skip to main contentskip to main contentPREL Logo
PREL Logo
PREL Logo      
PDF version (132k)

Ye Sa Shiuwe Lago
Mele We Kamelali
Shaliu We

Picture

translated by Augustin Uolai
illustrated by Carrie Shiramizu

Picture

Ye logo semaliu shoabuto le ye toaro fitiyale nge ye tai bale yoro laiule mwaale. Ye gale semaliu sheogiu sarishoabuto mele laiule. Re geffageo iiye shoabuto we me mele we laiule. Ye tai gale yogo gelaare be iiye sarishoabuto we nge ye shiuweli sari. Ye siubu togo iiye sari we nge ye sa tugofai mele we sine. Ye sa mouse shimwele nge ye sa beragiureogiu metale. Ye sa gale nngawe lago shagiu tipeli iiye tugofai we. Ye sa gale gabele me ye bale lifeishigi tefaali.

Picture

Ye tau gale seoriu lago shagiu be, "Fari gabele me i fari lifeishigi tefaali." Iwe ngo serane nge ye sa rongorongo kapetali seewe shaaliu le ye logo liuweniu waliuweliu le shoabuto tugofai me mwaale tugofai re be buulongo tiutiu iyange nge re gale tarimwaale me lifeishigi tefaali. Mele we shagiu nge tugofai we ye sa faseongiu sari we laiule re sa lago be shoali ffagili iiye shaliu we. Ye ssiuyelai yaare faaragi be ye ttaawe iiye shaliu we.

Sari we ye sa gassiya mele we sine be, "Iiya mele si ya nenago iyange?" Iwe nge iiye tugofai we ye sa gaaingeli be, "Si be lago reeli seewe shaaliu." Ye tai gaaingeli mele we laiule kofali iiye shaliu we be meni ye be galiuwa reeli iga ye be la lifeishigi tefaali. Re sa lago yee re la buutogo reeli iiye shaliu we. Gaasefaliuwe iiye shaliu we be ye sseogiu floorasi ngashele le ye tabaaliyeliiye lago. Re gola togo shagiu iiye shaliu we nge tugofai we ye sa gaaingeli mele we laiule be, "Wetiyei sheogiu igeiye be i be lago igaale nge i sa tefaali."

Picture

Ye sa lago ye sa lago mmwuso longo lani iiye shaliu we. Ye sa biitiwe ili fetale lano nge ye la pwa tage. Ye sa yafe ngali ngasheli shaliu we nge ye sa lifeishigi tefaali lago. Ye sa biitage me lani shaliu we ye sa rigi lago reeli mele we laiule. Ye sa gaaingeli be, "Piipiyei lai. Go tai tipeli mele ulunu iye i sa lifeishigi tefaali?" Iwe nge iiye mele we laiule ye sa fale ngali nge ye tai feffase. Ye sa gassiya mele we laiule be, "Go taai giulayai lago? Mele we laiule ye sa fale ngali nge ye iushiugiu mele we shimwele.

Picture

Mele we sini sari we ye sa seoriu be, "Buutogo lai be si bele biitiwe reeli mele we imwashe." Iwe nge iiye mele we laiule ye tamweshali be ye seoriu sheogiu be, "Gaangiu i tewai taboogo be i be weti sheogiu mele we silei." Shoabuto we ye sa kepate ngali me kepate ngali sari we nge iiye iwe ye seoriu sheogiu be ye tai iiye mele we sine.

Picture

Shoabuto we ye sa faaragi ngali sari we be ye be gasi nge sari we ye rigi tangi. Ye sa seoriu iiye sari we be, "Tai geele mele silei. Mele we silei iwe ye sa tugofai nge geele imwu go shiuweli lifeishigi." Ye sa rigi lago peigili shaliu we me peigi we sepeigi ye sa la tangi lago shagiu me iyange.

Picture

Iwe iiye mele we sine ye sa bale niutu longo lani iiye shaliu we. Ye sa buulongo tuulongo fetale yee ye bale lago tugofai lago. Iwe nge ye sa lago reeli sari we laiule nge ye sa gaaingeli be, "Gaangiu iye." Mele we laiule ye sa mmwuso ngali ye sa buutogo gemwashiu lago. Iwe nge mele we sine ye mwaashiu giula be ye toaro pilaali yaali semaliu tugofai gare metta nge laiure ila re geshangiire shagiu.

Picture

Picture

Yato la shagiu nge ye sa shiuwe lago mele we kamelali iiye shaliu we be mele we kapetale iwe semaliu nge ye be taali seewe shagiu yale tuulongo iyange. Re sa ligiti iiye shaliu we nge ye taai yoro lago mele we semaliu le ye be tuulongo lani shaliu we nge ye pwale tarimwaale gare lifeishigi tefaali. Geraamwo semaliu tugofai kawe re sa ssogosogo ye be tuulongo lani shaliu we le ye be la pwa tage nge ye taai saari tefaali be ye sa tappi we shagiu gare ye fari tugofai lago seokiute.