PDF version (132k)

Picture

retold by Joseph Yarofaisaf
illustrated by Karen Furuya

Picture

Ye logo semaliu shoali chuwaai me seewe tangki laiule. Re gale lago kesaisei fetale woali ilegili gapilamwoli faliuwe we. Re gale gake fetale pitegi be yaare chuwaai. Faali gasseewe nge ye gale fange mengaagu me usouso be yaale chuwaai nge faali gasseewe nge faiuli waliuweliu me uwaale mele ye gale gasi be yaale chuwaai. Ye meni shagiu ye be yogo ngali selaapiye.

Serane nge ye sa rongorongo be yoro gasiige le re sa chuchuwaai me reeli seewe gapilamwo kawe ye garepe ngali taati le ye ppale paliuwale.

"Ye be toulape selaapiye le ye be yogo ngaliyei iga i be gake gasiige nge i sa la chuwaai ngaliire shoali gapilamwo ka liuweniu taiite," yaale niuniuwane mwaale we iga iiye me tangki we laiule re sa lago be re bele lago gake gasiige.

Iga ye ppale paliuweni gasiige we iwe ye gachiu lepali mele re gasi. Ye sa iseli longo lani tuutu ye sa gawolo tage woali tagiuriuli tangki we re sa faaragi. Ilegili faurumile nge ye gachiu lago shagiu woali yaare nagolago. Mwaale we ye sa gamwele gachiuwe yaale peppaali lago tangki we sebiuleiu le ye mmisi, ngasheli seewe melaiuliuliu nge ye mmiti shagiu pesheeli tangki we buulongo piungiu lani melaiuliuliu we.

Igawe tangki we ye sa buulongo tapiungiu fetale lani shaliu we nge gasiige we ye sa piuppiuliu lago. Ye sa lago mile tiwe shagiu peoli tuutu kawe be ye taai yoro faurumile iyange. Ye sa ppale iwe tangki ye sa kere be ye taai chou.

Mwaale we ye bale mangiiye be ye pwale lago chuwaaiiye semeoiu gasiige we. Ye bale tapili shagiu faaragi we yaare metaammwowe. Tangki we ye sa giula mele we ye gale masheragi iyange iga ye gale piungiu longo lecheoliu. Re gola togo shagiu biuleiu gawe nge tangki we ye bale gammiti shagiu pesheele nge ye bale buulongo piungiu lani shaliu we. Ye sa buulongo gemmwai fetale yee ye piulo lago gasiige we nge ye mwaashiu teotage.

Mwaale we ye sa saro ssoongo. Ye sa faali ruwouwe yaare lago gake gasiige nge seewe mwo nge ye tai ipate iyange. Ye sa giula be tangki we ye gekatefati. Ye sa mangi fetaleeye mele ye pwale gatefati ngali tangki we.

Re sa bale lago yee biuleoiu gawe re gale gake gasiige me iyang. Mwaale we ye taai chuwaai gasiige be ye sa chuwaai farewa. Ye sa gaauteli ngali tuutu ye sa iseli tage woali tagiuriuli maliu we, nge maliu we ye sa kere.

"Tuutu kaale ika ye pale," yaale niuniuwane tangki we, "gai, be gola lago biuleiu gawe nge ye bele ilegili pale lago." Ye tai ssiuyelai nge re bale gola togo biuleiu gawe. Re togo togo shagiu nge tangki we ye bale gashee longo lani shaliu we. Ye sa bale buulongo tapiungiu fetale nge ye gammwai fetale be ye be shaliu lago mwo gasiige we. Meiya, ye tai fari shaliu lago be farewa kawe iwe ye sa ssogiu lagoli shaaliu, iwe ye sa chechau lago.

"Metta mele ye sa weli?" yaale niuniuwame tangki we igawe ye sa meyafi be ye sa chechau lago tuutu kawe.

"Yooro mele ye sa tere nge i tegiula," yaale seoriu tangki we. Nge ila mele we ye sa sesseigegi lago faali shaaliu. "Tepangiyei, mwarei, tepangiyei! Mwaale we ye yange tiweeye shagiu taiuwe tage me lani shaliu we.

"Si bele lago nimwe, gare?" Mwaliyeli mwaale we igawe ye sa pepaali lago tangki we liuweniu taiite.

"Iga ye sa iyeele lepali mele gasiyei be ye sa fisheli ruwouwe be ye sa pilaai." Yaale niuniuwane tangki we igawe ye sa mwimwiriiye lago mwaale we.

Picture