PDF version (75k)

Picture

written by Tino Uolai
illustrated by John Lennon

Picture

Seewe faliuwe iwe ye toulape mwongo iyange. Ilegiire yaremate nge re mesaige. Mwaale re gale lago fita nge shoabuto re gale lago nibeoliu. Yaremetali faliuwe we iwe ye waires be re be pechaaiu be ye toulape gelaare mwongo. Mele we tamweoniu faliuwe we ye bale ilegili gachiu gemase tipale.

Semaliu tarimwaale iwe laiuli tamweoliu we iwe ye ilegili shangi. Ye gale logo shagiu lani fale we fani tamweoliu we temale. Ye tai gale yengange be mele we temale ye tai tipeli. Re gale gake togo shagiu gane.

Yaremetali faliuwe we re sa gekapeta tarimwaale we be ye gaagu nge ye tammwele be re be gaaingeli be re metagiu tamweoliu we temale. Mwaale tugofai kawe re gale bale gekamatefa tamweoliu we re sa mwaliyeliye ngali reeli kofali tarimwaale we laiule. Re sa gaaingeli be ye tewai gale iseli sheogiu niimwe. Tamweoliu we ye tai tettalinge. Tarimwaale kawe wechiyane me yaale tare ikawe re sa magili fitiyetiye nge iiye ye toaro fitiyale be ye toaro le ye mweshali fitiyeli be igawe ye tai gale yengaange. Tarimwaale we ye tai bale tipale be ye be gaaingeli tamweoliu we temale be ye be ffagi fitiyale be ye ma be ye giula be ye toaro le ye gachiuwe. Ye sa tingoaroowe mele we temale be ye be gale lago tabeere tarimwaale reeli uuru me yengaange nge mele we temale ye tamweshali.

Semaliu shoabuto tugofai iwe ye logo liugiuliu faliuwe we. Ye mile semaliu sarishoabuto laiule. Iine lago shagiu mele re gale logo peigili faliuwe we me peigi we sepeigi. Ye toaro mwaaleere. Shoali faliuwe we iwe re tai gale lago peigi we be re seoriu be bugotali yaliusiu. Ye toaro le ye gaaingeli tarimwaale we laiuliu tamweoliu.

Picture

Picture

Serane nge mwaale re sa lago fita. Re fita lago shagiu nge ye sa lago kaile togo yaangi nge ye sa bale loa. Re taai mmweleli fita. Re gasi sheogiu re sa tefaali.

Re lago gola togo faliuwe nge ye sa kaile gemase lago yaangi nge loa iwe ye sa bale kaile. Waliuweliu, si be seoriu be liu, maai, me matemetale nge re sa memmwoacho fengani. Shoabuto me saari iwe re sa rigi ngaanga fengani. Iimwe iwe ye sa bale magili piungiu fengani. Yaremate re sa mwoalo fetale weli peigile me lani imwe ka ye shiuweli mmwele seokiuteo. Sheoliu waliuweliu me pesipesi iwe re sa biitage yali fengani lani laangi. Loa iwe ye sa biitage foasho liuweniu faliuwe. Yaalo iwe ye taai nage be ye sa roshooppiungiu lago lani laangi. Goshou iwe ye sa weeye shagiu be shaliu gesessere tiwe me lani laangi reeli umwulepale.

Ye sa iwe shagiu yee ye lago riuwabongi nge ye lago chibe lago langi we. Ye sa toaro lago yaangi me goshou nge loa we ye sa bale gitigiiti lago. Yaalo ye sa bale tiuleo tefaali lago.

Tamweoliu we ye sa buutogo gateoiuyeliire yaremetali faliuwe we. Ye sa gaaingeliire be ra bele logo shagiu seebiuleoiu be re be giula fenganiire shagiu.

Ilegili mwongo kawe gelaare nge iwe ye sa ttewasi lago reeli langi we. Ye sa mase lago bulage, ye taai yoro lago liu me maai. Iige mele we re sa melawe iyange. Ye sa ila ssengali kofali peigili faliuwe we re logo iyange.

Peigili faliuwe we shoabuto tugofai we me mele we laiule re logo iyange iwe ye tai kaile yaale ttewasi. Ye toaro yaremate le ye mweshali lago iyange be iwe re seoriu be bogotali yaliusiu.

Ilegiire yaremetali faliuwe we nge re sa logo shagiu lani seewe faale. Ye be gale yogo ngali semaliu seokiuteo mwongo nge re sa gale gemakiu woaro.

Serane nge mele we laiuliu tamweoliu le ye tagiula kofale gare yooro yaliusiu peige we sepeigi gare metta, ye sa toowaiu sheogiu me nifale nge ye faaragi. Ye sa baani lago peigi we re gale seoriu be bugotali yaliusiu. Ye sa lago gola iiye biuleoiu we nge ye toaro yaremate le ye weri.Ye sa fale fetale yee ye lago fale lago nge ye sa weri seewe buraago be ye tittinge tage me liuweniu waliuweliu. Ye sa tabeeye lago yee ye lago piungiu tage woali seewe iimwe. Ye lago garepa togo nge ye sa weri semaliu shoabuto tugofai be ye ffoori mwongo faali mwaluumwu. Ye sa liuwaneeye gare ye be iteoiu mele we.

Tarimwaale we ye sa gassiya gare ye tewai mweshali ganeeye gane mwongo kawe. Tugofai we ye sa fange gane mwongo kawe. Ye sa kere tarimwaale we.

Ye sa mwongo yee ye lago mattiu gachiu lago nge ye sa gassiya tugofai we gare ye tai bale yoro le ye bale logo reele. Tugofai we ye sa gaaingeli be ye logo semaliu shoabuto laiule ila ye masiuriu niiwe.

Tarimwaale we ye sa lago piipiiye. Ye lago weri nge ye gachiuwe. Ye sa tingoaroowe tugofai we be ye be gasi be fitiyale nge tugofai we ye mweshali. Re sa buutogo fitiyetiye lago.

Tarimwaale we ye sa gaaingeli tugofai we kofali mele we temale me yaremetali faliuwe we. Tugofai we ye sa fageoreo. Ye sa gaaingeliire mwaale we me shoabuto we fitiyale be re be tepangi reeli ffoorili mwongo.

Re sa ffoori toulape tiwe mwongo. Ye lago meraattage nge re lago mano lago nge tugofai we ye sa gaaingeli tarimwaale we be ye tefaali tiwe reeli mele we temale be ye be lago gaaingeli be ye be fange tage yaremate be shoali gekali mwongo.

Tarimwaale we ye sa lago. Ye sa lago reeli mel we temale. Mele we temale ye sa mesaige be ye sa tefaali tarimwaale we. Ye sa gassiya tarimwaale we gare iiya mele ye lago iyange. Tarimwaale we ye sa gaaingeli. Mele we temale ye sa gaaingeli be mali yaliusiu shoabuto tugofai we. Tarimwaale we ye sa seoriu be menaale ila yaremate nge gare yaliusiu nge ila nge semaliu yaliusiu gachiu. Ye sa bale gaaingeli mele we temale kofali shoabuto we fitiyale Ye sa bale seoriu kofali mwongo kawe me shoali gekale.

Re sa buutogo tteoiuye nge mwaale kawe yaare re sa gaaingeli tamweoliu we be ye taai yoro gelaare mwongo ila male be ye gachiu iga re bele tabeeye mele we mwaliyeli mwaale we laiule. Semeoiu re sa tabeeye tarimwaale we iwe re sa lago gake togo mwongo.

Shoabuto tugofai we ye sa bale ganeere yaare fato matematali waliuweliu. Tarimwaale we ye sa gale tepangiire yaremate reeli faato. Yaremate re sa mwaashiu giula lago be tarimwale we ye tai gaagu. Re sa yatemagili reeli yengaange yee ye lago bale gachiu tefaali togo faliuwe we.

Picture

Picture

Tamweoliu we ye sa kere be re sa mmwele yaremate. Ye sa bale kere be ye sa yoro fitiyeli mele we laiule. Tugofai shoabuto we ye sa kere be ye sa yoro fitiyeli shoabuto we laiule. Tarimwaale we laiuliu tamweoliu ye sa kere be ye sa yoro fitiyale nge yaremate re sa gachiuwe be igawe gare tai bono iiye nge re tewai mmwele.

Tamweoliu we ye sa mwaashiu mangimengi lago nge mali ye gachiu gare ye talinga mwaliyeere mwaale kawe. Ila nge mele we laiule ye be tirili foorini semweoiu male gachiu gare ye tepangiire yaremetali mele we faliuweere.