written by Isaac Langal
illustrated by Dexter Doi

Healkowe tarmwal re ma mel woal Sadawal. Mala tamear ir tarmwal kowe haasfaliuy yaal sallap irel biyow. Ir tarmwal kowe loal re sa kkaay ffoarol biyow yee re la gola. Paangearloh ngo re sa sallap irel ffoarol biyow. Tea ffoarol chog biyow mele re gola bo igegel toal biyow mo tafeyel biyow bo be choalop holl ngo puupuwel yoch kala ye ma holl biyow mo iyang, ngal samat mo samat igegel haffaorol biyow, paangal ngo re sa sallap paangear iyang.

Iwe re sa mala biyowloh chog. Paangal rail ngo biyowloh chog bangiyear. Paangal rail lea re bela biyow ngo ma choalop chog holoor. Paangal metametal yig kowe ye mwomwaay ngo re ma hola irel iy biyow kowe layiur. Paangal rail ngo sa mwomwaay chog depear irel iy melwe ma choalop chog holoor.

Sa iwe chog sangal yaar kakattewas chog irel mongoal yig paangal rall. Sa iwe chog sangal yaar ma bibiyowloh chog yee malbo sa ssong yalusul taed ngalir irel yaar lliyloh chog loal taed. Re tea ma buyoy kaek chog halear mo irel iy biyow kowe yaar bo re be buuyoy ngo paangaloh ngo re ma tirgi re sa hasi yig mo iyang iwe ngo re wa toaliu.

La ralawe meseral ngo re sa wa buyoy bo choal biyow. Iwe ngo iy melwe tamear ye dabeer. Iwe re sa buyoy yee lliufiulyel iy loboeswe ye mel iy biyow kowe layiur iyang ngo re la hapangiloh mo iyang. Iwe ngo iy melwe tamear sa kkaengaliur ir mokwe loal bo, "Ha widiyey chog yiuchiul waa bo ngaeng mele iy bela tirgidah biyow kowe loami." Iwe ir tarmwal kowe re sa mel yiuchiul waa ngo iy mwalalap we tamear sa mwus sa loh letted.

Iwe ir tarmwal kowe re sa mel yiuchiul iy waa we waar re re sa widi iy mwalalap we. Iwe iy mwalalap we sa yil sa biidiy yee irel seew iy biyow kowe ngo ye buudoh iyang. Ye la kallong yilal, ye hallos semal yalus iyang.

Melwe ye yilngali ngo iy yalus we sa buyoy mo lal iy biyow we yaal buudoh lliy iy mwalalap we. Iwe ngo ye haltiu mokwe yasel sa hasfangalliy mo iy biyow we sa ssogol yig sa biidah. Sa biidah yee la beadah mo yiulgiul iy wea we. Iwe ngo ye hasi iy yasel kowe sar ngaleer ir tarmwal kowe. Iwe ngo ye yetaddah iy biyow we sa ssogol yiig yiuchiul waa iwe ngo re fadol re sa buulong wolfiuliuy.

Re sa buulong yee re la hola fiuliuy iwe ngo sa kkaengaliur ir tarmwal kowe bo, "Ha hasi yasel lechar kea halay ha be hassidah iroet bo re bela hamadda. Iwe ngo be madd ngo semal hami sa biidiy fasangiuyey mo matalfal bo ngaeng iy bele la sor hammasorloh mwo siugfed bo iy sa piiyew."

Iwe ngo la yodwe ngo ir tarmwal kowe resa sor rok lal depear hare toesol lea iy melwe tamear iy melwe hare semal yalus. Iwe ngo tea yiugiul tiugiul mwaay lal depear iyang. Iwe re sa yiuradah iy waa we waar ngo re haliiliyaloh iy biyow we layiur lal sepal we yaar iwe ngo re hasi iy mokwe holoor mo iy yasel kowe hall iy mwalalap we re sa biidah iroet .

Melwe ir tarmwal kowe re sa biidah iroet ngo iy yalus we sa loh lal iy fal we sa la yol sa kachaparal masor. Sa yol sa chichiy yodwe be mad iy yasel kowe iyang ngo sa biidah bo be hangi ngo ye lliir ir tarmwal kowe bo ye be wa hangiir. Iwe sa ppaiy lal iy fal we sa kakarepech iyang.

Iwe ir tarmwal kowe re sa biidah irel iy melwe bugtear. Re la buudoh healwe haoraoy iye ye mel fael mwuluumw we yaar. Melwe re buudoh chog ngo iy haoraoy we sa soer bo." "Ha hattiuriugiumidoh mo igea. Ha fang yasel kala bo iy be hamadda ngo hami hasa baegiugmi habe chiuy mo woal faliyey bo mwalalap we ye mel matalfal ila tea melwe tammi bo semal legaeselap. "

Iwe iy haoraoy we sa ngaleer sedep mengaeg lea ye chachaa sa kkaengaliur bo, "Iye ha hasi mengaeg le ngo hasa ddar ha be biidah woal Bolwod. Ha be biidah yee tabol Bolwed tabla ye kkatab ngal faliyey iwe ngo ye mel seew peel heangiy lea ye mel iyang. Iwe ngo hasa hasi mengaeg le ha sa toatawo ngali. Bo ye bela gola bo ha taimel woal faliyey lea ye be la biidah lea be mweargumidah iwe ngo ye bela wiri mengeag le ngo ye be kachog bo hami. Hasa gola?" Iwe ngo ir tarmwal kowe re soer bo re sa gola.

Iwe healkowe re sa hasi iy madipil mengaeg we re sa biidah. Resa biidah biidah ye woal Bolwod ngo re buulong. Re la buulong chog mo iy tabwe ye kkatab ngal Sadawal, ye mel iy peel heangiy we iyang. Iwe chog ngo healkowe re hasi chog iy madipil mengaeg we re sa toatawo ngali mokwe raal iy heangiy we we ye kkang we ye siddah.

Iwe ngo iy yalus we sa ppaiy toet matalfal yee la chiy lea belea madd iy yasel kowe hall iwe ngo mwal sa biidah. Sa biidah yee liugiul iy mwuluumw we ngo ye la siuloh mo iyang. Iwe belea soer bo, "'Ooiy, ye seli moatomwoko hochaye liichara?" Iwe ngo iy haoraoy we ye hallos fael iy mwuluumw we ila, "Ye seli moatomwoko," Iwe ngo ye wa tafaeldiy sa la mel matalfal.

Iwe iy yalus we sa ppaiy toet yee ngo ye wa biidah. Liugiul iy mwuluumw we ngo ye la siuloh mo iyang iwe ye wa mwaliliy, "Ye seli moatomwoko hochaye liichara?" Iwe ngo iy haoraoy we ila, "Ye seli moatomwoko." Melwe iy haoraoy we ye soer bo ye seli moatomwoko ngo iy yalus we ye la hattaeplong fael iy mwuluumw we, taichaelmwo yarmat iyang bo iy haoraoy we mele we hallos iyang.

Iwe chog ngo iy yalus we sa soer bo, "Ye seli moatomwoko, ho saal wadhalamw igla.  Madalbo ho sa hacheerloh mokwe hochaay ngo ho soer bo hobe molow." Melwe ye buulong yalus we mo irel hatam we seew ngo haoraoy we sa hachanga yal we yaal sa ppaesway mo lal iy mwuluumw we. Iwe re sa la hafidigi fangalliy mo iy yalus we re sa loh.

Melwe chog ngo haoraoy we sa yal sa yal matloh Mealdew. Sa loh loh yee yalus we sa mmeal chog lea belea hola. Iwe ye ttagiul chog sa yal matloh Yifang. Sa wa loh loh yee yalus we sa wa mmeal chog lea belea hola iwe ngo ye ttagiul chog sa yal matloh Iyoer. Re sa wa loh yee sa wa mmeal chog lea yalus we belea hola iwe ngo ye ttagiul chog sa yal matdah Metarrael. Re sa biidah yee re la yaldoh woal Bolwed. Iwe ngo iy yalus we ye kaldiy sa la wiri iy madipil mengaeg we ye chachaa lea ye fferagloh woal iy heangiy we. Melwe chog ngo yalus we sa ttahcheeloh haoraoy we sa la hasuffod mo lamwayiurrael sala biidiy. Ye wiri chog iy madipil mengaeg we ngo sa kachog bo ir tarmwal kowe. Sa la siugiu chog melwe yawal mo lal laeng sa la biidiy. Sa biidiy biidiy yee la habodaloh iy mengaeg we. Sa liusliusiuyloh iy raal heangiy kowe ye kkang yaal ttar mokwe daal iwe sala kkefloh.

Iwe sa mes iy yalus we ngo ir tarmwal kowe re sa wa chiufangal resa dage iy waa we waar resa tafael ngal Sadawal. Melwe re sa tarag we re sa loloh ngal Satawal ngo iy haoraoy we sa la yaldoh. Sa yaldoh yee lal fangel iy waa we waar ngo ye la yopdiy mo iyang. Iwe ngo sa kassiyar in tarmal kowe bo, "Ifa iy yalus we?" Iwe ngo in re sa soer bo, "Ye sa mes bo ye mmwusdiy luwul peel heangiy sa ddublong mokwe raal lal melwe yawal sa la hachaelloh."

Iwe ngo haoraoy we sa mwoach kkaengaliur bo, "Kamaahoy ye mwomwaay bo hasa mwoach gola lea taikkof lea si be liiliyloh chog mael. Hare si liiliy hattawas yiig bo ma yor riyaal lea ma holagich. Ila paangal rall lea ha bele mala biyow ngo ha bele ma fechae chog lapal yiig lea ha be ma hasi bo halmi ngo sa mwailla yaemi ma hattawas yig."

Faal mele si soer bo hatwe ma hattawas yiig iyang ila mil mala ha bela buyoy feta seral ngo ye choalop chog yig. Bo be buudoh lea habe ma feta hattawas ngo be retloh yig ha bela buyoy feta seral iwe ngo tea wa yor mele ha be hola. Iwe, sa siy mwo yach fiyong igla.