PDF version (490k)

Picture

translated by Joseph Yarofaisaf
illustrated by Donald L. Buchholz

Picture

Gai piipiiye ngeoliu kaale. Metta mele ka gai weri? Ye ifa ssengali tigitigiire maliu kaale? Maliu kaale ila re tipeli be re be gatittigi. Gatittigi metta mele gai liuwaneeye be re be googo?

Picture

Ye nogologo semaliu tangki reeli seewe laaliso. Ilegili rane nge mwaana ye nogologo reele ye gale gegari reeli gaiuweferali tuutuuli shoo. Ye sa gachiu lepali ssiuyelaili yaale foffoori tapili yengaange yeele. Ye sa giula be mwaale we ye nogologo reele ye taai iyeli gachiuwe. Iwe rane we serane nge ye gasi rigi tangi laaliso we ye nogologo iyange.

Picture

Ye sa rigi lago taboli faliuwe we Bremen itale. Ye tiwegili shagiu be ye be lago weriweri yaale yengaange me Bremen geramwo me iiye shoali gatittigi. Woali yaale feffaaragi lago nge ye la shiungi seewe gelaagu. Ye sa ilegili peeyeou gemase gelaagu we reeli yale rigi. "Metta go sa peeyeou gemase iyange?" Tangki we ye gassiya gelaagu we.

Picture

"I liuniuwaneeye," mwaliyeli gelaagu we. "Nge igela nge i sa ngawe. I taai gachiu reeli fitegi. Shoa kela i logo reere re sa mini be re bele liiyei lago. Ila mene i sa rigi lago iyange."

Picture

"Weti be i be gaaingelugo," mwaliyeli tangki we. "Gangiu ila i be lago Bremen be i be lago gatittigi. Buutogo tabeeyai be si be gale lago gatittigi." Ye sa mesaaige lago gelaagu we ye sa tabeeye tangki we.

Picture

Ye tai ttaawe lago mwo yaare faaragi nge re lago shuungi seewe gaattu. Gaattu we iwe ye matto be ye sa ngiushiu. "Metta go ffoori gaattu mwuulo? Ye feita ye weeye be go ngiushiu lago shagiu?" Yaale gassiye tangki we.

Picture

"I be gaaingeli gemi, iteoiu ye be kere iga re be farogi lago shapiliuwale," Mwaliyeli gaattu we. "I sa tugofaiye nge ye taai kengi mele ka ngii. Tipei be i bele matto shagiu getaali yefi be i be beshikare. Nge mwaana i nogologo reele ye sa mini ye bele liiyei lago be i taai gale chage geeshi me reeli imwe la imwale.

Picture

"Buutogo tabeegemami," mwaliyeli tangki we. "Go be tabeegemami be si be lago logo be giishe shoali gatittigi." Gaattu we ye la liuniuwaneeye mele we nge mali seewe liuniuwane gachiu mele we. Iwe shagiu nge ye sa tabeeye tangki we me gelaagu we. Re sa faaragi me re selimeoliu. Ye tai bale ttaawe lago mwo yaare faaragi nge re la shuungi seewe guruli maliuge. Gaale we maliuge iwe ye upe woali iiye guru we le ye sa gekareta lago yaale keokeo.

Picture

"I taai bale liugiuliugiu lago mwo reeli keokeo la. Metta ye bele tewa lago faiuliu talingei," mwaliyeli tangki we. "Metta go foori?"

"I sa fasiuli gagiulali ngaliire shoali imwe yeele. Iga ye be yoro shoa buutogo reere nge re bele liiyei lago be re be gatuulayai. Ila mene i sa gekareta ngali yaai gekebate be iga i tewaai gekebate lago be ye tewaai yoro lago shapiliuwei."

Picture

"Mali ye gachiu iga go be tabeegemami," mwaliyeere maliu kawe selimeoliu." Ye ilegili gachiu lani worongamwu reeli gekebate. Buutogo be go pwale tabeegemami." Maliuge we ye sa bale mesaige tage reere maliu kawe selimeoliu iwe ye sa tabeere.

Picture

Ye shiuweli ttaawe Bremen ila re tewai gola shagiu me rane we. Iwe ila ye teiti bongi mwo nge re sa lago liuweniu waliuweliu. Re sa meni re bele masiuriu mwo iiye biuleiu gawe. Tangki we me gelaagu we re sa masiuriu faali sefasho waliuweliu farigiti. Gaattu we ye masiuriu woali raali waliuweliu we nge maliuge we ye sa yali tage lessiyabolo be ila mene laniyale.

Picture

Iga re la gachiu lago nge re sa gekebate long lani imwe we, semaliu me yaale gekebate. Re mano nge re sa toolongo lani imwe we. Iga maliu mwashogo kawe re rongorongo shagiu gachorongo we nge re rigi tangi imwe we. Re toolongo shagiu iire maliu kawe faamaliu nge re buulongo guubulo lago lani imwe we.

Picture

Ilegiire nge re sa tabeeye taremali gapwulo we weriyeli maliuge. Iga re la gola togo imwe we nge tangki ye sa lago gammelangi long me lani piletoa we.

"Ye gachiu iga si be shiuwe me igeiye," Mwaliyeli tangki we. "Ye te wai gachiu iga si be masiuriu iyange."

Picture

"Metta mele go weri?" gelaagu we ye gassiye.

"Be metta i weri? Ye toulape matemetali mwongo me mele ka si gale iuliu woali teebolo laale. Re bale logo maliu mwashogo kawe le re iuliuliu nge re mwommwongo."

"Fari gabele nge gelashe." Mwaliyeli maliuge we.

"Ngoa be gare giishe mele si logo igei nge ye be gachiu," Mwaliyeli tangki we.

Picture

Picture

Yooro yaare liuniuwane maliu kaale. Re be shageere waiu maliu mwashogo kawe me lani imwe we. Metta mele yaare liuniuwane maliu kaale?

Re sa liuwane fenganiiye gare ye be ifa ssengali yaare shageere waiu maliu mwashogo kawe. Re sa giula mele re be foori.

Tangki we ye sa siu tage lani ppali piletoa we be ye farimwosho. Gelaagu we ye sa teo tage woali taguriule. Gaattu we ye sa siu tage woali gelaagu we. Maliuge we mele garetale me wettegiyate.

Picture

Iga re la gachiu lago nge re sa gekebate long lani imwe we, semaliu me yaale gekebate. Re mano nge re sa toolong lani imwe we. Iga maliu mwashogo kawe re rongorongo shagiu gachorong we nge re rigi tangi imwe we. Re toolong shagiu iire maliu kawe faamaliu nge re buulong guubulo lago lani imwe we.

Picture

Iga re matiu, nge semaliu nge ye ffagi laniyale. Gaattiu we ye sa lago wolo getaali yefi. Gelaagu ye sa lago wolo ppali getame. Maliuge ye masiuriu weliimwe. Tangki ye wolo weli poa. Re sa ilegili kere maliu kaale. Re sa masiuriu.

Picture

Iga ye bongi taawe lago nge maliu mwashogo kawe re sa giula be ye taai pwulo gapwuleli imwe we. Semaliu me liuweniure ye sa seoriu be: "Metta si la rigi tangi imwashe iyange?" Semaliu me liuweniure ye sa lago piipiiye imwe we.

Picture

Iga ye lago toolongo faali mwaliumwu be ye be lago gapwula gapwulo nge ye sa weri pwulowaiuli metali gaattu we. Ye gemaasi be giuli koalo. Gaattu we ye gemaasi be re gale uru ngali. Ye mmuso tageeye shagiu mwaale we biitage baigeoreowe. Mwaale we ye sa gekebate lago.

Picture

Ye sa rigi ngali getame we nge gelaagiu we ye biitage giuwe mele we pesheele. Tangki we ye sa faati, nge maliuge we ye sa fileeye. Ye niutiu weiu shagiu mwaale we nge ye lago gaaingeliire mele kawe we shoali waale be: "Ye ilegili gammetagiu imwe laale." Re taai mweshaali logo reeli imwe we. Maliu kawe re sa ilegili kere be ye sa yoro imweere.

Picture

"Yooro yaliusiu lani imwe laale," mwaliyeli maliu mwashogo we. "Semaliu ila ye matto lani imwe laale le ye niutiu tage woai nge ye baigeoreowai reeli mele kela kiule le farimwommwsho, semaliu ila ye siu metali getame le ye gasi sepeo saariu le ye touu ngali pesheei. Woali pao we ye logo semaliu maliu gammetagiu le ye rosho tapiungiupiungiu, iiye mele ye wauti ngaliyei seewe ira. Iwe nge woali imwe we ye matto mena yaare tameoliu iyange le ye gale seoriu be: "Gai gasi togo reei maliu mwashogo la. Ila shagiu nge maliu mwashogo kawe re taai mweshali lago reeli imwe we imweere.

Picture

Picture

Ye iyele ssenali ulunnure maliu ka re logo lani fiyango yeele.

Picture

Ye iyele ssengali yaale liuniuwane maliu mwashogo we be ye weri. Gai tei gale metagiu reeli ngeongeoli mele ka gai teiti gale weri mwo? Gai fiyangoowe mele ka gai sa weri.