retold by Bernard Yiftheg
illustrated by Robert Fithing

Kaakaroom u ba naam ea qimmoey ba piiluung ni rii maa rus ea girdiiq ngaak'. Yi maa rus ngaak' yaa maa liiq ea girdiiq. Booqor ea girdiiq ni kea Moeg ko poos rook' ka ni liiq raed ka ra m'aed. Booqor ea pi girdiiq ney ea yi maa liiq ni yi maa th'aeb l'ugun raed ko tow. Boech ea yi maa rugoy ea dilaek ngooraed.

Dea naang ea girdiiq ko rea naam ney faan ni bea liiq ea qa ni piiluung ea girdiiq ni ba yoqor. Kea mus ni yi ma naang ni pi girdiiq ni ba qaraay ni yi bea liiq raed ea girdiiq ni ba cheag ko puullug ngea puuroob. Qeree qurngin ea girdiiq ni ba cheag ko puullug ko rea naam ney, ma goqo ka ra qaf gaed nga m' uw ka ra miil gaed nga reeb ea naam. Goqo ka ra miil gaed yaa ra ba gayaed ma kea rus naag qiir ni ri ni liiq.

Taqa ba pagäl ni Soonqaelik fithingaan ea ka yaed baay ea gäl labthir rook, yaa daariy ea machaaf rooraed ni nga ra piiqeed puluwon ea m' uw riy. Rea pagäl ney i Soonqaelik ea kea mus ni puullug ea maruweel rook' ni qiir ea maa yog ea machaaf riy ko tabinaew rook'. Kea mus ni goqo qiir ea girdiiq ni ma naang ea puullug ni kea magëy ko rea naam ney. Qeree yugu yaed maa paer ea gal labthir rook' ni yaed ba marus. Daa ra naang-eed ko wiqin ea baay niib ni feek nga ni liiq.

Reeb ea rraan mea taaw ea booy ko qa ni piiluung ni ngea qun i Soonqaelik ngea guy ea qa ni piiluung. Qeree yib ea gäl labthir rook' ra koel-eew paaq nga qu ra weeniig ngaak' ma yow bea yoer. Ri yow bea weeniig ni daab i qun faakrow ko yaen yaa ra ni liiq. Raa nga ni liiq faakrow, ma ngea yib ea poos ngaraam nga tafearaed nga ni liiq raed ni yaed gubiin.

Qeree dea qun Soonqaelik mea maang fa rea booy ko qa ni piiluung ea suul. Suul ngea yaen i yoeg ko qa ni piiluung ni daab i qun Soonqaelik yaa daab i paag ea gäl labthir rook' ngea qun. Rii damuumuw ea qa ni piiluung mea l'oeg ea poos rook'.

"Mu maeroed ea nagraam nga nu feek-eed ea gäl i pilibthir neam ngea Soonqaelik ea ngaraay."

Qeree yaen fa pi poos nga ni riin' ni qaram rogon. Ra feek-eed Soonqaelik ngea gäl labthir rook' u geelngiy nga niib naag raed ko qa ni piiluung.

Qaram mea gaqar ea qa ni piiluung ngaak' Soonqaelik, "Bea tagoopuluw ea gal labthir room ngoog. Qeree nga goen' row nga kaal-buus. Guur ea mu leak-eeg nga daarow nga seenggil roog."

Qeree raanow nga seenggil rook' ea qa ni piiluung. Mea niing ea maab. Mea cheal mea gaqar ku Soonqaelik, "Kea us ni goqo guur ea ka ga baay ko rea naam ney ni ga ba cheag ko puullug. Qeree daab ku ni liiq-eem. Raa ni liiq-eem ma daakuriy beaq ni nga qi puuy loelugeeg. Chanea ngea paer ea gäl labthir room u kaalbuus. Daab ni paag row. Yaa nga mu weeliy saalapeeg ku beaq, ma ni liiq meed nga mu m'aed. Ga raa puuy loelugeeg ma n ' ean ni ka mu guy, ma daab mu weeliy ku beaq. Ga raa weeliy ma ka mu naang ni qaram ea nga ni liiq meed ea gäl labthir room."

Qeree paer fa rea pagäl ni ka rii kireeb-aen'. Ba n'uw nap'an nu paer ni yugu ba kireeb-aen' ko gäl labthir rook' ni yow bea gaafgow u kaalbuus. Ku bea kireeb-aen' ngaak' ma daab i yog ni ngea weeliy saalapean ku beaq ya ra ni liiq raed. Qeree paer ni yugu bea buchbuch-aen'. Mea m'aar ngea qaaw nga but'.

Qeree pining ea qa ni piiluung toogta ngea yib ngaak' nga qii sikeeng naag ma daariy baang ni kea kireeb u doew. Qaram mea gaqar toogta ngaak' ' "Ka gu naang ni taafinaey room ea bea kireeb, ma dabuum ni nga mu weeliy ku beaq. Qeree nga n mu qathamgil nga mu feek ea seebel nga mu maen nga teed. Mu maen nga baang ni ga ma naang ni daariy ea girdiiq riy. Ma qeree mu keer ba loew nga mu piiq loelugeem nga laan, yaa rii rungqag beaq lunguum. Mu tooluul, mu tooluul naag ea n'ean ni baay u wun'uum ni ba n'uw nap'an ngea chuw u wun'uum."

Qaram ma rii qathamgil Soonqaelik ngea yaen. Feek ea seebel ngea yaen nga teed. Yaen ngea taaw nga teed, mea yaen i keer ba loew nga taan qangean ba kea gaak'iy ni ba gaaq. I keer ngea muuq mea piiq loelugean nga laan mea tooluul.

"Yuwaen teel ea qa ni piilung yuwaen teel ea qoos..." Yuwaen teel ea qa ni piiluung yuwaen teel ea qoos... Booqor ni booqor yaay ni tooluul ni qaram rogon ea ngea pil lamaan ko tooluul ma fin i tal. Qaram mea suul ni kea feal' boech rogon. Kea baaqud boechquw laaniyaen'.

Dea n'uw nap'an mea taaw ni nga ni taay reeb ea madnam u roem u tafean ea qa ni piiluung. Noeg ea madnam ma kea kireeb ea daraam. Qeree l'oeg ea qa ni piiluung choen ea maruweel ni nga ni ngoongoliy reeb ea daraam nga ni fanaay ko madnam rook'. Ni yaen nga teed ma ni yaen ni pirqeg fa rea kea gaak'iy ni kea fuqög fa rea pagäl taan. Ni guy ma ri ba feal'. Qeree ni toey nga ni feek nga ni ngoongoliy ea daraam riy.

Taaw ko roofean ni nga ni madnam ma qeree yib i moqlung ea girdiiq ko fa rea naam ni gubiin. Mea taaw nga nap'an ni nga ni moesiik mea yib beaq ko fa rea daraam. Nap'an ni chubeeg ma kea mus ni qiin bug i thiin ea bea yoeg. Qiin bug i thiin neam ea,

"Yuwaen teel ea qa ni piiluung yuwaen teel qoos,...
yuwaen teel ea qa ni piiluung yuwaen teel ea qoos..."

Ka rii mus ea qiin bug i thiin ni bea suul u dakean. Rii damuumuw ea qa ni piiluung yaa kea taamraq. Mea yoeg ni nga ni liiq fa rea moqon ni bea chubeeg fa rea daraam. Faqän ni koel fa rea moqon nga ni feek, ma ku dea tal fa rea daraam. Yigi qii chub i yaen ni dea tal,

"Yuwaen teel ea qa ni piiluung yuwaen teel ea qoos,...
yuwaen teel ea qa ni piiluung yuwaen teel ea qoos...
yuwaen teel ea qa ni piiluung yuwaen teel ea qoos..."
Fa pi thiin ni qii tooluul naag Soonqaelik nga taan qangean fa rea kea gaak'iy ea kea miit ko rean riy. Ka ni ngoongoliy ea daraam riy ma kea mus ea n'ean ni ra ni chubeeg ma bea yoeg.

Daa kii yog ni ngea k'aed-aen' ea qa ni piiluung ko taamraq mea miil ngea qaf nga m'uw rook' ngea miil. I miil ma daa kii suul mea yaen nga baang ni daa kii pat marungaqagean. Qa ni piiluung neam ea teel ea boed yuwaen teel ea qoos.

Qaram ma ni paag Soonqaelik ngea gäl labthir rook' nga ra suuloed nga tafearaed. Qii liiq fa rea piiluung choen ea puullug, yaa qii taamraq ni raa weeliy ba gayaed marungaqagean teel ni ba teel i qoos.