translated by Tino Uolai
illustrated by Donald L. Buchholz

Fiyango yeele ila fiyangoli Fili le ye chuwaaiiye seewe karebau be meni ye be gale yoro shagiu iuliumale miiniki ilegili rane. Ye limetagili iiye karebau we faali sefoasho maai be meni ye be gale mwongo mai ka ye be gale ppiungiu tiwe, ye tai ssiuyelai nge karebau we ye sa ngiushiuliu mwongooli maai nge ye gasi sheogiu ye sa rigi lago be ye sa lago ffagi fetale gane mwongo ka ye be weli lago.

Mmwale nge ye lago shuungini semeoiu bugori nge semaliu shoabuto tugofai ye buutogo shageeye lago faali seewe peopeo. Weli mwirile nge ye sa lago weri seewe maate nge ye sa buutogo gattiwagi reeli yale mwongo matemetali mele kawe yauteni maate we weli mmweli yato we yaremate we yaale maate we ye bale buutogo shageeye lago me iyange. Ye sa bale faaragi lago seokuiteo nge ye sa lago werini semweoiu wishi mmashe me woali yale we nge ye sa buutogo gangini nepali mele ye be mmwele ngali.

Karebau we ye sa gachiu tipale reeli mwongo kawe ye sa gekangini nge ye taai tipale be ye be tefaali lago reeli mele we bugotale. Ye lago werini semweoiu waliuweliu me ngasheli yale nge ye sa buutogo mwommwongo. Ye lago taiuwe togo sera raali iiye waliuweliu kawe nge ye logo seewe ffetali langotamweoliu iyange nge re sige shagiu nge re sa buutogo giuwe. Ye tagunu sheogiu geele karebau nge ye sa gareta ngali yale rigi nge ye taai piipiiye yanepale yale lago ppiungiu longo lani seewe liibe.

Fili ye lago buutogo niimwe nge ya sa buutogo giula be ye sa rigi lago karebau we laiule. Ye sa fagili fetaleeye yee ye lago faaragi togo yaroli seewe liibe nge ye sa rongorongo ngiungiuli karebau me iyange. Ye lago fale longo lani libe we nge ye lago weri karebau we laiule me iyange.

Ye sa lago gassiya semaliu poulisi be gare ye be tepangi nge poulisi we ye tipeli be ye be pakiiye karebau we laiule. Iwe shagiu nge ye sa lago gassiya semaliu shoali fita be gare ye be tepangi nge shoali fiti we ye tipeli be ye be touuw karebau we laiule. Garetale lago nge ye sa lago gassiyaare shoali gulugunu yaafi be re be tepangi.

Re sa lago gasini togo waali gulugunu yafi kawe waare le ye seogiuliu shaaliu iwe re sa buutogo gaauteli libe we reeli shaaliu. Karebau ye sa ppesi tage nge ye sa mmweleli yale teo tage me lani libe we.

Fili ye sa gachiu tipale ngaliire shoali gulugunu yafi kawe iwe ye sa gaaingeliire yare gashigeshige nge ye paali lago karebau we laiule niimwe. Karebau we ye sa gachiu tipale be ye sa gola mele we bugotaare nge ye sa liuwaneeye be ye taai yoro serane le ye be chiuweli rigi lago.