Ige We Ye Gale Gammweleyai

translated by Augustin Uolai
illustrated by Eric Woo

Gaangiu semaliu ige farigiti i gale logo fetale shagiu liugiuliu wosho. I gale sawe feta-eeye shagiu metali wosho. I gale mwongo fetale shagiu.

I gale saro pechaaiu sheogiu nge ye sa mmangi togo ige kawe ye paashigishigi. I ganeowe ige kawe ye paashigishigi.

Yooro semate iige le ye gale gammweleyai. Ye gale mwongo semate luumwu le ye gale teo woai le i gale keotiu iyange.

Ye gachiu ttiuleere iire ige ka re gale gammweleyai. I be gale weriire shagiu nge ye sa gale gachiu tipei. Iwe nge i bele ili ngaliire.

Re be weriyei sheogiu nge re sa giula be i sa tipeli be re be gashiuwa iiye lumwu ka woai.

I gachiuwe yato ka re gale gashiuwa lumwu ka woai be i gale feffase iyange.

Iire ige kaale re giula be i tewai liire Geraamwo me re nenepali sheogiu ige kawe i gale mwommwongo nge i giulaare. I gale giulaare shagiu iire ige kaale me liuweniu matemetali iige.

Re be buutogo kliiliiye lumwu ka woai nge lani mele yewai nge re buulongo iyange. Iwe nge i gale giula shagiu be i tewai giure.

Re welibuwe iire ige kaale be i bele gangiire semate me semate ige paashigishigi nge iire ye liugiuliugiu tipeere be i tewai liire Re giula be i be liire nge ye toaro le ye be gashiuwa lumwu ka woai.

Lepali ssiuyelaili yaai iliili fetale shagiu metali wosho yeele nge i giula be ye be toaro lago semate iige nge re be mase bale semate iige.

Ye sa toulape tappili ige kaale le re sa mase be shoali fita re sa fitaaliire lago ige kawe re gale mwongo luumwu me woaro. Iwe re sa mase be ye taai yoro mele re be gangi.

Lepali yaai liuwaneeye nge lepali yaale kaile lago tipei be semate iige nge ye melawe le yagili bale semate iige. Gare ye be toaro lago semate iige ila nge ye be bale toaro lago ila semate.