written by John M. Chingyan
illustrated by Starla Stone

Daay ea reeb ea ban'ean ni ba gaaq faan ngoodaed ea girdiiq u roey u faayleng. Ba yoqor ban'ean ni baay u fidik' ea daay ni ba gaaq faan ko yafas roodaed ea girdiiq. Ga ma naang ni ba yoqor yuu yaang i daay u roey u faayleng ko binaew? Qer rogon, daay ea th'abii yoqor. Qaningeeng yaang ea daay ni baay ni ba gaaq u roey u faayleng. Yuu yaang i daay ney ea ka noeg ea Atlantic, Pacific, Arctic ngea Indian ngaay.

Daay ea maa piiq ea ggaan ngoodaed. Ba yoqor ko l'agruw miraqay miit ban'ean nu madaay ni gadaeg maa fanaay. Baay boech ea falaay roodaed ni yi maa feek u madaay. Daay ea ku baang ea tagiil' ea gosgoos ni ba maenigil. Yi maa maeluk u madaay ma ku yi maa maleekaag u madaay.

Ri ba piireq miit ea yafas ni gopo baay u madaay. Boech ea ti ni th'abii gaaq ngea ti ni th'abii qachiichiig ea yafas u roey u faayleng ea maa paer u madaay. Buukum miit ea niig ni maa paer u fidik' ea daay. Ku qer rogon ea girdaan' ni ku ba piireq miit ni ku maa paer u madaay.

Maa tugul ea leem ngea l'aaw u madaay. Leem ngea l'aaw ea ri ku ba gaaq faan nga boech ea gamanmaan u fidik' ea daay. Ba piireq ea gamanmaan nu madaay ni yaed maa kaay ea leem ngea l'aaw.

 

 

 

 

 

 

Ga ma naang ko maang ea baay u t'aay ea reegur? T'aay ea reegur ea ku ba chuguur yaqan nga dakean ea binaew. Baay ea burey ngea ku yuu yaang ni ba pach ngea yuu yaang ni boed ea lawaay u t'aay ea reeguur ni ku baay ea malaang, girdaan' ngea niig riy.

Ma chanea ku baay yuu yaang ea daay ni ri ba tooqaer ni daar maa taaw raqen ea yaal' ngaay ni daariy ban'ean ni ba fas ni maa paer riy.

Daay ea ba budaey lamean, qiir ea ku yi maa ngoongoliy ea sool riy. Kaakaroom ea ba gaaq ni qu ni feek ea sool ko daay. Ma chineey ea yi maa feek ko yuu yaang ni ba qaraay ni qimmoey ea daay riy ma dakuriiy ea chinney.

Baay baang ea daay u roey u faayleng ni va rowrow ni faan ea baay noechii yafas riy ni ba rowrow raqen.

Baay yuu yaang ea daay u roey u faayleng ni ba tooqaer, ma chanea ku baay yuu yaang ni daathii ri ba tooqaer.

Ba thilthiil raqen ea daay u roey u faayleng. Ma chanea goqo ba gaaq ni ba yarraq raqen. Yuu yaang ni ba qaraay ni ba geel ea garbeab riy. Faan ea bi ney ea bachaan noechii gamanmaan ni ba galunglung raqen ni maa paer u fidik' ea daay.

L'agruw miit ea gireeng ko daay ni baay u faayleng. Faan ni maa gireeng ea daay bachaan ea nifeeng ngea mithmith ko faayleng.

Boech ea gireeng ko daay ea maa sum u dakean ea daay ma boech ea maa sum u fidik' ea daay fin i yib nga laang. Ba moqmaaw' ni yi maa guy ea gireeng ko daay.

Ma chanea yugu raa reeb ea gireeng ko daay ma raqen faayleng yaen. Gireeng ko daay ea qiir ea ku maa thilthiil ea yafaang ni bachaan.

Ba piireq miit ea niig ni maa paer ni ba chuchuguur nga dakean ea daay. Boech ea ti ni th'abii qachiichig ea gaak'iy ngea niig u roey u faayleng ea maa paer ni ba chuchuguur nga dakean ea daay.

Gubiin miit ea gamanmaan ni maa paer u madaay ea gopo ma pirqeg ea gegaan rook' u madaay. Nifeeng ni maa thow u dakean ea daay. Fan ni ma gaaq ea n'eew ea bachaan ea nifeeng ni maa thow ni ba geel.