written by Bernard Yifteg
illustrated by Don Dougherty

Garbaaw ea ba miit ea gamanmaan ni daa qimmoey u Waqab kaakaroom. Baarkoow nu Portugal ea yib nga Waqab ni soomm' oon. Magid ma baarkoow nu Spanish. Ngiyaal' neam ma daariy beaq u Waqab ni ka qa guy reeb ea garbaaw biqid. Fin i n'uw nap'an boech ma ni baang miit ea garbaaw ni yuu reeb. Ku booqor ea duw ma fin i naang ca girdiiq lamean ea garbaaw.

Nap'an ea Spanish u Waqab, ni nap'an ni daawor i guy ea girdiiq ea garbaaw, mea yaen beaq ni ba moqon nga madaay. I yaen u faafat nga madaay. Yaen nga dakean ea qey mea yaen i tal ngea yoen' ea yiluuy. Yoen' ea yiluuy ko faafat rook' ' mea paer nga qii lum'eag. Rea moqon neam ea beaq qu baqa ni ngael ko naam nu Waqab. Ngiyaal' neam ma kea ganaawrug.

Nap'an ea ngiyaal' neam ni kea ganaawrug, ma baay ba baarkoow ni laay ni bea yib. Ba baarkoow nu Spanish ni yib u Maniileq. Yib ni kea feek ea garbaaw ni yuu reeb ni ka yaed ba fas. Ngiyaal' neam u Waqab ma baay tafean ea salthaaw ko Spanish u Colonia ni ka ni toey. (Fa rea malaang ni baay ea qaspiitaal u dakean kafraam ea qiir ea raam tafean ea salthaaw ko Spanish kaakaroom).

Qeree rea baarkoow ni ba qaram ni yib ea kea feek ea garbaaw ni languun ea salthaaw ni yaed baay u Colonia. Nap'an nu taaw nga charean ea naaq mea biliig reeb ea garbaaw ni pumoqon ea chuum rook' ngea qog nga madaay. Qog nga madaay mea noeng ngea leek ea naam i yaen. Yib ngea y ib i th'aeb ea naaq nga kii yib i qog nga maak'eef. Mea noeng i yib ko qey ko gi ni baay fa rea moqon riy ni bea lum'eag.

Ngiyaal' ni ba qaram ni bea lum'eag ea rea moqon neam ea ka ni chiichir yaal'. Ka rii chuguur ni ngea liith ea yaal'. Qeree bea känkaen raqën ea yaal' nga qawochean ea rea moqon neam. Daab i yog ni ngea guy ban'ean nga tanaaq ni ba feal' rogon. Faqän i chuguur garbaaw boech i yib mea noon.

"Mooooo..., mooooo..."

Ma rii faqtal fa rea moqon u dakean ea faatat. Daawor i rungaqag lunguun ban'ean biqid ni qaram rogon. Mea tartareag qawochean ngea lik'ath nga miit ea yaal' ko gi ni kea yib lunguun fa rea n' ean riy. Mea guy foen loelugean garbaaw nga dakean ea daay ni ba maath' ea daay u taan l'ugun. Mea gaqar u waen', "Moeg, maang ea raam u dakean ea daay, ba loelugean i piliis ma baay ea gaagey u loelugean. Moeg, maang ea kea yib ngoog?"

Mea paer qadow ngea lik'ath ni kea manaaw. Ma bea daqdaq gumiirachaqën ko marus ngea taamdaag. Ngiyaal' neam ma kea chuguur garbaaw. Mea far nga taban ea qey nga laang. Mea gaagyal ni gaathi ba qachiig. Mea noon ba yaay.

"Mooooooo..."

Mea chigar fa rea moqon ni kea ning ea marus laeniyaen'. Mea feek ea qeeg. Mea qeeg naag fa rea faafat ni tinoewey ni ka baay ea yiluuy riy u madaay. Kea niing ea marus laeniyaen'. Daa kii ngaang ni ngea teek ea yiluuy nga dakean ea faatat. Qeree k'aed geelngin ngea qeeg i qeeg naag fa rea faafat ni bea gireengiy fa rea yiluuy u madaay ea . . . ngea yib i sear-eeg ko binaew.

Ka rii qaaw parwon ko magaer. Chanea ngiyaal' neam ea daa kiir yib ngaen' ni kea magaer. Ka rii rus. I miil ni ba machiy. Yaen nga fidik' ea tabinaew ni bea tooluul naag ni kea yib ea moqöniyaen'.

Nap'an nii yib garbaaw ni taaw nga qarow, ba yugu raa m'uug nga reeb ea tabinaew, mea miil ea girdiiq riy nga naqun. Ma ni qän mit'an ea maab. Yugu raa m'uug ku beaq u kanaawoq, mea miil ea bi ney ngea yaen ni bea k'uul. Qeree wear thiin ni baay ba kaan ni bea deeraew u laan ea binaew. Goqo rus ea girdiiq ni daakuriy beaq ni yog ni cheal nga baang.

Garear thiin ngea madaq nga Doonguch ni baay ba kaan ni bea deeraew u laan binaew. Bea tuluf ea girdiiq, daakuriy beaq ni bea yog ni yaen nga baang. Qeree yaen qiin ea salthaaw ngea paedrey. Faqan raanoed ma ra pirqeg-eed ni ba garbaaw ea bea k'aring ea marus ko girdiiq. Qeree ra kunuy-eed ea girdiiq nga ra weeliy-eed marungaqagean ea garbaaw. Ma qaram ma fin i qaaw ea gapaes ko fa rea binaew. Qaram ma niib ni koel fa rea garbaaw nga ni teek nga Doonguch. Ma ni yaen ni taay ko ti ni ba qaram ni kea taaw u baarkoow Qaram ea garbaaw nii yib nga Waqab ni soomm'oon. I bang ba seebael u Waqab. Fin i qaram ea naang ea girdiiq nu Waqab qawochean ea garbaaw. Mea daa ku ni taamdaag ngaay, ma ni qun i languuy.