PDF version (168k)

Mena
Metaammwali
Maai

Picture

translated by Augustin Uolai
illustrated by Eric Woo

Picture

Ye logo seewe faliuwe iwe ye logo sefoasho waliuweliu le ye fato luugalepale. lire yaremetali faliuwe we iwe re tagiula gare waliuweliu metta iiye mele we. yaremat re gale buutogo me ilegili biuleoiu le shoali piipiili waliuweliu we ye semate. Ye semate iiye waliuweliu we be ye be buutogo le re be gopiiye sera mele we raale nge ye gale magi weiu iige me iyange le re shiuweli melawe.

Iwe iire yaremetali faliuwe we iwe re tai gale lago fita be ye be gale mwano shagiu gelaare ige nge re lago gopiiye sera raali iiye waliuweliu we nge re gake gelaare iige me iyange. Ye gale semaliu me tipale nepali mele ye be gasi be gane nibugotale le ye be gake shagiu nge ye la gameotto. Ye sa gachiu sheogiu tipeere shoali faliuwe we reeli waliuweliu we re sa welibuwe shagiu iyange.

Picture

Picture

Ye be seewe yare gopiiye rali iiye waliuweliu we nge re gale rongorongo yaali semaliu yaremate gale tangi togo me seebiuleiu me bale woali iiye faliuwe we. Ye gale weeye shagiu yaali semaliu shoabuto taangi. Ye be gale tangi nge ye gale gefaalipeshe ngaliire be re tewai gopiiye raali iiye waliuweliu we. Semweiu iire yaremetali iiye faliuwe we re sa gale seoriu be, "Fetale iteiu mele ye gale tangi reeli iga si gale gopiiye raali waliuweliu yeele? Si be fagili be si be gassiya gare metta mele ye ila ssengale iyange."

Re sa mwetoaro liuweniu faliuwe we le re sa la fagili fetaleeye iiye yaremate we ye gale tangi igawe re gale gopiiye raali waliuweliu we. Re sa fagili fetaleeye yee re la weri me liuweniu waliuweliu. Ila mele we semaliu shoabuto iiye mele we. Re sa gassiya gare metta mele ye gale tangi igawe re be gopiiye raali waliuweliu we iyange. Iwe nge iiye shoabuto we ye sa gaaingeliire be ye gale tangi be waliuweliu we mele ye be ganeere gelaare maai nge iire re gale tau gopiiye lago shagiu. Ye sa bale gaaingeliire be waliuweliu we ila ye toaro tappile woali ilegili faliuwe ila gare re gale gopiiye lago shagiu raale nge ye bele faiuseokiute nge ye bele mase.

Picture

Picture

Yato we nge ye teiti yoro mwo le ye weri seewe maai. Re sa gassiya shoabuto we be, "Yooro seewe faurumile le maai itale?" Iwe nge shoabuto we ye sa seoriu be, "Gare gai ppaiu lago me yaami gopiiye raali waliuweliu laale nge ila ye be faiuseokiute nge ye bele buuweiu uwaale le ye gaarawerawe. Iwe gai sa gasi mele kela uwaale gai sa gamweotani be gelami be ila ye gachiu.

Iwe iire yaremetali faliuwe we re sa talinga mele we mwaliyeli shoabuto we. Ye tai ssiuyelai me weli mwirili mele we re taai gale gopiiye raali waliuweliu we nge ye sa buuweiu uwaale. Re sa gili gelaare iiye mele kawe uwaale re sa la gamweoto. Re la mwongo nge gaasefaliuwe yaale gachiu. Iwe re taai gale gopini raali iiye waliuweliu we be re sa gachiuniu mele kawe uwaale.

Picture

Re sa gake mele kawe wagerale re sa la fato fetale liuweniu iiye faliuwe we yee ye la toulape lago maai iyange. Ila geele semaliu go tewai mwano shagiu gelamwu iige nge go sa lago gopiiye lago raali yaamwu maai be ila ye tewai yoro iige le ye be buuweiu me iyange nge ye te la tai iige nge tai maai.

Picture