PDF version (204k)

Picture

text by Joseph Yarofaisaf
illustrations by Carrie Shiramizu

Picture

Semaliu tarimwaale iwe ye nogologo woali seewe faliuwe.

Ye logo seewe giuse le mareyareli iiye tarimwaale we. Ilegili sorale nge ye gale biitiwe tiutiu letteti nge ye gamwongoowe iiye giuse we mareyarele. Re sa logo yee lago temwai lago mele we tamweoniu iiye faliuwe we. Iwe nge ye sa gaaingeli tarimwaale we laiule be ye be la liire lago mwaale me woali faliuwe we. Ye toaro semaliu le ye be ligiti.

Picture

Picture

Iiye tmweoliu we ye tai tipale le ye be la mase nge semaliu ye lago fitiyeli shoabuto we fitiyale. Ila faale mele ye sa gaaingeli tirmwaale we laiule be ye be la liire lago ilegiire mwaale me woali iiye faliuwe we iyange.

Iwe tarimwaale we laiule ye sa gasi gobai we laiuli mele we temale ye sa lago shiitage yaale fitegi me taboli faliuwe we setabo.

Picture

Ye sa fitegi fitegi yee ye la gola lugalepali faliuwe we nge ye sa uwele yaalo.

Picture

Iwe gaale we ye sa kaseoseo sekiute yee nge ye bale fitegi ye sa lago. Ye sa laago laago yee ye la gola taboli faliuwe we setabo nge re sa rete mwaale me woali faliuwe we.

Picture

Picture

Ye sa lago mile tiwe shagiu tarimwaale we mareyareli giuse. Iiye mele we laiuli tamweoliu ye be yatte ngali be ye be tile yaale tou ngali iiye gobai we nge iiye mele we mareyareli giuse ye yatte waiu sekiute letteti.

Re sa buuweiu buuweiu yee re la logo lago letteti. Mele we ye sa ngefa lago faali iwe seewe iiye gobai we be ye bele tou ngali mauweshe we nge ye sa buutogo iiye giuse we mareyarele. Ye buutogo shagiu nge ye buutogo taapilipiliiye lago mele we laiuli tamweoliu. Ye sa gemabu yee ye mase.
Iwe iiye tarimwaale we mareyareli giuse mele ye sa minago be tamweoniu waoli iiye faliuwe we.

Picture