John Me Laiule
Gechaiugo

written by Augustin Uolai
illustrated by John Lennon

John ye tai mesaige be ye toaro laiule gechaiugo. Ye sa tipeli seewe gechaiugo.

Igela ila ye sa ffagi fetale sheoliu maai be ye tipeli be ye be foori seewe gechoiugo be laiule.

Ye sa gatefini semweoiu sheoliu maai nge ye fili gachiuwe seyali le ye ilegili gachiu gemaase.

Ye sa goalogoalo toulape yoa be geogeoli gechaiugo we laiule. Ye tipeli yoa ilegili farimwosho, farimwosho.

Logo ka John ye georeotini igela ila ye gasini me reeli paaniu yeele. Logo kaale ila logoli gechaiugo we ye be foori.

Ye sa gappesha tage logo kawe reeli sheoli mai we nge ye sa geogeoni reeli yoa farimwosho, farimwosho we ye goalo. Ye sa foffoori gechaiugo we laiule igela.

Ye sa mesaige gemase John be ye sa yoro laiule gechaiugo. Ye sa rigi yagili lago gechaiugo ye laiule reere maareyerale.

Ye sa gaweri ngali maareyerale gechaiugo, we laiule. Ye sa kaile, kaile gemaase yale mesaige reeli igawe iiye shagiu yaale foori gechaiugo we laiule.