ggaan. Rea buut' ni weachweach ni ba qaram ni yi maa ngoongoliy ea th'iib riy ea goqo Gitaem ea baay riy. Kea mus nu roem ea yi raa pirqeg riy. Daariy beaq ni rii ma naang ko bea maang ea m'uug ko rea piin mu Gitaem neam. Kea mus ni yi maa yoeg ni ba dirraq. Yaa chub ea dirraq ngea muuq mea m'uug. Chanea riyuul' ni buuch ni qaram rogon ni ba kaan ea yoeg rogon ea th'iib. Mea sum ea th'iib-ni-waqab.