YIG WE MA HAMMWALYAEY

translated by Mariano Laimoh
illustrated by Eric Woo

Ngaaeng semael yig paelleng. Iy mae mel fadal choeg lugul yoch. Iy mae tattawe fedaeley choeg metaeliyoch. Iy mae mongoay fadal choeg lugul yoch.

Iy be sar kkoeloah choeg ngoa sa mmaengdoh yig kowe re ppaaechigchig. Haasefaeluy yaael hallayuur yig kowe re ppaaechigchig. Iy hallayuur yig kowe re ppaaechigchig boa be hal seew choeg sossor ngoa re sa ssog loah lal mele yeway.

Yoor semat yig lea re ma hammwalyaey. Re ma hangi semat luumw lea ma dao uwooay lea iy mae faeying iyang.

Ye mwomwaay makala ddoeleear ir meeach yig kea re ma hammwalyaey. Iy be wiriir choeg ngoa sa mwomwaay depey. Iwe ngoa iy be le yil loah ireer.

Re be wiriyey choeg ngoa re sa golae boa iy sae dipili lea re be hachuyae iy lumw kowe uwooay. Iwe ngoa re belea guudoh hangi iy lumw kowe uwooay.

Iy hammwaayu yod kowe re ma hachuyae lumw kowe uwooay boa iy mae boo iyang.

Iir yig kea re golae boa iy towe lliir. Haraamwo melwe re lellepael choeg yig kowe iy mae mongoay ngoa iy golae. Iy mae golae choeg mele ir yig kowe moa luwelluur paangaaer metmetael yiig.

Re be buudoh kiliili lumw kowe uwooay ngoa lal mele yeway ngoa re ma buulaong iyang. Iwe ngoa iy mae golae choeg lea iy towe gusuur.

Re yolbuw ir yig kea boa iy bele kakkangiir semat moa semat yig ppaaechigchig, ngoa ir iwe ye luglugloah depeear boa iy towe lliir. Re golae lea iy be lliir ngoa tayor lea be ma hachuyae lumw kowe uwooay.

Lepal ssuulayel yaaey yiliil fadal choeg metael yoch le ngoa lepal yaaey golae lea be tooar loah semat yiig ngoa be wa tooar loah semat yiig.

Sa chooaloap taeppel yig kowe lea re sa mes boa chooal fetae re sa fetae giliir loah yig kowe re ma kakkangi lumw kowe uwooar. Iwe re sa mes boa taayor mele re be hangi.

Lepal yaaey luwalley ngoa lepal yaal kkeeal loah depey lea semat yiig ngoa re moaloaw lea yaegel yig lae semat. Hare be tooar loah yig lae semat ilae ngoa re be mes yig kea semat.

ACTIVITIES

1. Sungali yooangoal semael yig kala ma hangiir toeet yig kowe re ppaaechigchig. Be yoh lea ho be soer idel sooelboes moa sooelboes moa uwooal yig lae?

2. Tafadiy idel soelmat yig kala ho golae lea ma mongoay yooch. Tafa idel semat ikala ma mongoay yig ppaaechigchig.

3. Soeloed moa wooal seew yooch, yaremat re ma toa yaefiyef choeg yig kowe ye ppaalingling moa iyang. Taeyi ssuulay ngoa yaremat re sa chapi taar teptaep kolooraaks. La raeg we seew, taay ssemael mwo yig kowe ye paelleng lea re chiil ma wiri moa loebooes we. Medae mele ho chicchiy ngoa re sa ddaer yig kea iyang?

4. Ho be la duudu seral ngoa ho sa ddulong ho sa taelngae faael taaed. Yoor mele ho rongrong yalool? Medae mele ho chicchiy ngoa ye ma cchingching faael taaed?

5. Semael mwaal ye la doodow sa la wiri limmael yig lengchel seew faaes. Limmael re sa wa buudoh ireer yig kowe. Sa faedmael paangeear yig kowe?

6. Sa yor seral lea ho la dooadow? Medae mele ho ma toa hola? Medae mele ho ma toa paapa?

7. Medae semat fetae lea ho chicchiy ngoa ye hartal mwomwaay lea yaremat re be ma faaoru? Boa?

8. Medae semat fetae kea lea ho hartal dipili:

dooadow
wuug
biyow
kolooraaks