Semaliu
Mwoongki Me
Riuwemaliu Gelaagu
translated
by Augustin Uolai
illustrated by Verne Miner
Ruwouwe gelaagu iwe re la faaragi fetale yee
re la weri riuwagofeti fitugoli karebau me faali sefoasho waliuweliu.
Iwe re sa buutogo gekashoosho fengani me
faali waliuweliu we. Semaliu iire nge ye seoriu be ye be gangi
gofetili we ye saro farigiti.
Re sa gekashoosho fengani me faali waliuweliu
we yee yare biitage geshaabula fenganiiye be re sa fitegi. Re
sa ligiti lago mwo gofetili fitugo kawe be re sa fiffitegi mwo.
Re shiuweli fiffitegi faali waliuweliu we
nge gaale we mwoongki ye sa la buutogo. Ye sa buutogo siu lago
me yarooro.
Ye sa buutogo gassiyaare gare metta mele
re fiffitegi iyange. Iwe nge gelaagu kawe re sa gaaingeli be
re fiffitegi le ye be gangi gofetili fitugo la ye saro farigiti.
Iwe shagiu nge mwoongki ye sa gaaingeliire
be re be weti be ye bele foori ngaliire mele kawe gelaare. Mwaale
ye sa buutogo gasi seewe faiuliugechau nge ye sa ssibe ngali
fitugo kawe. Gelaagu kawe re taai fitegi be re sa piipiiye gaale
we mwoongki.
Iwe nge iiye mwoongki we ye sa gasi iiye
gofetili fitugo kawe ye sa buutogo iselini tage wolai faiuliugechau
we. Segofeti nge woali setabo iiye faiuliu-gechau we. Ila
mele we ye sa buutogo gechaunu.
Mwaale we mwoongki ye sa buutogo piipiiye
nge ye saro chau segofeti iiye fitugo kawe. Ye gasi mele we
ye chau nge ye sa buutogo ngaringeri me iyange.
Ye la mano yale ngaringeri me iyange nge
ye bale gatefaali tage woali iiye gechau we. Ye sa buutogo piipiini
fitugo kawe nge ye sa ppale iwe ye sa ngaringeri me iyange.
Iwe shagiu nge mwaale ye buutogo gasi iwe
ye sa chau nge ye sa bale buutogo ngaringeri me iyange. Ye mano
nge ye gatefaali tage woali faiuliugechau we nge ye sa bale
chau lago iwe seewe.
Mele we ye foffoorini mele kawe nge gelaagu
kawe iwe re sa siu sheogiu re sa ppiipiiye.
Ye sa iwe shagiu ssengali yale nngaringeri
me reeli fitugo kawe nge ye gekechaunu. Ye sa iwe shagiu yee
ye la garetani lago fitugo kawe reeli yaale gangini.
Ye rete lago shagiu fitugo kawe nge mwaale
ye sa nange le ye sa rigi ngali shapili waliuweliu we. Gelaagu
kawe re la giula be ye tai yoro lago fitugo kawe nge mwoongki
iwe ye sa ssiuyelai sheogiu yale logo shiuliu waliuweliu we.