John We Ye Chegasi

written by Joseph Yarofaisaf
illustrated by Gué

"Yee gaiuleiule yee!" Ila mele yaremate re gekabetaagili liuweniu yare yatiu nge re sa likaarigirigi fetale. Mauweshe we John iwe ye teiti yoro mwo weriyale gaiuleiule iwe ye sa mmange fetale. Ye sa rigi ngaliire semweoiu chooro shoabuto.

"Metta, metta ye sa weli?" Yale gassiya semaliu me liuweniure shoabuto kawe. Ye tagunu sheogiu shoabuto we woali yale ffesaagili nge ye sa seoriu be, "Go taweri waa kelaale?" Shoabuto we ye gassiya tarimwaale we.

John ye werini waa kawe nge ye bale shiuweli mmange iyange. "Ngoa i werini iwe nge metta yaremate re gabetaagili iyange?" Yale gassiya iiye shoabuto we.

Re tagunu sheogiu ilegiire shoabuto kawe ffesaagili. Toaro shagiu le ye paliuweli gassiye we yaale. Re sa bale taboowe lago uru we yaare.

John ye weri waa kawe ye sa piungiuli felaaki le felaaki shoalo me male cha, male range, male beshe, matemetale nge ye magi tage.

Iga re lago garepe togo waa kawe nge John ye sa weriire shoali waa kawe igawe re gale biitage niuniutiu fetale nge re gekebate.

Re sa buulongo buulongo waa kawe yee re garepe longo nge re buulongo niutiwe. Re mano nge re fatiule ngali faliuwe.

John ye sa biitiwe siu weli ppiye be ye sa kauruuru waa kawe igawe re sa magi longo girigiri tiwe golaare.

John ye sa galongali mmange pagiu lago, ye sa yale manngeli be mali re faliuwe we re tau gale foori mele we pangali rane.

Iiye John iwe ye tabeeye togo mena sine me temale woali iiye faliuwe yeele. Le re buutogo yemwari mele ka weli mareyareere le re tabeeye togo waafaliuwe. Ye mwaashiu gale fitabongi bongiire nge re sa gaiuleiule re faliuwe yeele.

Bongile we nge John ye gassiya mele we sine me temale gare metta mele re la gekebate rane we iyange. Iwe nge mele we sine me temale re sa gaaingeli faali mele re la gekabate yaremate iyange.

"Ye be mmwele be i be tabeere shoali fita serane? I tipeli be i be lago mwo weri yaare bili re faliuweiye." John ye gassiya mele we temale.

"Go giula mauweshe," mwaliyeli mele we temale. "Igela ila go shiuweli chile nge go bale shiuweli saari. Iwe nge i tegiula gare re be mweshali gasugo gare re tewai mweshali. Iwe nge ila ye mwaashiu gale seige ragimwu. Iwe nge ila ye toulape yengaangali shiuli waa nge re te lago mwashiuleokiu fetale reemwu. Iwe nge go te lago bale mwummwuto fetale shiuli waa."

"I tewai gatiweliire nge i tewai bale mwummwuto. Gare re gaaingeliyei be i be ffoori faurumile nge i be ffoori. Tai tewegili mele re gaaingeliyei be i be foori nge ye be mmwele."

"Iwe ila nge go sa wetiyei," mwaliyeli mele we temale. "I bele lago gassiya mena mareyarei gare ye be mweshali gasugo gare ye tewai mweshali. Nge gare ye mweshali ila nge go be lago nge gare ye tamweshali ila nge go tewai lago."

"Go tewai lago pechaiu mauweshe. Go giula be ila re gale lago shagiu me weli mmwettaiuwate. Iwe nge re tai gale mwongo. Iwe nge re lago tefaali nge ye sa uwele yaalo. Iwe nge ila gai tewai ganoogo mwongo be ila go tewai gake shiuli waa be re te ssongo ngalugo." Mwaliyeli mele we sine.

"Yeebe, go tewai gariusiugo iyange be ila ye toaro mele i be foori."

Bongile we nge mele we temale ye sa lago mwaliyeliye ngali mele we mareyarele gare ye be mmwele yale gasi John. Iwe nge mele we mareyarele ye seoriu be ye be mmwele.

John ye sa lago masiuriu reele mele we mareyareere be bono mele we mareyareere ye te bale ngiushiuli faaragi welimmweli taiuwate reeli feffasolo.

Welimmweli iga re be masiuriu nge mele we mareyareere ye sa felaiuwe John reeli biili me ulunuli mele ka mwaale re gale foori me shiuli wa.

Ye taai giulamwali masiuriu gaale we John bongile we. Ye masiuriu nge ye ttelaagili yali mele we temale me sine kkere yagili igawe ye lago biili. Ye bale ttelaagili yaare shoabuto kawe re ffesaagili kere yagili.

Ye sigi nngawe lago iga ye iugiu lago ttale we yaale be mele we mareyareere ye feffaseongiu. "John mmate be ye sa taiuwate nge si bele lago."

Iga re sa tetteragi ngali faasiu nge John ye sa ilegili ppati gemase. Ye sa gale yaleyale be gare mele masheragile be iiye maaliu nge ye bele yali yagil weoiu waa we waare weli feosiu be re be ttiri.

Iga re lago gola waiu faasiu nge John ye lago fanago, yeeki, ila mwo ssengali toulepali waa kawe, le sefasho shagiu nge ye gemalemale me lani yale.

"Yeisi John," mwaliyeli mele we mareyarele. "Yamwu bou iye, iwe nge go sa mangii gachiuwe be go be gemwashiu gachiuwe be iige re te gasi tengiugo."

Re sa fita fetale yee ye tai ssiuyelai nge waa kawe semweoiu re sa gekebate be ye sa taiuwate nge re bele tefaali. Ilegiire nge re sa mweoiusiu lago. Iiye mwo waa we waali John me mele we mareyarele nge re sa bale mweoiusiu lago.

Iiye John iwe ye gachiu lepali bauuwale rane we. Ye matto shiuli waa we waare nge ye taai pasolagi reeli yaale kere. Ye sa pitifasefase lago shagiu.

Re sa buulongo gaiuleiule fetale lenamwo. Mele we mareyareli John iwe ye sa ilegili kere yagili John. Gaale we John iwe ye matto shiuli waa we nge ye sa rongorongo itale be yaremate re sa gekabetagili. Ila mele we ye lago peiki nge ye weri semweoiu chooro saari be ila mele we re gale uuru weiu reele.

Re gola shagiu faliuwe nge John ye sa likaarigirigi ngali mele we temale. "I sa bili raaleiye. Yoro mele i bauuwe. Ye pwale mwele be i be lago laiu?"

"Ngoa," maliyeli mele we temale. "Igela ila ye taai tiwegili. Gare go tipeli be go be lago iwe go sa lago. Iwe nge i tewaai gemwashugo."

"Go sa gashigeshige. Iwe nge iye i bele lago mwo nimwe be i be lago mwongo be i sa pechaaiu." Iwe shagiu nge ye rigi be ye sa lago nimwe. Ye lago shuungi mele we sine me liugili imwe we imweere. Mele we sine ye weri sheogiu nge ye kere lago.

"Yooro mwo mele go gola raaleiye mauweshe? Ifa ssengale go tai maaileoleo?"

"Yeebe," mwaliyeli tarimwaale we. "I tei maaileoleo. Nge, ngoa, yooro mele i gola raleeiye. Iwe nge i sa gassiya mele we temai gare ye pwale mmwele yai lago laiu nge ye seoriu be "ngoa."

"Ngoa, ye be mmwele yamwu lago," mwaliyeli mele we sine. "Gai sa kere yagilugo igela be go sa giula fita. Gai bele mmwele reemwu."

Rane we nge ye lago shuungi chooro shoabuto kawe re ffesaagili. "Gai rongorongo be go sa mile be geele semaliu taubili, Ganettale?"

Gaale we John iwe yale pitiffase shagiu nge ye faaragi lago le ye tai paliuweli mele we shoabuto kawe re gassiya.