pageok
PDF version (118k)

Semaliu Sarishoabuto
Me Seewe Bachiili
Miiniki

Picture

retold by Tino Uolai
illustrated by Joy Goodenow

Semaliu Sarishoabuto Me Seew Bachiili Miiniki

Semaliu sarishoabuto iwe serane nge ye sa lago stoowa be ye be lago chuwaaiiye seewe bachiili miiniki. Iiye bachi we yooro miiniki iyange iwe ye fato woali ungeli mele we shimwele. Ye feffaaragi lago nge iiye maliu mmangimengi.

"I be chuwaaiiye miiniki yeele nge ye bele yoro selaapiye le ye be yogo ngaliyei nge i sa chuwaai toulape siugiuniuliu maliugeo," yale niniwaneeye. "I bele gasini nge i sa lago gawoloni longo faali ubeli maliugeo shoabuto we be ye be wolopini nge ye be lago gattewa nge ila ye bele toulape maliugeo le i be gasi be yaai chuwaai stoowa. Yato la nge ye bele chau paliuweli maliugeo ila ye bele toulape selaapiye le ye be yogo ngaliyei nge i bele chuwaaiiye seewe mengaagu ffeo be mengaagu."

"Ye be ifa tiuleli mengaagu la i be chuwaaiiye," yale niniwaneeye. Mali ye be gaarawerawe. Ye be tiuleli sheoliu waliuweliu. Ila mele ye be gachiu woai. Ye be bale gauweliuwe ngashele. I be gale mengaagu reeli guubulo kaale nge tarimwaale ila re bele tipeli sheogiu be re be gale uru ngaliyei.

Picture

Picture

"Gaangiu i be gale gemasiyei lago shagiu," iiye shagiu yale seoriu. "I be gale iushiugiu sheogiu shimwei nge i faaragi lago, geraamwo me re geffaalipeshe."

Ila mele we ye niniwaneeye shagiu iiye mele we nge ye sa iushiugiu mele we shimwele.

Ye sa maliuwegili lago be ye fato seewe bachiili miiniki woali mele we shimwele. Ye tagunu sheogiu geele bachi biitiwe ppiungiu lani yenape we. Ye sa sere lago lani yenape we geele miiniki.

Ye sa lishi lago. "Mengaagu kemwatiyetiye we mengaagu! Maliugeo kawe! Siugiuniu kawe! Miiniki we!"

Picture

Ye meele fetale nge ye taai mmwele be ye sa sere lago miiniki we. Ye taai yoro mele ye be lago chuwaaiiye lani stoowa. Ye gasi sheogiu peoliu bachi we yaale nge ye tefaali lago nibugotale.