written by John Chingyan
illustrated by Donald Buchholz

Qiir ea raay Keen. Keen ea boechii pagäl. Keen ea meereeb ea duw rook'. Keen ea maa paer u boechii doonguch. Ri ba feal' ea chii doonguch ku Keen ney. Keen ea ri ba qadaag ea tabinaew rook'.

Qiir ea raay Tinaeg. Tinaeg ea boechii buulyal. Tinaeg ea meeruk ea duw rook'. Tinaeg ea walaagean Keen. Tinaeg ngea Keen ea yow maa yaen nga sukuul.

Tinaeg ea baay boechii gaetuw rook'. Chii gaetuw rook' Tinaeg ney ea ka ba qachiichiig.

Chii gaetuw ney ea ba talimar. Tinaeg ea ri ba qadaag ea chii gaetuw ney. Tinaeg ngea gaetuw rook' ea yow maa faafeal.

Keen ea ku baay boechii kuus ni faak. Qiir ea raay Keen ngea kuus rook'. Kuumaa fithngaan ea kuus ku Keen. Kuumaa ea raa yog nu noeng. Keen ea ku raa yog ni ngea noeng.

Qiir ea raay Kuumaa ngea Keen ni yow bea maeluk. Kea yib Tinaeg i qun ngoorow ko maeluk. Keen ea ma naang rogon ea manoeng. Tinaeg ea ma naang rogon ea manoeng. Ku bea noeng Kuumaa. Gaetuw ku Tinaeg ea daar maa qun ko manoeng.

Qiir ea raay ea naqun ku Keen ngea Tinaeg. Rea naqun ney ea ri ba gaaq. Ku maa paer ea chiitinangin ngea chiitamangin Keen ngea Tinaeg ko rea naqun ney. Keen ngea Tinaeg ea yow ba qadaag ea rea naqun ney.

Chiitamangin Keen ngea Tinaeg ea maa yaen ko maruweel. Maa maruweel u milaey' Ri ba qadaag ea maruweel rook'. Chiitinangin Keen ngea Tinaeg ea ku maa maruweel. Maa seenseey u sukuul u Tooraaq. Ri ba qadaag ea maruweel rook'.

Qiir ea raay Keen ngea Tinaeg ni yow bea faafeal. Yow bea faafeal ko baat' rook' Keen. I Keen ea bea miil. Ku qer rogon Tinaeg ni ku bea miil. Keen ngea Tinaeg ea yow bea miil. Keen ngea Tinaeg ea yow ba qadaag ea faafeal.

Bea faafeal Keen ko baat' rook'. Tinaeg ea daariy ea baat' rook'. Machanea baay ea naawaa rook'. Tinaeg ea bea faafeal ko naawaa rook'. Ga bea guy fa chii gaetuw ku Tinaeg? Maang ea bea riin?

Bea miil Tinaeg. Bea l'oel'oeg ea gaetuw rook'. Gaetuw ku Tinaeg ea bea yoer. Ri bea miil Tinaeg ni ri ba paapëy. Baay quw ea gaetuw ku Tinaeg?

Kea pirqeg Keen fa rea gaetuw. Ga ma naang ko pirqeg u quw? I pirqeg Keen fa rea gaetuw u laen ba duug. Ka rii falfal-aen' Tinaeg ni ka ni pirqeg ea gaetuw rook'.

Gaetuw ku Tinaeg ea raa yog nii miil. Qa mu guy ea gaetuw ku Tinaeg ni kea miil i yib ku Tinaeg.

Kea feek Tinaeg fa rea gaetuw rook'. Qa mu guy fa rea gaetuw ni baay u paaq Tinaeg. Ri ba taa qayuweeg Tinaeg ea gaetuw rook'.

Keen ea ba taa maruweel. Ba taa qayuweeg ea chiitamangin ko maruweel. Keen ea bea maruweel u milaey' ea chiiney. Bea thuum' p'aaw u milaey'. Ba piireq ea p'aaw ni kea th'aeb.

Qa mu guy Tinaeg ni bea feek ea duug. Bea gaqar ku Keen, "Keen, weeniig ngoom mu piiq ba yael' ea p'aaw ngoog nga gu taay nga duug roog."

Kea piiq Keen boech ea p'aaw ni ba piireq ku Tinaeg. Ka rii sug ea duug ku Tinaeg ko p'aaw. Mea gaqar Tinaeg ku Keen, "Keen, ka mu magaer ma kea yog yaa kea sug fa rea duug."

Bea yaen Tinaeg nga tafean ea tiitaew rook'. Kea feek l'agruw yael' ea p'aaw ni ngea languy tiitaew. Tinaeg ea ri ba qadaag dakean ea tiitaew rook'. Ba taa qayuweeg ko maruweel.

Bea pining Tinaeg Keen ni nga raanow nga sukuul. Bea yoeg Keen ku Tinaeg ni daab i paag taliin ni ngea teek ea baabyor ngea piinsal rook'.

Bea yaen Keen nga sukuul. Ku qer rogon Tinaeg. Ku bea yaen nga sukuul. Gaetuw ku Tinaeg ea bea qun ngoorow ko yaen. Moeg, raa yog nii qun nga sukuul?

Tinaeg ea baay ea baabiyor rook'. Baay boechi kea baabiyor rook' ni ba qachiichiig.

Bea dag Tinaeg ea baabiyor rook' ngaak' Keen.

Keen ea ma naang rogon i biqeg ea baabiyor.

Qa mu guy Keen ni bea yoel nga blackboard. Keen ea bea yoeloey fithngaan nga blackboard.

Bea yoeloey Keen ea chiiney yaqan ba kea niiw. Keen ea ri ba qadaag ni maa yoeloey yaqan ban'ean.

Mea guur, raa yog ni mu yoeloey yaqan ban'ean?

Tinaeg ea ku ba qadaag ea sukuul. Maa yaen nga sukuul ni gubiin ea rraan. Ba piireq ea fagear rook' Tinaeg ni yaed maa qun nga sukuul.