translated by Augustin Uolai
illustrated by Joy Goodenow

Gewasu

Bomwu! Bomwu! Bomwu! Bomwu!
"Metta menaale?" Rioichy yale gassiya Ancheres.
"Piipiiye buraago la woali wosho laale."
"Si ya lago be si be piipiiye gare metta."
Ancheres yale paliuweli.

Re sa teo tage shiuliu booti we waare, gamelewa misiile we yaarre, nge re ago.

Re la garepa togo biuleiu we nge Ancheres ye sa gabate, "Piipi lago igelaale! Go mangiiye nge ye be fiteige ige ye ye be yogo ngaligishe raaleiye."

Rioichy ye tai gefaniiye mele we bisile. Iiye iwe ye sa gaffeta shagiu booti we yarooro, be ye rognorongo yaali yaremate feffaso be re be tepangi.

"Yeei, gai tepangiigemami! Reiuwemaliu mwaale iye re sa kaile yare wasu. Gattirigemi!"

Ige toulape we ye sa iwe ssengali yale ppesi fengani nge Rioichy ye taai gefaniiye be ye sa getagunu sheogiu booti we waare nge re lago reeli iwe sefoasho. Re la garepa togo booti we nge Rioichy me Ancheres iwe re sa yare yatemagili nge ye taai mmwele le re be piipi ngaliire mwaale kawe lani booti we sefoasho. Woali metali iwe semaliu iwe ye taai mmwele reeli cha, nge iwe semaliu iwe ye shape. Cha iwe ye sa sheoiu lago woali mangaagulo nge yare piipiiye nge cha iwe ye shiuweli sere lago shagiu le ye sa ilegili biuleiu nge cha.

Iwe semaliu iwe ye tai wasu iwe ye sa gekammelawe misiile nge ye tai melawe. Rioichy ye sa garepa togo iwe waare ye sa buutogo getaata ngali iwe sefoasho mele we re wasu shoalo. Ye sa teotage shiule nge ye lago reeli misiile we. Ye tai ssiuyelai yali Rioichy taiuwe misiile we nge ye la melawe lago. Yale melawe shagiu misiile we nge Rioichy ye sa gebate ngali Ancheres be ye bele ttabe togo re mwiriire be re be gattiri ngaliire Moen.

Yato we re sa lago liuweniu loa nge iwe semaliu ya sa meni ye be tepangiire mele kawe maareyerale nge ye tammwele be ye be siu uwele. Ye meni ye be tepangi mwaale we ye wasu metali gare ye be ppaiu lago chaale nge iiye ye tamweshali gashiuwa lago mele kawe palule me woali metale.

Rioichy ye ligiti lago mwo misiili we nge ye gashiuwa mele we mengaagulu goalongale nge ye sa gabate ngali mwaale we ye siu. "Gasi meneele nge go sa tewasiiye be ye be ruwouwe nge go sa baliu ngali gilate kela.

Ye sa tabeeye mele we Rioichy ye gaaingeli. Mwaale we ye wasu metale ye gasi sogofeti iiye mengaagu we ye sa baliu ngali giletali mele we metale. Yatowe ye la shimwe tage wwaale we ye shappe nge Rioichy ye sa wegitegi lago be ye tammwele be ye be piipiiye. Ye fari iwe mwo! Ye taai yoro lago seewe giumwiushiule.

Terage we yaare iwe ye gale gasseewe me setabo shagiu aawa nge Rioichy ye sa seoriu be ye sa ssiuyelai gemase. Lagoli Moen ila ye gale gammesaige nge igela nge ye taai gainmesaige. Ye taai iyeli metafe Rioichy be ye sa toulape gassiye ka ye sa liuwaneeye. Ye tipeli be ye be gattiriire lago shoa wasu kawe reeli toagota. Ye be ifa ssengali iga semaliu ye be toalape lago chaale nge ye mase me mmwali iga ye be gola toagota? Ye sa sheoiu lago cha niwa.

Metta mele shoa kaale re la tai gefaniiye mmweleere reeli yare la googo toalomaachi? Metta re be foori iga re tewai giula mwirile nge ye tewa lago toalomaachi kaale? Yooro pilaali iige reeli metagi yeele?

Re la garepa togo ppiye nge Rioichy ye sa gabetaagiliire semweiu yaremate le ye giulaare. Re giula shagiu be yooro mele ye sa weli nge ye sa yoro shoa wasu nge semaliu mwaale kawe ye sa la gasi togo stoosa we waale. Ye sa garepa ffoashoowe tiwe mwashengatteti. Rioichy ye sa garepa ngali stoosa we booti we. Re sa buuweiu semweiu mwaale re sa buuweiu tepangiire longo shoa wasu kawe. Iwe ye wasu paiule iwe ye taai giula lago faurumile iwe re sa roogi tage shagiu shiuliu stoosa. Re tagiula gare ifa nepali mele we paiule mele ye sa talogo lago be iwe ye tiugiutiugiu reeli ttewasili mele we mengaagulu Rioichy. Re giula be ye kaile wasulo be iwe ye shiuweli bupwuuweiu sheogiu cha me iyange. Toulepali cha iwe ye sa shoalo nge ikawe ye shiuweli bupwuuweiu me reeli ttewasili mengaagu we iwe ye shiuweli terame.

Re la gola spiitaali le re sa buulongo niimwe shoa wasu kawe nge Rioichy me Ancheres re sa matto fetale liugiuliu ruumwu kawe. Ye sa mano mele iire re be foori. Ye sa toagota shagiu me yaliusiu mele ye sa mile ngaliire kofaare shoa we.

Rioichy me Ancheres re sa tefaali lago reeli booti we waare. Rioichy ye sa gaaingeli mele we bisile be ye bele gasiire lago nibugotaare.

Ye la fitouwe lago wiiki me mwirile nge Rioichy ye sa gaaingeli Ancheres be, "Si ya tefaali lago biuleiu we re toalomaachi shoa we iyange be Si be la piipiiye." Re tage shagiu booti we waare nge re lago. Rioichy ye gake yaare piipi.

Re la gola biuleiu we nge re yangkera lago booti we waare, geppashe tage yaare piipi, nge re mmwuso tiwe letteti. Rioichy mele ye gommwe nge ye sa gekatiipeoiu ngali seewe me seewe me letteti. Ancheres ye sa italo tipale reeli mele kawe mele we bisile ye gekatiipeoiu ngalini be ye tewai mmwele shagiu le ye be gaweri ngali nge ye toaro faale.
Ye be ruwouwe aawa yare logo fetale letteti iwe nge Rioichy me Ancheres re sa tefaali tage shiuliu booti we waare. Re biitage mwommwongo nge re iuliu liu nge Rioichy ye sa gekassiya maliu chiile we bisile semweiu gassiye Rioichy ye gale gakammwele shagiu mele we bisile nge ye foori mele ye be senape iyange.

"Metta mele go weri go Ancheres be ye sa weli iga ye sa toalomaachi wosho ye yaashe?" yale gassiye Rioichy.

"Ye be metta nge iye ye sa nngawe gemase. Ye sa gale fitemaliu lago iige igeiye le ye taai tappili igawe ye teiti toalomaachi. Ye sa bale ttewasi woosho. Mali ila mele ye sa gale fitemaliu lago iige iyange." Ancheres yale paliuweli.

"Ngoa, ila mele faale. Woosho ila ye melawe nge iige re gale gekangi. Ye be mase woosho nge ye taai yoro mele iige re be mwongo. Ye be toaro ige ka re gale mwongo woosho nge ye tewaai yoro gelaare ige farigikiti ka re gale mommwongo ige ka re gale mwongo woosho. Ila ye be mase woosho nge ige ka semweiu re tewaai mmwele."

"Ila mele ye taai yoro igeliwosho me taiyaawe ka i werini iyange?" yali Ancheres gassiye.

"Ngoa, nge ye tai bale ila shagiu be ye toulape lago faale. Piipi togo, ye be buutogo le ye be toalomaachi seebiuleiu nge ye tai iige shagiu mele re be mase be bale mele kela siugiuniure me siugiuniuliu matemetali maniu letteti ka re logo biuleiu yeele. Mmwale nge Si tei tepa nge ye be la weli mwirile nge ila ye tewaai yoro iige me mele ka ye be melawe me igaale. Ige paashigishigi nge re bale mase."

"Toalape lagolo!" Ancheres yale seoriu nge iiye maliu iushiushiugiu shimwele. Yato ye Si be liire mele ka weneiure ila nge ye tewaai yoro lago ige farigikiti ka Si be gola."

"Ngoa, ila go sa metafe," Rioichy yale seoriu.

"I gale liuwaneeye nge yashe googo clorox me toalomaachi reeli fita mele ye garetali gachiu. Mene shagiu i tei gale foori iyange ila i giula be go tai tipeli." yali Ancheres gaaingeli Rioichy.

"I giula go Anche, I giula be go tipeli fita ka ye masheragi. Iwe metta mele go liuwaneeye igela iga go sa weri ngali metamwu?" Rioichy yale gassiye.

"Ye nngawe gemase. Ye sa toulape gemase mele ka ye sa mase le ye tai mele ka shagiu Si sipegili liire be bale ikela re mase be iga Si ya gatewasiiye bugotaare. Gare ye shiuweli melawe mele we temashe nge i giula be ye be nngawe tipale reeli mele giishe Si ya weri." yale seoriu Ancheres.

"Mele we temashe ila ye tipeli taati nge ye tipeli be ye be gammwele le faali iga giishe si gaffitegi me si logo shagiu letteti. Ye bale tipeli be go be farigiti lago nge go giula gammweleli woosho be ye be gammwele mele ka faliuwashe. Loa me foangosho ila re gale gatewasiiye woosho nge ligiti be woosho ye bale gale ttirili melawe tefaali. Nge iga Si be toalomaachiiye me liiye woosho reeli bale semweiu faurumile ila nge ye bele toaro lago mele ye be gammwele mele ka faliuwashe."

Rioichy ye sa piipiiye mele we bisile Ye saro ssiuyelai lago nge ye sa gassiye, "Go mangiiye nge go sa giula faali mele mele we temashe ye tipeli be Si be gammwele woosho iyange?"

Ancheres ye sa paliuweli. "Welimmweli igawe ye be mase mele we temashe nge i giula be yooro mele ye nngawe tipale iyange reeli mele ka ye wewweli togo. Mali be igawe i shiuweli saari ila mele i tametafe iyange. Mali be i sa metafe igela. I mesaige gemase reeshe igela. Gare ye be la yoro lai nge i tipeli be re be bale tappili mele kawe wettemashe reeli yare tipeli taati. Bale tappimwu me gaangiu."

"Ila nge ye shiuweli toulape mele Si be foori. Si bele tefaali. Si bele lago kepate ngaliire maareyerashe me re faliuwashe," Rioichy yale seoriu nge ye feffase.

Re gemalewa shagiu misiile we yaare nge re lago.