PDF version (320k)

Picture

METTA MELE YE GALE
MWONGO METTA

translated by Augustin Uolai
illustrated by Calvin A. Fujioka

Fiyango le gai bele yewali ila seewe fiyangoli Baalaau. Gare go be piipiiye shobali faliuwe ye wetettalo nge go be weri biuleiu ye re gale seoriu be Baalaau le ila biuleiu la ye buutogo fiyango yeele me iyange. Mele si bele giula me reeli fiyango yeele ila kofali yaali semate maliu metta mwommwongo semate maaliu gare semate faurumile.

Picture

Picture

Semaliu mwaale le ye logo ruwouwe maliugeo laiule. Re gale logo shagiu iire maliugeo kawe lani guru. Semaliu maliugeo mwaale nge semaliu maliugeo shoabuto.

Iiye mwaale we ye gale gamwongooro lago shagiu iire maliugeo kawe laiule. Ye gale gamwongooro nisoro me nifegaafi. Ye gale gamwongooro nge ye gaiuliure shaaliu.

Re logo riuwemaliu tarimwaale laiuliu iiye mwaale we. Iteere iire tarimwaale kaale ila Siibang me Gatlan. Siibaang mele mwowali yaremate. Re tipeli iiye maliugeo kawe laiure. Re gale piipiire lago shagiu.

Maliugeo shoabuto we ye sa foffoori ffetale. Ye logo mele we ffetale lani seewe shiugiu. Ye sa gekafile be ye bele siugiuniu.

Picture

Picture

Siibaang me Gatlan re sa iseliirewaiu maliugeo kawe me lani mele we guruure. Re sa uru fetale reere maliugeo kawe.

Gatlan ye sa gatefaali longo maliugeo shoabuto we lani guru we. Siibaang ye sa garigi lago male mwaale we be ye be faaragi fetale.

Picture

Ye la mano mele we temaare me reeli yengaange nge ye sa buutogo be ye bele gamwongooro maliugeo kawe. Ye la fale longo lani guru we yaare nge ye sa gale seewe shagiu maliugeo we ye logo iyange. Ye sa gale maliugeo shoabuto we shagiu. Ye sa faseongiure tarimwaale kawe nge ye sa gassiyaare gare ye sa lago maliugeo mwaale we iiya. Iwe nge tarimwaale kawe re sa gaaingeli be ye ffeffaaragi fetale liugiuliu imwe we. Mele we temaare ye sa gaaingeliire be re be lago piipiiye.

Picture

Picture

Re sa magili shu fengani nge re lago piipiiye maliugeo we. Re sa lago peigili imwe we sepeigi nge ye talogo iyange. Re sa fagili me liugiuliu kelaisiisi we me faali imweli fafiye we nge ye tai bale logo shagiu. Re sa fagili nge re taweri.

Siibaang mele ye la fale lago lani maatali gamwuutiye we nge ye sa la weri seewe faurumile le ye rangerange me checha le ye logo liuweniu iiye gamuuti-ye kawe. Ye sa la piipiiye nge ila mele we iiye maliugeo we iiye mele we le ye masiuriu.

Picture

Siibaang ye sa gebate, "Maliugeo we iyeiyeele." Re sa magilago piipiiye Ye sa gemmasiuriu sheogiu iiye maliugeo we. Mele we temaare ye sa ganenga tage ye sa biitage piipi fetaleeye nge ye sa seoriu be, "Ye sa temwaai maliugeo yeele." Tarimwaale kawe re sa fageowe maliugeo we laiure.

Picture

Picture

Mele we temaare ye la fale tiwe nge ye sa weri be welipeigili maate we yaare nge ye sa sseogiuliu snails. Mele kaale ila re weeye limilimitaulomwu nge yooro peore le tappili umwane. Biuleiu gawe re sseogiu snails kawe iyange iwe yooro siupe iyange le liiliire snails kawe. Re gale liire snails kawe be iga re gale gatewasiiye maate.

Re gasi sheogiu maliugeo we nge re lago reeli imwe we imweere.

Picture

Re la gola imwe we imweere nge re sa buutogo gammwele fetaleeye maliugeo we. Ye sa ppaiu lago shagiu maliugeo we.

Tarimwaale kawe re sa gassiya mele we temaare mele ye temwaai maliugeo we iyange. Mele we temaare ye sa gaaingeliire be, "Maliugeo yeele ila ye mwongo snails kawe re sa mwongo siupe. Ila mele ye sa temwaai maliugeo yeele iyange."

Gatlan ye sa seoriu be, "Ye nete, gaangiu i werini semweiu snails kawe le re sa masetiwe woali siupe kawe. Ila nge ye be iteiu mele ye la iseisetiwe siupe biuleiu we le ye sa buutogo temwaai lago laiushe maliugeo iyange?"

Mele we temaare ye sa seoriu be, "Mele we silemi mele ye iseisetiwe be liiliire snails kawe re gale gekatewasiiye shagiu gamwuutiye kawe gelashe."

Picture

Picture

Gatlan ye sa seoriu be, "I sa mwaashiu giula. Maliugeo we ye gangi snails kawe nge snails kawe re mwongo mele we liiliire Ila faale le ye sa temwaai maliugeo ye laiushe iyange." Ye welibuwe maliugeo shoabuto we be ye tai mwongo snails kawe. Ye sa siugiuniu nge ye toulape siugiuniule. Mele we sileere ye sa gameoto gelaare iiye siugiuniu kawe.

Rane we shagiu nge mele we temaare tarimwaale kawe ye sa gaaingeliire be tappili siupe we ila ye be yogo le ye be liiye semaliu yaremate. Ye la riuwabongi me iyange nge ye mase lago maliugeo we laiure. Ilegiire nge re sa fageowe iiye maliugeo we laiure.

Picture

Picture

Mele we temaare ye sa gaaingeliire be re bele lago liba iiye maliugeo we. Re tewai gangi be ye mwongo siupe nge re te temwaai iyange. Iwe re sa lago re sa lago liba iiye maliugeo we.

Picture

Picture

Welimwirili sheogiu yato we ye mase lago maliugeo mwaale we nge tarimwaale kawe re sa gekammwele shagiu maliugeo shoabuto we. Ye sa laiuleiu iiye maliugeo shoabuto we iwe ye sa toulape lago laiure maliugeo.

Mele we sileere ye sa gaaingeliire mele kawe laiule be re be la ffagitogo umwane.

Umwane re tau gale ffagi fetale shagiu seewe mele re be gasi be peoreo. Ila umwane ye gale giure snails.

Umwane re gale liire snails be re gale gangiire nge re sa gasi mele ka peore be laniyeere. Ye be feffarigiti lago seewe umwane nge ye bele lago liiye seewe snail ka ye farigiti sekiute.

Picture

Iwe mele we sileere ye sa ppaiu lago me yaale googo siupe reeli liiliire snails. Ye sa gale iseise shagiu umwane kawe lani maate we yaare nge umwane kawe mele re sa gale liniire snails kawe. Geraamwo me maliugeo kawe re faaragi fetale nge ye taai yoro siupe le re be mase iyange.

Picture

Picture

Tarimwaale kawe re sa kere be ye sa toulape laiure maliugeo Ye toulape lisiyobu kawe re mwaashiu gattewa le male mwaale me male shoabuto Tarimwaale kawe re tipeli geffoagolali maliugeo.