PDF version (71k)

Picture

translated by Augustin Uolai
illustrated by Donald L. Buchholz

Picture

Gaale we semaliu gelaagu Iiye gelaagu la ila ye roshoppiungiu. Iwe nge mena gaashiye-shile mele ye beshebeshe. Gaasefaliuwe yale betai iiye gelaagu we. Ye gale rigi fetale shagiu be ye gale ffagi fetale mele ye be yogo ngali be gane. Seewe yale feffaaragi lago lani iiye yale we nge ye sa weri sefoasho maangka. Ila mele we ye sa mmashe fengani mele kawe uwaale.

Picture

Ye sa sere lago shagiu shaniu yewali gelaagu we igawe ye la weri mele kawe uwaali maangka we. Ye sa buutogo matto tiwe nge ye sa niniwaneeye mele ye be foori nge ye sa gola mele kawe uwaali maangka we. Ye taai mmweleli yale mwoano gane maangka kawe ye sa mmashe. Ye sa buutogo bale niniwane fetale mele ye be foori. Ye la faaragi lago peigili shapili maangka we me peigi we sepeigi nge ye la weri seewe teraape be ye siu ngali mele we shapili maangka we. Ye sa buutogo teotage woali teraape we yee ye la biitage logo lago shiuliu maangka we.

Picture

Ye sa buutogo gafile lago me woali sera raali iiye maangka we nge ye sa buutogo mwommwongo ikawe ye garepa. Ye rete lago ikawe ye garepa nge ye gere waiu reeli ikawe ye ketabo waiu woali mesheli ra we. Ye sa maliuwegili lago be iwe ye farigiti nge ra we ye gekerage waiu iyange iwe ye sa yeyaiushige lago. Ye tai ssiuyelai nge ye biuniu tiwe iiye ra we ye logo woalo. Ye lago shagiu tagulugulu me wenengi nge ye la gabiitiweeye. Ye sa lago gauwele tiwe me lani kaangali seewe ra kawe faale. Ye biitiwe shagiu biitiwe leo lago mele we gaashiyeshile lani iiye kaange we. Iiye iwe ye sa chechengagi lago le ye sa sorofagi tiwe mele we shimwele.

Picture

Ye sa biitage gurufaafa fetale yee mmweoiu sheogiu iiye mele we gaashiyeshile nge ye biitiwe ppiungiu faali iiye maangka we. Mele we gaashiyeshile iwe ye sa mmwashiu lago lani kaangali ra we Ye shimwetage ye sa biitage matto nge ye weweti mele we gaashiyeshile gare ye be ppiungiu tiwe. Ye tai ssiuyelai nge ye la ffile togo geele yaangi yale la ppiungiu tiwe mele we gaashiyeshile Ye torofi sheogiu nge ye sa rigi. Ye rirrigi lago nge ye sa weri seewe buraago.

Picture

Ye sa lago biuleoiu we ye weri buraago we me iyange. Ye lago ye sa la weri semaliu shoabuto tugofai be ye ffisifisi fetale peesi. Gelaagu we ye sa buutogo gassiya gare ye tewai mmweleli yale gappesha tefaaliiye tage mele we gaashiyeshile Shoabuto tugofai we ye sa gassiya be, "Ye be mmwele le go be foori ngaliyei faamate faurumile?" Iwe nge gelaagu we ye sa seoriu be, "Metta iiye mele kela?" Iwe nge shoabuto tugofai we ye sa seoriu be, "Weti be laiu nge i be mwaashiu gaaingelugo."

Picture

Nisoro tage shagiu nge gelaagu we ye sa buutogo reeli tugofai we nge ye sa gassiye be, "Metta mele i be foori?" Iwe nge tugofai we ye sa seoriu be, "Metaammwali mena go be foori ila go be itifi togo seewe bachiili shaaliu." Gelaagu we ye sa lago me seewe bachi. Ye tewai pagiu seyali temaago nge gelaagu we ye sa tefaali me bachiili shaliu we. Shoabuto tugofai we ye sa gaaingeli be, "Garuouweli mena go be foori ila go be lago gake togo yaai fafiye." Ye tai ssiuyelai mwo nge ye sa la tefaali gelaagu we me seewe ppiuleogiuliu fafiye.

Picture

Iwe tugofai we ye sa bale gaaingneli be, "Garuouweli mena go be foori ila go be lago fagili togo limwouwe liu." Gelaagu we ye sa lago be shoali teoteoliu liu. Ye tai ssiuyelai nge ye sa tefaali faali limwouwe lu Shoabuto togofai we ye sa bale gaaingeli be, "Gefaauweli mena go be foori ila go be lago iyeri togo wolouwe maai." Ye tai ssiuyelai mwo nge ye sa bale tefaali gelaagu we faali wolouwe maai.

Picture

Ye sa mesaige lago togofai we reeli mele kawe gelaagu we ye sa foori ngali nge ye fageowe reeli mele we gaashiyeshile iwe ye, mmweoiu lago. Ye sa lago gake yaale gaguuwa me tereesi ye sa buutogo teeye tage mele we gaashiyeshili gelaagu we. Yagili mele we ye shiuweli rosho be ye teiti kaile yaale taiuwate iwe ye tai uwele yaali tugofai we teeye tage mele we gaashiyeshili gelaagu we. Mesheli mele we gaashiyeshile mele ye fari ketabo ngali mele we galongali gelaagu we.

Picture

Ye shiuweli nngawe shagiu tipeli gelaagu we reeli mele we gaashiyeshile Iwe shoabuto tugofai we ye sa bale buutogo baisi tefaaliiye lago teeteeli mele we gaashiyeshili gelaagu we nge ye mwaashiu bale buutogo teetefaaliiye. Ye sa gachiu lago. Iwe ye sa kere gelaagu we nge ye lago.