Kaakaroom ma qimmoey neel' i walaag ni pumoqon ni yaed ba taa fitaeq. Ba piireq miit ea fitaeq ni yaed ma naang rogon. Maachanea lum'eag ea daawor ra qun-eed ngaay ba yaay.

Qeree faqän i yaen i reeb ea rraan ni kaakadbuul mea yaed leam naag ni nga raanoed ko lume'ag. Qeree ra qabiich gaed nga ra muuq gaed. Ma yaed kunkunuy tataliin ea fitaeq rooraed ngea muuq ma yaed yaen.

Maachanea faqän ra taaw gaed nga l'aay ma raa ba gayaed ma gi ni ba qadaag ni ngea yaen i paer ngaay nga qii lum' eag.

Bi ni qilal ea changar mea guy ba booch. Mea gaqar, "Qahaa! I gaeg ea nga gu lum'eag u booch." Qeree qaaf ko fa rea booch ngea maeniy i yaen ko gi ni ba qadaag ni ngea lum'eag riy.

Ma bi ni magid ko bi ni qilal fa pi walaag ea changar mea guy ba foofot. Mea gaqar, "Qa yaakea! I gaeg ea nga gu waen ko lum'eag u foofot." Ma qa-ram mea qaaf ko fa rea foofot ngea yaen.

Ma bi ni dalip fa pi walaag ea chachangar u roem u dabp'ee l'aay. Mea guy boechii kea keel. Mea gaqar, "Ba qaram! Ba qaram ea gi ni nga gu waen gu paer ngaay nga gu lum'eag riy."

Qeree yaen i paer nga taan fa chii kea keel nga qii lum'eag.

Bi ni magid fa pi walaag ea kii changar mea guy ba rabaaq i malaang u dabp'ee qeey. Mea gaqar, "Qaay! Pii chaaq! I gaeg ea nga gu lum'eag u dakean ea rea ra baaq i malaang ni ba qaram" Mea yean ko fa rea rabaaq i malaang nga qii lum'eag.

Ma bi ni magid ko bi ni th'abii bitiir fa pi walaag ea changar mea guy ba waar u roem u dabp'ee l'aay. Mea gaqar, "Yaahuuw! I gaeg ea nga gu lum' eag u dakean ea waar. ' Qeree yaen i paer nga dakean fa rea rabaaq i waar nga qii lum' eag.

Qeree yaen i magëy ea qa ni bitiir ko fa pi walaag. Qeree paer nga qii changar naag baang ni ngea yaen i paer ngaay ngea lum'eag riy. Meqeree gaqar, "Baay gu lum'eag u lupuw." Qeree log nga lupuw nga qii lum'eag u roem.

Qeree qaram rogon ni ra ba ga yaed ma gi ni kea yoeg ni ngea lum'eag riy ea yaen i paer ngaay nga qii lum'eag Qu ra lum'eag gaed ea . . . ni ba n'uw nap'an ma yaed gubiin ni bea feal' waqathraed. Yugu yaed bea girngiy nga laang.

Maachanea faqän i taaw ko ngiyaal' ni nga ra suuloed nga tabinaew rooraed ma kea yib boechii magar ngooraed.

Mea gaqar ea bi ni qilal ko fa pi walaag, "Goeg ngoom, yugu ra ba gamaed ma gi ni yaen i paer ngaay nga qii fitaeq. Ma ra chey ni muul ba gamaed nga madaay ni lumoch ma daab ni naang." Qeree yigii paer ni kea rus. "Sanaa ka ba feal' ni nga gu thaqegmaed ko ka gamead neel' fa daangaay."

Yib i paag ea mathaqeg nga dakeanraed, "Ka gu guy ba ga yaed ni baay u dakean ea foofot. Bi ni taqareeb i walaageeg ea raam. Bi ni l'agruw ea ba qaram u taan e keel. Ma bi ni dalip ea ba qaram u dakean ca malaang u dabp'ee qeey. Bi ni qaningeeg ea ba qaram u dakean ea waar. Bi ni laal ea ba qaram u lupuw. Qiiyaaq tuw! Kea yaen ba gamaed ngaan?" Qeree rii paer ni ka ni kireeb-aen'. Ma kea pagtaliin ni ngea thaqeg qiir!

Mea gaqar ea bi ni baay u foofot fa pi walaag, Moeg n ga bea riyuul' ni ka n lumoch ba gadaed?" Qeree kii tabab i thaqegraed. "Beaq ea ba qaram u taan ea keel. Ma beaq ea ba qaram u dakean ea malaang u dabp'ee qeey. Beaq ea ba qaram u dakean ea waar. Beaq ea ba qaram u lupuw, ma beaq ea ba qaram u booch. Moeg ka n gu mus gaed qaraay? Qiiyaa tuw! Ka n gu rus. Qaram ea riyuul' ni kea yaen ba gamaed nga baang. Moeg maang ea raa riin' ea gäl labthir roomaed?" Ma qaram ma ka ni rus. Ma kea pagtaliin ni ngea thaqeg qiir!

Ngiyaal' neam ma qa ni magid ko gal ni qilal fa pi walaag ea kea rungaqag lunguun fa gäl ni qilal i walaagean. Qeree gaqar, "Mu soen gow nga ku gu guy u rooy." Qeree saak'iy u taan fa chii kea keel mea chachangar "Qa haa! Ba qaram ba gamaed u dakean ea malaang u dabp'ee qeey. Ma ba gamaad ea ba qaram u dakean ea waar. Ma ba gamaed ea ba qaram u booch, ma ba gamaed ea ba qaram u foofot. Qiiyaa, Qiiyaa tuw! Ri ba kireeb waqathdaed ea bi ni daqir ea rraan. Moeg maang faan ni gu baed ea nga raay, faan ea ngea lumoch ba gamaed?" Ma ka rii geel ea marus rook' kea pagtaliin ni ngea thaqeg qiir.

Qeree ku qer i taay ea dalip ni ba qaram i walaagraed ni ka baay. Ku ra thaqeg-eed yaed ma ka bea m'uug ni ri yaed laal. Ra ba gaa yaed ma bea pagtaliin ni ngea thaqeg qiir. Qeree u raanoed u roem u dabp'ee l'aay ni yaed bea changar naag ea bi ni ba qaram i walaagraed ni kea lumoch.

Nap'an ea ngiyaal' neam ni ka yaed bea magow ma kea yib boechii reeb ea pagäl. "Moeg-eed dapiy, maang ea kea buuch? Ri ba piireq ea niig ni ka mu koel-eed. Maachanea maang faan ni ka yugu mu paer-eed ni ba kireeb-an'meed. Kea buuch ban'ean u baang?"

Qeree gaqar ea bi ni qilal ko fa pi walaag, "Chiiney ea gaafgow tam, yaa chiiney ea ka gu muuq gaed ko fitaeq ma kea yaen ba gamaed nga baang. Gamaed neel' u gubiin ma chiiney ea n ka gamaed laal u gubiin.

Maa faqän nu changar fa chii pagäl ngooraed ma kea balyaang ngaen'. Yaa bea guyraed ni yaed neel'. Meqeree gaqar, "Maang ea gameed bea yoeg, ka n laal i gimeed ea ka baay? Quw rogon ni gameed bea mathaqeg?"

Mea gaqar fa bi ni qilal fa pi walaag ngaak, "Moeg qa mu guy." Mea yip paaq ngaak' fa ti ni walaagean, "Taqareeb, l'agruw, dalip, qaningeeg, laal! Gamaed neel' ni gu baed ea nga raay. Ma chiiney ea ka n gu mus gaed ni gamaed laal. Ri ba ki reeb waqathmaed ea bi Ni daqir ea rraan."

Qeree siminmin fa chii pagäl mea gaqar ngooraed, "Gu bea leam naag ni raa yog ni gu qayuweegmeed nga mu pirqeg-eed ea bi ni ba qer i walaagmeed ni kea yaen nga baang."

Mea gaqar fa bi ni qilal ko fa pi walaag, "Moeg n ga bea riyuul'?" Qaram ea weeniig, weeniig ngoom nga n mu qayuweegmaed." Qeree gaqar fa chii pagäl, "Kea feal" Me yoeg ngooraed ni nap'an nu raa dun'uf paaq ba ga yaed mea yoeg ea taqareeb, ma bi ni magid ea l'agruw, ma qaram rogon i yaen ngea madaq ko bi ni bitiir.

Qeree yib ko qa ni th'abii qilal ngeab i dun'uf paaq ni n ba mus geelngin. Mea tooluul fa bi ni qilal fa pi walaag."Taqareeb!" Maachanea ka rii qamiith paaq. Meqeree ku qer i taay fa ti ni ka baay ko fa pi walaag. "L'agruw! Dalip! Qaningeeg! Laal! Neel'! Qaa neel'!" Ma qurngin fa pi walaag ma yaed changar ngooraed ni ka ra falfal-aen gaed.

Ka ra falfal-aen' gaed. Yaed bea timqog nga laang ma yaed bea tooluul.

Ma yaed cheal ko fa chii pagäl nga qu ra pining-eed ea magaer ngaak' ni kea pirqeg ba ga yaed. Meqeree ra piiqeed fa pi niig ni k'oonraed ngaak' fa chii pagäl.

Qeree feek fa chii pagäl fa pi niig. Ma qaram mea yaen fa neel' i walaag nga taafearaed ni ka ra falfal-aen' gaed.