PDF version (204k)

Picture

Geeshi We
Ye Toaro Le Ye Be
Liugiuluigiu Ngali

written by Augustin Uolai
illustrated by Deby Nakamura

Picture

Geeshi iwe ye gale logo woali seewe faliuwe. Faliuwe we ye logo iyange iwe seewe faliuwe felaapiye. Ye toulape liu iyange. Ilegili rane nge ye gale tau biitiwe uru fetale welippiye. Serane nge ye biitiwe bale uru fetale welippiye nge ye sa mangiiye be ye be buuweiu mwo tiutiu letteti. Ila mele we ye lago buuweiu letteti nge fangosho ye gasi sheogiu ye sa gasi ffoashoowe waiu nimetawe.

Picture

Ye sa yatemagili reeli yale yafe tefaali ngali faliuwe nge ye taai bengi be ye sa kashige. Ye sa memmaaliu lago nimetawe nge iiye maliu tengi.

Picture

Ye tettangi lago shagiu nge gaale we Woongi ye lago buutogo. Ye sa buutogo gassiya Geeshi gare metta mele ye sa tangi lago shagiu iyange. Geeshi ye sa gaaingelibe ye tangi be ye sa maaliu tangi faliuwe nge ye taai bangili yale yafe tefaali.

Picture

Woongi ye sa gaaingeli be ye tewai tengi be ye bele gasi tefaali ngali faliuwe we. Ila mele we Geeshi ye sa buutogo teotage woali tagiuriuliu Woongi. Re sa buulongo weli faliuwe. Re lago gola togo faliuwe nge Geeshi ye sa gaaingeli Woongi be ye be gasi foashoowe tage welippiye pale be ye te bale maaliu lago.

Picture

Re lago togo tage nge Woongi ye sa gaaingeli Geeshi be ye bele teo tiwe be iiye ye bele lago. Geeshi ye teo tiwe nge ye sa gaaingeli Woongi be ye be weti be ye be lago gake togo paaiuliu yale gashigeshige. Re gekepate nge gaale we Garigi iwe ye tettalingani ilegili mele kawe re seosseoriu. Ye logo shagiu liuweniu ppiye nge ye tai mwaliyeliye ngaliire.

Picture

Geeshi ye sa lago liuweniu waliuweliu. Ye sa lago faseongiure mele kawe maareyerale. Ye lago faseongiu Gelaagu, Siilo me Gaattu. Ye sa gaaingeliire be re be tabeeye be re be lago gangi seewe woongi. Re buutogo shagiu re sa buutogo peoliungiu lago mauweshe we Woongi. Re sa kere be ye sa yoro gelaare wongi. Re sa seoriu be re bele tefaali lago gake fetale yaare fafiye be re bele fisigi Woongi.

Picture

Re talogo lago nge Garigi ye sa lago gerage tage me liuweniu ppiye. Woongi iwe ye sa wolo nge ye tettangi. Ye sa nngawe tipale be igawe ye giula be re bele fisigi. Garigi ye sa buutogo gassiya mele ye tangi iyange. Woongi ye sa gaaingeli. Garigi ye sa seoriu be ye tewai tengi be ye bele tepangi. Ye sa bale gaaingeli Woongi be ilegili mele kawe re seoriu me Geeshi nge ye giulani.

Picture

Garigi ye sa buutogo gelingi tiwe seewe liibe me weli peigili Woongi be meni ye be mweleli shape lago. Ye teiti shape lago mwo Woongi nge Geeshi me mele kawe maareyerale re sa tefaali togo me gekali fafiye.

Picture

Re sa buutogo fitegi ngali Garigi gare metta mele ye tepangi Woongi iyange. Garigi ye sa mwaliyeliye ngaliire. Ye sa gaaingeliire mele we kofali Woongi me Geeshi.

Picture

Mele kawe maareyerali Geeshi re sa fageowe Woongi. Re gasi sheogiu re sa buutogo gashepa lago. Re sa sige woali Geeshi. Re sa gasi sheogiu fafiye kawe nge re buutogo wauti ngali Geeshi. Re sa gaaingeli be re tewaai maareyare iiye.

Picture

Re sa tabeeye tiwe Woongi mwashengatteti be re be lago gabongi. Re sa bale gaaingeli Garigi be ye sa gashigeshige be gare tai bono iiye nge re sa liiye lago Woongi. Woongi ye sa gaaingeliire be re sa gashigeshige.

Picture

Woongi ye sa ili lago letteti nge mauweshe we Geeshi iwe ye sa mattoli yale tangi welippiye be ye taai yoro maareyerale nge ye sa gari be ye sa wauwou. Ye sa nngawe tipale.