written by Joseph Yarofaisaf
illustrated by Dexter Doi

Woali faliuwe yeele ila ye logo semaliu mwaale iyange le itale Bashuguweiu. Semaliu yaliusiu iiye mwaale yeele. Ye toaro paiule me pesheele.

Ye sa logo nge ye niuniuwane fetaleeye mele ye be fori ngaliire yaremetali faliuwe we nge re sa mase.

Ye ssiuyelai lago nge ye sa mwaashiu giula mele ye be foori, ye bele gapechaaiure yaremetali faliuwe we.

Iwe nge woali iiye faliuwe we iwe ye toaro mwongoolo. Shoo shagiu me iige me liu mele re malewaagili. Iwe nge bale mwaashiu mwirili maliumeoliu, ila yaremate re gachiga liu be ye te tewasi.

Iwe nge yaliusiu we iwe ye sa mangiiye be ye bele pirafe liu me shoo.

Ye be nibongi nge ye sa gale gemwaliyeliya mele we paiule me pesheele. Ye gale gemwaliyeliya shagiu nge ye buuweiu mele kawe paiule me pesheele.

Iwe shagiu nge ye gasi saariu we yaale me tali we nge ye lago seogiuseogiu liu nge ye gake shoo nge ye lago lubaagili.

Ye bele lago nisoro ila mele we ye taai yoro lago uwaali selifasho gare faafasho liu kawe. Iwe ngo shoo mwo nge ye bale toaro lago.

Ye sa iwe shagiu ssengali mwaale we. Pirafe shagiu liu me shoo nge ye lago nibaagi lago.

Ye logo semaliu tarimwale me bale semaliu tarimwaale maareyarele. Ila mele we re sa liuwaneeye be iire mele re bele lago mmesa maliu mwashogo we.

Bongile we nge re sa neogiu fengani be re bele lago faaragi fetale. Re sa faaragi faaragi yee liugiuli imwe we imweli Bashuguweiu nge re buutogo siu lago iyange.

"Iteoiu imwu ye logo reeli Bashuguweiu imwu ye gale mmwaliyeliye ngali?" Tarimwaale we laiuli tamweoliu ye gassiya mele we maareyarele. "Itegiula, si ya lago piipiiye." Mwaliyeli tarimwaale we.

Re sa lago gammelangi longo lani imwe we nge re weri Bashuguweiu be ye gale gemwaliyeliya mele kawe paiule me pesheele.

"Bashuguweiu, bashuguweiu, pai, pai, bashuguweiu." Iwe nge ye buuweiu melekawe paiule. "Bashuguweiu, bashuguweiu, pesheei, pesheei, bashuguweiu. Iwe nge ye buuweiu mele kawe pesheele.

Gaale kawe riuwemaliu iwe re sa mmesa shagiu. Re sa piipiiye shagiu be iwe ye buuweiu shagiu mele kawe paiule me pesheele nge ye gasi saariu we yaale me tali we nge ye bale faragi.

Gaale kawe re sa tabeeye shagiu yee ye lago teotage shiuli sefasho liu kawe nge re ligiti. Re sa lago masiuriu lago

Nisoro shagiu nge re sa buutogo gaaingeliire mwaale mele kawe re weri bongile we. "Si ya gale gemmwashogo fetale nge si tegiula be yaremate we ye toaro paiule me pesheele mele ye gale pippirafe nibongi." Mwaliyeere tarimwaale kawe riuwemaliu.

Tamweoliu we ye sa gaingeliire mwaale be semaliu nge ye tape weliuwale ubuto. Bongile we mele re bele shageeye lago yaliusiu we.

Re sa magi lago mwaale be semaliu nge ye lago ffagi fetale laiule tawi, me mwerale ubuto. Re sa gemalemale ngali shagiu bongile we.

Re sa logo yee bongi lago. Tarimwaale we laiuli tamweoliu me mele we maareyarele re sa bale lago mmesa yaliusiu we. Mele we re giula shagiu be yaliusiu we ye gemwaliyeliya mele kawe paiule me pesheele nge re lago faseongiure mwaale kawe semweoiu.

Ila mele we re sa magitogo shagiu mmesa be iwe ye bale buuweiu shagiu mele kawe paiule me pesheele nge ye bale gasi sariu we yaale me tali we nge ye faragi.

Iire iwe re sa tettabeeye lago mwirile. Yaliusiu we iwe ye sa faaragi faaragi yee reeli sefasho liu nge ye buutogo teotage shiule. Ye sa biitage teogini mele kawe uwale.

Mwaale kawe re sseogiu faali liu we be re sa wewweti shagiu. Ye sa teotiwe teotiwe mauweshe we yee biitiwe siu lago faale. Nge ye la peiki ila mele we re sa kebaliyeliiye.

Nge ye sa gekebate be ye metagiu ubute kawe re sa gauweliuwe iyange mwaale kawe. Nge iire mwaale kawe re sa bale gekebate nge re gangiungiu tawi kawe laiure.

Mauweshe we ye sa rigi baliyeli fetale. Nge iire iwe re sa gangiu shagiu tawi we nge re gekebate nge re geshaabulo.

Yaliusiu we ye niutiu fetale shagiu yee ye nange tage shagiu me nipuweere shoa toulape we yaliyeli lago. Toaro le ye giula biuleiu le ye yali lago iyange. Semeoiu re seoriu be ye lago ffasho woali langili gesape lago.