PDF version (44k)

Picture

written by Joseph Yarofaisaf
illustrated by Don Dougherty

Picture

Riuwemaliu bisibisi iwe re logo woali seewe faliuwe. Ye sa mase sileere me temaare. Ye sa lire shagiu riuwemaliu. Iwe nge mwaale we ye saari iwe semaliu mwaale farigiti. Iwe nge mwaale we ye tugofaiye iwe semaliu mwaale chile.

Ila shagiu yaare yengaange iwe re gale lago shagiu fita. Iiye waa we waare iwe sefasho waa chile. Gare re be tage iire me riuwemaliu ila nge ye taai yoro mele ye be take reere be ye sa tekaare shagiu me riuwemaliu.

Iwe ila iiye mwaale we ye tugofaiye nge ye chile mele ye gale mmwele be ye be gale lago fita shiuli waa we waare. Iwe nge mwaale we ye saari nge ye farigiti iwe ye tai gale mmwele be ye be tage waa we waare.

Rane we serane nge re sa seoriu be ilegiire me riuwemaliu nge re bele tage waa we waare be re bele lago fita. Re sa lago yee yaroli seewe faliuwe chile re sa lago fita iyange.

Picture

Iwe iiye mwaale we ye saari nge ye farigiti iwe ye gale taiuteoiu shagiu ige chile. Iwe nge iiye mwaale we ye tugofaiye nge ye chile iwe ye gale taiuteoiu shagiu ige farigiti.

Re sa fita fita yee nge iiye mwaale we ye saari nge ye farigiti: "Ye nngawe be geele go ttaiuteoiu male farigiti nge gaangiu i ttaiuteoiu male chile. Si be ganiiweli yaashe yoa."

Re sa liweliy yoa kawe yaare, nge bale tapiwe shagiu. Mwaale we ye tugo-faiy nge ye chile ye ttaiuteoiu shagiu male farigit. Nge iwe ye sari nge ye farigit iwe ye bale ttaiuteoiu shagiu male chile.

Picture

Iwe shagiu nge iiye mwaale we ye farigiti: "Si be soroowe waa ye waashe be ye nngawe be go ttaiuteoiu shagiu male farigiti geele."

Re sa soroowe waa we waare nge bale tapi we shagiu. Mwaale we ye tugofaiye nge ye chile ye ttaiuteoiu shagiu male farigiti nge mwaale we ye saari nge farigit iwe ye bale ttaiuteoiu shagiu male chile.

Re sa fita fita yee meoiusiu tiwe waa we waare be iwe ye sa sseogiuli iige.

Re gabaaye shagiu waa we waare nge re tefaali. Re sa buulongo fela sefasho waa farigiti be waare.

Picture