written by Joseph Yarofaisaf
illustrated by Roschana

Ye siu neye lago shagiu me liuweniure shoali uru we. Fifi yaale kemwatiyetiye le si ya gaweewe ngali sheogiu laiuli yaliusiu. File gachiule me wegitegile le re sa fato lago shoali yengagi reele le sa iiye shagiu mele re yengagili. Shoabuto re gabele be laiure nge tarimwaale re gabele be fitiyeere.

Yaremate re tai fasiuli wewweri be shoabuto la ye faamwali ye tai fasiuli gekefaaragi fetaleeye. Raaleiye nge ilegiire yaremetali faliuwe yeele re sa yatiu nngawe lago iga re mwaashiu weri shoabuto kemwatiyetiye yeele.

Welimmweli iga ye be gauweliuwe uru yeele raneele nge shoabuto we ye gale gauru sheogiu shoabuto ye laiule niimwe. Nigetame mwo nge re tai bale uru iyange be meni sheogiu yaremate re te weri sari we. Ye sa fasiuli gale felaiungeli ulunili raneele.

Yaremate re weri sheogiu nge re sa giula be ye sa felaiu gachiu reeli mele we pepeikile woali uru we. Pangali yaremate nge re sa yaleyale ngali sheogiu welibuuwe.

Ila shagiu mele ye nngawe me iyange ila toaro le ye giula mele ye mase mena sipegili sine iyange. Shoabuto ye ye sa mile be sine ye lago weri nge ye sa fasiuli mase mena sine le ye sa ssiuyelai. Iwe nge yatola nge sari yeele ye shiuweli chiile le ye bele mwaashiu seewe me setabo ragile. Iwe nge igela ila ye sa tugofaiye be ila ye bele mmwele be ye be fitiyetiye.

Shoabuto ye ye sa logo be sine igela ila ye tefaali me nibeoliu serane nge ye sa mangiiye be ye bele lago mwo piipiiye mele ye sa tangii lago shagiu semaliu sari iyange. Iiye sari yeele ila ye sa ssiuyelai gemase yale tangi be ye bele tagou riuweige bongili yale tangi lago shagiu. Iwe nge ye toaro shagiu le ye liuwaneeye be ye be lago mwo piipiiye.

Mena ye weri me lani imwe we ila ye meele shagiu be ye be piungiu reeli yale roshorosho. Iwe nge yagile shagiu be iga ye kaile tipale iwe ye tai piungiu.

Iiye sari ye ye ttangitengi ila ye gekerage taitiwegili fetale lani imwe yeele. Mele we sine iwe ye wolo be ye sa mase le ye sa ssiuyelai. Ssiuyelaili yale mase shoabuto yeele nge bale ssiuyelaili yale tangi sari we. Mena galongale le ye sseogiu reeli iileo le sari we ye sa gerage fetale shagiu liuweniu.

Shoabuto we ye sa siu sheogiu be ye taai giula mele ye be foori, ye sa fale masowa shagiu sari we. Iwe shagiu nge ye sa mangeli be ye bele gasi sari we be ye bele lago gamewele be laiule.

Iwe iye raneele nge yaremate re sa kere yagili reeli mele we gachiule me yale file woali uru we. Re sa mweire shagiu shoali yengagi kawe reele. Mauweshe we iwe uru lago shagiu. Ye sa ilegili kere ye sa piti fasefase lago shagiu. Ye be gale gemmalifi weiu liuweniure shoali yengagi kawe nge gaasefaliuwe yaare gale mweireire lago yaremate.

Iiye mwo mele we sine nge ye sa bale ilegili kere gemase. Ye matto nge ye taai pasoelagi reeli yale kere igawe ye file gachiu sari we laiule nge yaremate re gachiuwe.

Yato we shagiu re shiuweli uruuru nge tarimwaale re sa buutogo tittingaro be fitiyeere me reeli shoabuto we. Iiye ye gale ffase shagiu nge ye gaaingeliire be re be weti be mena laiule mele ye be sipegili ffili fitiyale tai iiye mele re be gassiya.

Iga ye mano shagiu uru we nge semaliu nge ye yatemagili be ye be lago nibogotale be ye be lago kaseoseo. Re sa peeyou yaremate reeli yaare gekebate, nge re peeyou shoali uru we reeli yare uru.

Shoabuto we me mele we laiule re buutogo reeli imwe we imweere nge ye sa fasiuli logo tarimwaale we laiuli tamweoliu le ye wewwetiire. Iga shoabuto we ye weri shagiu tarmwaale we nge ye liuwelago. Ye sa fasiuli giula shagiu be tarimwaale we ila ye sa buutogoli shoali tingaroli sari we laiule be fitiyale.

"Ye sa farikitigiti gemase iga i be tingaroogo shoabuto mwu laumwu be fitiyei?" Yale gassiye tarimwaale we.

"Yeebe, ye tai bale farigiti," mwaliyeli shoabuto we. "Nge gale ila i tipeli be mele lai ye be fitiyeli semaliu sheogiu tarimwaale kaale me imwowamwu geele. Go giula be ila gaamami maliu geffageo le ye te wai tefaali paliuweni mele ka gale yauteni paumwu ngali gemami."

"I giula," mwaliyeli tarimwaale we, "I bele gasi mele laumwu be fitiyei be ilegili gachiuwe. Iwe nge i mwaashiu mwaliyeliye ngali mena temai."

Re sa fitiyetiye lago gaale kawe. Tagou seige lago boongi reeli gubulo shagiu woali faliuwe we. Tamweoliu we temali tarimwaale we iwe ye sa kere gemase igawe semaliu shoabuto kemwatiyetiye mele fitiyeli tarimwaale we laiule.

Iiye mwo shoabuto we sini sari we nge ye bale ilegili kere gemase. Ye kere yagili mele we laiule iga ye bale fitiyeli tarimwaale we ye mwaale gachiu gemase nge ye bale wili be laiuli tamweoliu. Re tewaai logo be iire maliu nngawe. Iwe re sa logo lago le re sa kere shagiu.