Sibis Yalweech Mo
Seew Koakomw Yaar

retold by Mariano Laimoh
illustrated by Donald Buchholz

Healwe semal tarmwal lea Meterrael mala idal.

Ye mel seew tawi loal.

Seral ngo Meterrael sa hangiungiu iy tawi we loal.

Sa ffasangiurdoh mokwe marereel irel seew hoahoyael.

Mokwe marereel Meterrael re rongrong iy tawi we.

Meldew mo Woatottol re sa hamdaeloh irel iy hoahoyael we.

Ifaeng mo Iyoer re sa wa hamdaeloh. Meldew mele ye mwoal harahlong fael iy hoahoyael we.

Meldew sa soer bo, "Ye haloefong igae. Ye haloefong ngo ye mwomwaay fael hoahoyael le."

Meterrael sa soer bo, "Toar mele iy wiri. Ye ruchuppung fael hoahoyael le." Ifaeng sa soer bo, "Medae semat koakomw lea si be foeriu?" Meterrael sa soer bo, "Te dipmi si be somla melwe fiyongol haatuw mwachoh we? Meldew ble mel bo iy haatuw we." Meldew sa mammal sa soer bo, "Ngo, ngaeng iy be mel bo haatuw we."

Meterrael ye dipli bo re ble chapi yaar koakomw. Re sa rol ttey fangal re sa hatiugili hare be ifae sangal yaar koakomw. Meterrael sa soer bo, "Ifaeng, gel ho be mel bo choal pakkel mael we." Re sa buudoh hatteyli fangali toet yiul waliuwol. Iyoer sa soer, "Sible rol hapalpal irel yiul waliuwol kae." Iwe, ir yalweech kowe re sa chapi yaar koakomw.

Hadal bo sa mel lal tafich we iy haatuw mwachoh we.

Hadal bo sa liulliut fadal ngo ye ngaanga.

Hadal bo sa ssoong iy haatuw mwachoh we, ngo sa wa moetog. Sa ngaanga ngaanga chog.

Sa ngaanga iy haatuw we sa soer bo, "Ha hachiuyaeyey." Sa siuloh iy choal pakkel mael we sa kal tefael. Sa tagiul sa dartefael. Sa liuliuwaley bla hachelahoy iy haatuw mwachoh we. Sa loh sala siugiuloh hatamal iy tafich we.

Haatuw we sa nganga . Sa ssoong ngo sa wa kkoeloh. Sa soer bo, "Iy ble hangiug igla." Iwe ngo iy choal pakkel mael we sa soer bo, "Fael pecheemw ngo ho towe hangiyey. Widiyey bo Si be hapatpat." Haatuw we sa dar ngaeli. Iy haatuw we mo choal pakkel mael we re sa buudoh hapatpat.

Haatuw mwachoh we sa soer bo, "Si be mweri soelmol choal tattelel hapatpat. Ir mele re be hatiugili kofach. Iwe ngo iy golae chog lea re be soer bo iy be hangiug." Re sa chiufangal re sa loh. Re sala mweri ir choal tattalel hapatpat kowe soelmol. Ir choal tattalel hapatpat kowe ilae, mael kowe toet.

Iwe ngo iy choal pakkel mael we sa soer bo, "Yaeb. Chil mel chog semal lea si be kassiyae." Sa mammal iy haatuw we sa soer bo, "Haramwo ngo ye tiugil chog lea iy be hangiug."

Iwe, re sa wa chiufangal re sa loh. Re la wiri iy choal tattalel hapatpat we ngo ye mel yiuchiul sehay irea. Semal mongki iy melwe. Meterrael mele iy mongki we. Re sa hapatpat iy haatuw we mo choal pakkel mael we ngo iy mongki we sa tattalngae. Re la moal irel hapatpat ngo iy mongki we sa soer bo, "Ha paliyeyloh irel iy tafich lae bo iy blae kamaahoy hare kattoes."

Iwe re chiufangal re sa loh irel iy tafich we. Re la hola iy tafich we ngo iy haatuw we sa soer bo, "Ho sa wiri lea kattoes." Iwe ngo iy mongki we sa kkaengaliu bo, "Harahlong lal iy tafich lae. Iy dipli iy be wiri mala wiuliuliumw yaamw matamwoal mel lal tafich lae." Haatuw we ye hasi chog, harahlong lal iy tafich we.

Melwe ye la mel haatuw we lal chomwoal we ngo iy mongki we sa kkaengaliu choal pakkel mael we bo, "Kamaahoy, tayor seral lea haatuw lae be chiil holah." Sa rray iy choal pakkel mael we. Sa soer bo, "Haatuw, tayichaelmwo seral lea ho be chiil soer bo ho be hangiyey." Iy mongki we mo choal pakkel mael we re sa maligli haatuw we ngo hadal bo sa ngaanga iy haatuw we.

Iwe ngo Meterrael sa ttawul sa soer bo, "Oooy, hale buudoh pangami bo sa mwoal yaach koakomw." Re sa hamdaedoh ir yalweech kowe sibis re sa mammal chog bo chiil mel iy haatuw mwachoh we lal tafich we.