PDF version (219k)

Picture

written by Joseph Yarofaisaf
illustrated by Deby Nakamura

Picture

Yoolo iwe semaliu mwaani mwosiuwe. Iwe nge Yaato iwe ha mele re gale seoriu be fitiyale. Iwe nge ye toaro laiure. Ikela shagiu mele ka re sa gale geffagolo be laiure iwe umwane me yaffi. Ila shagiu yaali Yoolo yengaang iwe biili. Iwe nge Yaato iwe gameotali shagiu mwongo be gelaare umwane me yaffi.

Iwe nge woali taboli faliuw we setabo iwe ye logo semaliu shoabuto iyang, iwe itale Lipirago. Ye tai toulap gane mwongo iiye me sari kawe weneoiule. Ila shagiu bangiiyale iwe niboliu. Ila shagiu gelaare iwe leeli me pawolo me gashi memi.

Picture

Serane nge ye sa liuwaneey be ye bele lago niboliu. "I bele lago niboliu nge gai sa gefaniiye shagiu be gai te gangi leli kela gelai lani gapworou la ye chengagi faali mwaluumwu." Yale gaaingeliire mele kawe weneiule.

Picture

Picture

Yato we ye lago nge mele we ye sari iwe ye masiuriu. Ye sa masiuriu masiuriu yee ye lago mmate nge ye biitage taangi be ye sa pechaaiu. Mele we bisile iwe ye togofaiiy ye sa gashipe fetaleey nge ye taai shipe. Ye gasi shagiu sefaiu leli we ganeey be gane iwe nge ye mwashiu shipe lago.

Re sa logo fetale yee ye lago tefali togo Lipirago nge mele we ye tugofaiiye ye sa gaaingeli be ye taai logo sefaiu leli we gane be ye sa ganeeye sari we be gane. Iwe shagiu nge ye sige lago.

Picture

Ye sa gasi ye sa buutogo liiye mele we ye tugofaiiye. Ye sa liiye liiye yee fai yale ngas shagiu mele ye tai gashiuwa nge ye gashewaiu nigetame. Iwe nge ye bale gasi iwe ye chile sekiute nge ye bale liiye. Ye bale foori ngali shagiu tapili mele we ye foori ngali iwe ye tugofaiiye, bale gashewaiu nigetame.

Mauweshe kawe re sa wolo yee ye lago piungiu togo semwoiu goshoou. Re sa shimwe tage shagiu nge re buutogo paali mele we bisiire re sa lago. Ligita tiwe imwe we me mele we sileere.

Re sa faragi faragi yee re lago shuungi sefasho baibaye iwe ye gale sefaiu lago shagiu uwale. Mele we ye tugofaiiye ye sa gaainegeliire be re be weti be ye be giliiye tiwe mele we be gelaare. Ye gamwongo ngaliire shagiu nge re bale faragi.

Picture

Re sa bale faragi faragi yee bale lago shuungi bale sefasho baibaye iwe riuwefaiu mele we uwale. Mele we ye tugofaiiy ye sa bale giliiy bale gamwongo ngaliire shagiu mele kawe weli bisile nge re bale faragi.

Re sa faragi faragi yee woali mele we imweli Yoolo me Yaato nge re buutogo siu lago liugiule. Ila mele we re lago fanago, yeeki, matemetali waliuweliu kawe si gale gekangi uwale nge ye sheogiu. Liugiuli imwe we nge ye wolo fengani iige me tipeli maai me bulage me wooto le ligiteli gani umwane me yaffi.

Picture

Picture

Re matto tiwe shagiu mauweshe kawe nge re mwongo. Re shiuweli mwomwongo nge ye sa toowaiu Yaato me lani imwe we. Ye buuweiu shagiu nge ye buuweiu fitegi ngaliire be re tewai gangi mele kawe gani umwane me yaffi kawe weneoiule.

Sari we ye tugofaiye ye sa gaaingeli be ye tewai ssongo nge iire ila ye taai mwele gemaase yaare pechaiu ila faale mele re sa gangi mele kawe iyang. Ye sa gaaingeli Yaato ilegili mele kawe mele we sileere ye foori ngaliire.

Ye sa faseongiure nge ye sa seoriu be: "Gai buutogo tabeyai. I bele gamwongo gami nge gai tewaai lago siebiuleoiu be gai bele logo be wennei. I tipeli gemaseeye be ye be yoro lai sari iwe nge iye ye toaro. Ila faale mele i sa geffagolo lai yaffi me umwane "iyang."

Ye sa gasiire be ye sa lago gatiutiure. Re mano nge ye buutogo gamwongooro. Re manoli mwongo nge ye paliire long nimwe be ye sa buulongo gemasiuriure lago.

Picture

Iga yaffi me umwane re rongorongo mele kawe Yaato ye gekangeliire sari kawe nge re sige lago iyang. Re sa liuwaneeye be bongile we nge re sa buutogo giure sari kawe.

Yaato ye giula be yaffi me umwane re bele sige woaro sari kawe. Iwe ye sa gateoiyeliire nge ye sa gaingeliire be iiye ila ye tewaai mwele yaale gammweleere iire yaffi me umwane iwe me sari kawe.

Re sa fasiuli giula be serane nge Yaato ye be lago shungi tapili melele. Re sa fasiuli giula be serane nge Yaato ila yetewai mweleli gamwongoore. Iwe nge ila ye tewai mwele be re be siutage shagiu nge re lago le re tewai gaaingeli Yaato be ye sa gashingeshige. Iwe nge iteoiu ye be gaaingeli iga ilegiire nge re tagiula kepate. Iwe ila semaliu nge ye sa giula shagiu be semaliu nge ye lago nibogootale ye sa mwashiu lago taangi iyang.

Picture

Yoolo iwe ye ta logo be ye lago biili iiye rane we. Ila mele we ye lago tefaali nge ye sa giula be yoro mele ye sa weli. Ilegili rane iga ye be tefaali nge yaffi me umwane kawe re gale magi togo liugiuli fale we. Rane we nge ye taai ssemaliu mwo le ye buutogo.

Ila mele we ye sa sige ye sa biitage nimwe. "Metta mele ye sa weli?" Yaale gassiya Yaato. "Ye feita ilegili rane nge i be tefaali nge yaff me umwane re gale buutogo nge raaleiye nge iye re taai buutogo?

"I sa gaaingeliire be re bele lago." yaale seoriu Yaato. "Semaliu nge ye lago ffagi fetale mele ye be mwele iyang, be gangiu nge i tewaai mwele be i be gamwongooro iire nge i bale gamwongooro sari kamwu re logo nimwe."

Picture

Ila mele we Yoolo ye lago toolongo lani imwe we nge ye buulong weriire sari kawe, iwe shagiu nge ye kere lago. Ye sa buuweiu gekebate fetale liugiulimwe, nge ye gewai Yaato be ye be gatiri mwongo kawe be re bele pechaiu sari kawe. Iwe shagiu nge ye biitiwe nifale be ye sa biitiwe gasini tage iige kawe gono. Ye sa biitage gameoto.

Picture

Ila mele we re sa logo yee serane nge ye lago buutogo gaale we Lipirago be shoali tingoaroli yale yafi. Ila mele we ye buutogo weriire sari kawe nge ye riusiu tage reere be iga we re sa farigikiti.

"Yee rei mauwesh re wennei. "mwaliyeli Lipirago." I sa maseli yaai paketi gami nge gaami gai taai gale yemwariyei. Gai buutogo rei mauweshe be si bele lago reeli imwe we imwashe."

"Yeeb, gai tewai taboogo," mwaliyeli mele we ye tugofaiye. "Geele mele go be buutogo remami be gamami ila gai sa fageore shoa ka re sa bale gashigeshige ngali gemami. Ila go bele lago boongeiye, laiu nge go sa buutogo remami igeiye.

Iwe shagiu nge gaale we Lipirago ye tefaali be ye sa lago reeli imwe we imwale. Ye lago nisoro shagiu nge ye tefaali be ye sa buutogo logo lago reere mele kawe weneoiule. Yoolo me Yaato iwe ye sa kere lago tipeere be ye sa yoro lago laiure. Lipirago iwe ye bale kere be sari kawe weneoiule re tai gangewa lago me mwirili igawe ye liire.