translated by Mariano Laimoh
drawings by Joy Goodenow

Semael yaeliweech tarmwaal moa mala sil. Re ma mel wooal seew fuluy lea ye mwitiyal. Iy fuluy we ilae seew makala daaongoechoel Fooalpey. Wooal iy fuluy we, si towe golae boa yoor yaremat iyang boa ye baaliyelloah irel maeliil. Malboa ha sa mwooal wiri maeliil kowe wooal Yaap. Wooal iy fuluy we, ye mel ruwow taeyit, hare hooahoyaael lea ye mel loechoechooel. Seew ye taegiyet, ngoa seew ye sar toattoal.

Iy tarmwaal we, mwooach fusuw lepal raegel. Iwe ngoa iy melwe sil, sa yilooelaep yilooelaep. Re ma mel wooal iy fuluy we faeluyeear, ngoa be foedow loah raaeg ngoa re mwooach la tefaael moa ireer mokowe chooal bugateear. Ir mokowe yaremateear, re ma memmel moa wooal halognol Fooalpey. Ha chicchiy hare wochoeg boa haami yaeliweech le irel yodle mwooach fusuw lepal raegel. Ha be wochoeg iy lea ye ma nngaech laoh choeg?

Tea yaael choeg tarmwaal we choeg nngaech mele ye haffoahoay iyang. Ye wa haffoahoay irel ffaegel haleear mongoay. Ye chooaloap mongoay wooal iy fuluy we, ngoa kakkaldoh irel melwe imeear moa haffaaoroel mele ye wa der meeachwe iyang. Iwe, re sa ma mongoay choeg beeabaaey, moa maaey, moa yiig, iwe ngoa faael kkasseew ngoa sa yoah ngali semael maeloeg. Hare ye buyoey sa le faedfed fedal haleear. Paangal metmetael faaormel ngoa iy yilooelaep we sil sa haskuuna ngali.

Ye sa wa golae faaoroel wuumw. Melwe sil sa kaaengalu faaoroel wuumw. Melwe ye sa sallap irel paangal faaormel, ngoa paangal ral ngoa ye ma nngaech laoh choeg boa tooar le re be ma kooakomw fedal seew. Be ddiidoh yaal nngaech ngoa meeachwe he lea paali pes we looal re sa biidiy kooakomw fedal wulpiy. Haraamwo melwe re toglae fangalliy faal yaloor ngoa ye woffoaoroel melwe iy pes we ma golae faal mokwe iy tarmwaal we ma kaaengalu.

Paangal ral lea re be hapatpat fangal moa melwe sil ngoa re ma tattawul fangal choeg boa ye taelengbat iy yilooelaep we sil. Iwe ngoa paangal lefhaaef lea re be lea maesoer ngoa iy tarmwaal we ma yaedmaegel choeg boa ye be mwooal maesoer. Ye ma moetaog lea be iy mele ye be ha mwiril maesoer boa yaelus de hametaegu. Iy ye ma lulluwalley ngoa be bong choeg ngoa yaelus re sa daer fedal.

Chiil llemaaeliyel choeg seral ngoa ye sa mmat. Ye sa mesel yaal kkoelaoh. Sa loah sa la yetiddiy mokowe luutugul haleear we ye mel lal had we yaar. Sa giriidiy iy mongoay kowe sa buudoh hafle boa be lea mongoay. Ye la memmeeal lea be mongoay, ngoa woochoeg melwe ye taefel choeg irel seew faaormel. Medae mele ye taefel iyang? Ye taefel boa ye tea yaaoru lea be iy loah choeg sa mongoay. Paangal ral paangal ral ngoa re ma mongoay choeg seew moa melwe sil. Iwe sa foffoaslong irel iy melwe sil boa be buyoey boa re be ffaeg haleear. Sa ffasaengu ffesaengu iy melwe sil ngoa tea mwaliili. Iwe ngoa be kacchoeg hare ye tea mwaliili boa ye tea rongrong boa iwe ye taelengbat. Iwe, sa buulong meeachwe sa la faenglu. Sa yuchgu yuchgu iy yilooelaep we ngoa taay mmat. Ye la kakaffadaaloah, taay nganngas iy melwe sil. Ngoa ye la yaengsi mokowe gumwchul, sa halloefoeng.

Irel yodwe ngoa meeachwe tea dipili lea be chepar lea sa mes melwe sil. Sa ppaey sa kakkal ngal iy melwe sil. Ye pad ssuulaey ngoa sa mwooach chepar loah lea sa mes iy melwe sil. Sa sar buudoh yaal moetaog meeachwe. Sa llas lal mokowe pechallemal ngoa ye woo choeg boa sa mwetarrang loah mokowe yul chemwal. Meeachwe sa mwarro tooet lengchel iy melwe sil sa lulluwal. Taay golae mele be faaoru. Mwooach iwe choeg semael maaes lea iy loah choeg lengchel. Meeachwe sa hachu fangalli yaal rusmes moa moetoag.

Meeachwe taay golae mele be faaoru boa yod we chiil mooaloaw melwe sil ngoa iy choeg mele ya ma kakkaaengalu mele ye be faaoru. Iwe ngoa iy tarmwaal we ye yaaoru choeg melwe ma ir loah choeg moa yilooelaep we mele re ma memmel choeg seew. Sa ppey tooet yee, ye sar pedassuulay ngoa sa luwalley boa be loah irel fuluy we seew boa bela kaaengaluur mikowe chooal bugteear boa sa mes iy yilooelaep we sil. Ye tea dipili boa be ligdi iy mes we. Ngoa tea mele be heeatfae we sa iy loah choeg.

Meeachwe sa luwalley boa be le faedoel loah irel fuluy we seew. Iwe ngoa sa wa der boa, ye mel seyaey wa faedoel waar ngoa ye ttar. Melwe mwo ngoa meeachwe ye loah sa la yurudiy letted. Ye ssegaaeway hataaelpiy we ngoa ye la ssoelfeg loah iy wea we. Iwe sa wa yuru tefaaelidah wooal iy piy we. Sa hasi ttoet mengaaeg sa buudoh hapullae ngal iy tar we ye mel lal tabol wea we. Sa wa hatfaaeliway iy wea we letted. Chiil llech choeg. Iwe sa gerway wooal tabol wea we setab sa la llang loah iy ttar we moa wooal taaed. Iwe sa hasi seew taol irea boa yaal faedoel sa faedoel sa loah. Ye la holaar mokowe chooal bugteear ngoa ye teed kaaengaluur ngoa ir re sa kalloah choeg wooal melwe metal ngoa re sa golae boa yoor mele sa wel ngali. Meeachwe sa mwooach buudoh kaaengaluur boa sa mes iy melwe sil lea luwol yaal tettaeng. Iwe re sa mwooach rool loah re sa la hammwaley fedaeley iy maes we.

Iwe sa mel iy tarmwaal we ngoa towe maeliigli yod we ye mes ngali melwe sil ngoa ir loah choeg. Iwe sa si.