PDF version (232k)

Sari We Mena
Bisissine Ye Gangewa

Picture

written by Joseph Yarofaisaf
illustrated by Deby Nakamura

Picture

Faali seew nge re logo riuwemaliu shoabut iwe re bisibisi. Semaliu iire nge semaliu laiule sari shoabute le re tare seewe shagiu.

Re sa logo yee fitouwe lago raagi nge ye temwaai lago mele we ye tugofaiiye. Iwe nge ye sa gaaingeli mele we bisile be ye be gefaniiy shagiu sari we laiule Ye te wai ngaw ngali.

Ye tai ssiuyelai nge ye mase shoabuto we. Ye sa lago mile tiwe shagiu sari we laiule Iwe nge mena temale nge. ye tai bale logo be ye tabeey wali waiye nge ye taai tefaali. Iiye shoabuto we ye shiuweli melawe iwe ye mase shagiu shoabuto we sini sari we nge iiye ye gangewa lago sari we.

Ye sa gale kiuleo masowa shagiu sari we laiule mase. Iwe nge ye tai gale gakiuleowe mele we laiule Iiye mwo nge ye taai bale yengaange. Ye sa ilegili faurumile nge sari we shagiu mele ye foffoori. Iwe nge re be mwongo nge re gale ganeey shagiu sari we laiuli mase mele kawe ye nngaw be ganne. Gini bulage me shiuli iige me ilegili mele ka iire re gangewa.

Sari we iwe ye sa pwate tiwe shagiu, be igawe ye ngawe gane nge ye chau yaale yengaang.

Picture

Ye sa ilegili fegaafile iga re be masiuriu lago shoabuto we me mele we fitiyale me sar we laiure, iwe nge mauweshe we ye bele yoo lago nge ye buuweiu reeli peiyeli mele we sine.

Ye bele lago shagiu masiuriu woali peiye we ye nisoro nge ye mwaashiu gale tefaali togo. Ye sa iwe shagiu ssengale ye seewe sorale nge shoabuto we ye ttirili mmate nge ye weri sari we be ye mwaashiu lago buutogo.

Picture

Picture

"Iya mele go sa lago buutogo me iyang?" Mwaliyeli shoabuto we. "I buutogo me weli peiye." Mwaliyeli sari shoabuto we. "Metta go lago ffori? Go liuwaneey be go be gemalewa tage mena silemwu me reeli mase?"

Sari we ye taai mwaliyeli ye be ye sa ganiugiu lago shagiu. "Go lago itiiti tage shaaliu be sariye laii ye be tiutiu." Mwaliyeli shoabuto we. "Iwe nge go sa lago gabeshibeshi mele kawe galemaami."

Sari we ye sa lago foorini mele kawe shoabuto we ye gaaingli ye mano nge ye buutogo be ye be kaseoseo mwo sekiute.

"Go lago gasi seewe shiugiu be yaamwu nge go sa lago nibeliu tiwe galemaami be iye ye tewaai yoro mwongooli raaleiiye me fegaafeiiye." Mwaliyeli shoabuto we.

Picture

Mauweshe we ye sa lago nibeliu yee ye tefaali nge shoabuto we ye sa gaaingeli be ye be lago saagi nge ye sa gameotta. Ye teit bale mano mwo iwe nge ye sa bale gaaingeli be:

"Go lago gasi fitoowe shoo be yamwu yareongiu be go be yareongiuwe. Iwe nge gosa gaturugo be ye te buutogo shagiu mwaale we fitiyei nge ye toaro gane." Mwaliyeli shoabuto we.

Picture

Picture

Mauwesh we ye sa ffori fetale mwongo kawe nge ye sa nngaw lago shagiu tipale. Nge shoabuto we me mele we laiule iwe re sa masiuriu be re tai tepangi mauweshe we.

Sari we ye sa ffori fetale mele kawe yee ye bongi nge ye buuweiu reeli peiye we yaale. Ye sa buuweiu shagiu logo iyang yee ye taiuwate.

Shoabuto we sini sari we, mele we ye sa mase iwe ilegili mele kawe mele we bisile ye foffori ngali mele we laiule nge ye giula. Bongile we nge mele we ngeone ye buutogo reeli sari we.

"Mauweshe lai," mwaliyeli ngeoliu we. "Metta mele mena bisissileomwu ye sa foori ngaliugo mauwesh? Ye taai gekanogo gelamwu imwu go sa pwate?"

"Be metta, ye gale ganeeyai galai." Mwaliyeli sari we. "Yamwu gatige," mwaliyeli ngeoliu we. "Go tagiula be ye nngaw iga si gale rutu, Gaaingeliyei, meeta mele ka ye foori ngaliugo?"

Sari we ye sa gaaingeli ngeoliu we ilegili mele kawe mele we bisissine ye foori ngali. Toaro mwo sekiute me iyang le ye tai seoriu.

"Mauweshe lai," mwaliyeli ngeoliu we. "Go tewaai tefaali ngaliire shoa kelaale. Go bele logo shagiu igeiiye. Si bele gasiuwe seewe imwe be imwomwu.

Ila mele we sari we ye taai tefaali be ye sa logo lago buuleiu gawe. Mele we bisissine me mele we fitiyale iwe re sa gemasi be ye sa mase iwe re taai gefa-niiye lago.

Picture

Picture

Bongile we shagiu nge ngeoliu we ye sa lago ffagi mwongo ye sa buutogo gmweoteo. Ye mano nge ye buuweiu liugiu-li faliuwe we buuweiu torofi semaliu iige nge ye buulongo gameota. Ye meoto nge ye buutogo gamwongoowe sari we laiule.

Re sa logo wetaaboli faliuwe we. Ngeoliu we iwe ye be bongi nge ye buutogo, iwe nge ye be leteoiuwate nge ye tai gale logo be ye gale lago logo fetale liuweniure wechiyane yaliusiu.

Ye sa iwe shagiu nge sari we ye sa weey shagiu bongoli galebaasi kawe reeli yaale tirili farigiti lago nge gassefa-liuwe mele we kemwatiyeliyale. Iwe nge ye sa yangegachiu reeli matemetali mele ka yaare yengaang shoabuto.

Ye sa ila shagiu yangetali sari shoabuto we iwe teoriu shagiu. Ye be mano shagiu sepeo nge ye shouuwe tage sepeo. Imwe we imwale iwe ye sa seogiuli teoriu.

Picture

Shoabuto we semaliu me mele we fitiyale me sari we laiure iwe re sa geffageo lago. Shoabuto we iwe ye sa gatemwaaiu iwe ye tai gale feffaragi fetale.

Mele we laiure iwe ye gaagu keshi. Ye tau gepaliuweliire mele kawe we ssine me wettemale. Ye tagiula fforili mwongo ye tagiula yengaang ka yaare shoabuto.

Mwirili shagiu sari we iga ye ligitiire tiwe nge ye nngaw lago gelaare. Mele kawe beliure nge ye sa teo lago faali waliuweliu be ye toaro le ye gekamwele.

Picture

Picture

Re sa logo nge tamweoliu we ye sa seoriu be re bele uru shoabuto be tarim-waale we laiule ye be ffagi fitiyale.

Re sa uru ilegiire shoabutoli faliuwe we. Maliu gaagu we iwe ye bale tabeey uru. Ye gale gaaingeliire shoabuto kawe wechiyane be re tewai getoalepa weliuweere be ila ye tiwegili shagiu be iiye mele tarimwaale we ye be gasi be fitiyale.

Iga we re sa uruuru shoabuteli faliuwe we nge shoabuto we me mele we laiule iwe re tai gale tabeey be iire re gale gekabung shagiu me reeli imwe we imweere.

Tarimwaale we laiuli tamweoliu iwe ye tai gale lago yengagi. Ye gale lago shagiu fita. Nge gare ye taai lago fita iwe nge ye sa masiuriu. Ye tai gale mweshali lago pipiiye uru we.

Rane we serane nge re sa seoriu be ye bele gapulaafi uru we nibongi. Ila mele we semaliu nge ye ffori weliuwale. Ye sa weey shagiu metta kawe be semaliu nge ye gateoreongiuwe fforili weliuweli laiule.

Ngeoliu we iwe ye bale teoreongiu fetale iiye reeli fforili weliuweli sari we laiule Re tai buulong liuweniu yaremate be iire iwe re ffoori shagiu me wettaboli faliuwe we.

Picture

Re sa logo yee bongi lago Shoali uru we re sa ttali lago lani melaale we nge ye mwashiu lago buutogo shoabuto we me sari we laiule Yaremate re taweri mele we sini sari we be igawe yaliusiu. Shoabuto we ye gasi long sari we laiule ye sa buulong gasiuwe lago me wenugale-pali uru we. Re sa lago siu seewe me mele we bisiile.

"Youwa iwe semaliu yaremetali iwe imwu si mwaashiu weri." Mwaliyeere shoali yengagi kawe. "Yoaiu, yee ye te feteey mwo kemwatiyetiyeli laiuli iteoiu imwu si tei fasiuli weweri."

Picture

Nge re sa buutogo gemwaliya uru we nge ye sa lago yeek gasefaliuwe be yare-mate re taai yengagiliire shoali uru we be ye sa shoabuto we shagiu mele re sa yengagili.

Picture

Gera mwo me go logoileete laale nge go bele giula shagiu be yore mele ye sa weli reeli gekebate we be ye taai mwele be tarimwaale re seelo nge re geshaabulo.

Tarimwaale we iwe ye logo reeli imwe we imwale nge ye sa giula shagiu be yoro mele ye sa weli. "I bele lago mwo pipiiye be gare metta mele ye sa weli iye ye sa iyele ssengali gekebate yeele." Yaale niuniuwane tarimwaale we.

Ye sa faragi faragi yee buutogo siu lago. Nge ye lago fanago woali shoabuto we. "I laale mele re sa gebate shagiu yaremate iyange. Geramwo me itegiula le laiule menaale nge i bele lago gasi be fitiyei be ila semaliu shoabuto kemwati-yetiye."

Ila mele we ye buulong shagiu buulong gasi lago shoabuto we me woali uru we. Tamweoliu we temali tarimwaale we ye sa ilegili keere gemase. Ye sa gaaingeliire yaremate be re tewaai uru bongile we be re bele magi lago masiuriu be re to chau nge ila yo be nisoro shagiu nge giubulo be gubuleli tarimwaale we laiule be ye sa yoro fitiyale.

Mauweshe we semaliu iwe yo teit karep mwo nge ye sa garongo fetale be iiye mele yo be fitiyeli tarimwaale we iwe yo sa gapela lago. Yo toaro shagiu le ye fiti yeli yo tugofaiye lago.

Picture

Tarimwaale we iwe yo sa kere be ye gachiu mele we fitiyale. Iwe nge yaliusiu we sileere iwe faali gassewe nge yo gale buutugo yo mwariire. Re sa logo lago yo sa toulap lago laiuro sari iwe semeoiu re sa buuweiu loogo reeli mele we imweli shoabuto we.

Picture