Retold by: Mariano Laimoh
Illustrated by: Donald L. Buchholz

Kamaahoy mele. Meda mele ho wiri? Ifae sangal yaloor mael kae? Ir mael kae re dipli bo re be mel bo sibis choal mosiik. Meda mill hakungkung kala ho chichi ngo rebe taptap?

Ye mel semal mwal le yemel semal dangki loal. Sa raeg mo raeg yael iy danki we ye yengaeng ngaeli iy mwal we. Sa mwalallap, taay kkeal irel yengaeng. Iy mwal we sa liuliuwaley hare meda mele be mwalali mo irel iy dangki we loal. Hare be lliy bo hal hare be tape chiuwwaay hare medae. Iwe ngo iy dangki we sa meafi lea yor mele ble wel ngaeli, yaal ddar. Sa dabey yallap sa loh irel seew haplamw lea Bremen mala idal. Ye sa liuliuwaley bo bla mel bo semal choal mosiik woal iy haplamw we seew.

Sa sar ddawloh sugfed yaal darloh ngo sa chiungiu semal pes lea ye mel lal iy yallap we. Wochog melwe sa kkeal yaal hachigchig iy pes we irel ddar. "Medae mele ho sa ngas soerag chog iyang ho mwal la?" yalool iy dangki we.

"Ye healwe," yalool iy pes we, "Mill chog mele iy sa mwalallap le taay mwal bo iy be ddab mael, tamwol la yaey sa liuliuwaley ble lliyey. Ila mele iy sa ddar iyang. Iwe ngo iyae mele ble la yohdoh halay mo iyang."

Dangki we sa kkaengaliu bo, "Choech widiyey bo ibe kkaengaliug. Ngaeng ila iy ble loh irel haplamw laay ibla mel bo semal choal mosiik. Dabeyey bo ho be wa mel be semal choal mosiik. Ngaeng ibe tayko ngo gel ho sa rappa." Iwe re sa chiufangal re sa loh.

Resa darloh toet yee re la chiungiu semal haatuw. Woal melwe metal sa wochog melwe ye poetog woal soelbong irel yaal sa diudiuloh irel chal matal. "Haale, medae mele sa tayikkof dopomw iyang?" yael iy dangki we kassiyae.

Iy haatuw we sa soer bo, "Itey mele be rray irel tappel mele isae mel iyang igla. Mill chog mele isae yiloolap le sa poegloh makae ngiiy, iwe ngo wa taay ma depey lea ibe ddab geech, ila mele sa ssoong tamwol la yaey iyang sa liuliuwaley bo ble hamwbuyey. Ila mele isae ddar iyang. Iwe ngo iyae mele ible loh iyang?" Dangki we sa kkaengaliu bo, "Dabohmem bo siblae mel bo choal mosiik." Iwe iy haatuw we sa dabeer re sa loh.

Re la buudoh liugiul seew imw re sala wiri semal malog lea sa takookloh chog. Re sa buudoh irel malog we ngo iy dangki we sa kassiya bo, "Medae mele hosa woalgi chog woal seew takook la yaamw iyang?"

Iwe ngo iy malog we sa soer bo, "Ngaeng ila be chil stab boong ngo isae mmat isae hamal. Iwe ngo ible mwoach fangliur choal imw le. Ngo mele sa ma choalopdoh chog yarmat irel imw le, feafel laay iliimw sa kkaengaliu kuuk we bo be hamaddayey be hal. Ilae pelal lea isae kakkartaloh mele yalooy iyang bo raeley mele re ble buudoh hasiyey."

Dangki we sa kkaengaliu bo, "Yaek ho malog, talngae iye iy ble kkaengaliug. Dabohmem bo sibe roloh irel haplamw laay, bo ye far mwomwaay yaloomw ngo siblae mel bo choal mosiik iyang. Sibe rol ttey fangal siyae mosiik ngo be palleng pelaal!" Iy malog we ye dipli melwe dangki we ye kkaengaliu. Sa lliutdiy mo woal melwe lilliyal sa daber.

Re sa chiufangal re sa loh. Iwe ngo re towe hola haplamw we lal chog seral. Re sa loh yee la bong ngaelir. Re sa buudoh fael sehay irae re sa soer bo re ble mel mwo iy loboes we bo rebe haraeli ngo re sa mwoach loh. Iy dangki we mo pes we re sa yoldi fael iy irea we ngo iy malog we mo haatuw we re sa biidah woal mokwe raal iy irea we.

Yela kalloh iy malog we sala wiri seew yaef le ye ddawloh. Sakkaengaliur mokwe choaliuwal bo, "Aey, mal bo yor imw iglaay bo isae wiri seew yaef." Iwe ngo iy dangki we sa soer bo, "Yaek, ye ilae bo hare imw ilaay ngo giich silae buudoh ppey mo igea. Hami siyae loh iyang." Re sa chiufangal haelkowe re sa loh.

Re la hola iy imw we ngo dangki we mele sa hamwo bo iy mele ye palleng ngo bla kallong mo lal seew cheche le ye sar tagiyetdah. Ye la kallong ngo ir mokwe chilal re sa kassiyae bo, "Medae mele ho wiri?"

Iwe ngo iy sa soer bo, "Medae mele iy wiri ye? Seew tiis lea ye soegol mongoy mo sibis choamwachog hare choabelaes lea re mommongoy ngo re kakkabelaes." "Yaek, ilae bo hare yor mongoy iwe ngo si be ligdi, lea ilae mele yolbuwach ilae." Yalool iy malog we. Iwe ngo iy pes we sa soer bo "Toes ngo. Hami sibe liuwaley mele sibe ddaberloh rochoakala iyang. Bo sibe hammwal ngaeligich mwo ka seew chiil yig kala." Haelkowe re sa buudoh hattiuwgil mwo hare medae mele re be foer ngaelir ir rochokowe.

Ilae melwe re sa hatiugili bo pes we be biidah woal melwe tagriul dangki we. Ngo haatuw we sa biidah woal melwe tagriul pes we, ngo malog we sa yaeldah bla siu woal melwe chemwel hattuw we.

Melwe re la fel ngo re sa chapi mokwe yaloor. Dangki we sa ngoengoe ngo pes we sa ttawul. Iwe ngo haatuw we sa ngaanga ngo malog we sa kkoegoe. Semal ir ngo ye foeriu chog yalool ngo re sa rippi long hatam piipi we. Yaer ppasloh ir choabelaes kowe. Re sa soer bo semal yalius kketfae melwe sa buudoh ireer.

Iwe ngo healkowe rela haflerloh liugiul iy tiis we. Semal ngo ye dabey ttefal irel mongoy kowe. Re sa mongoy mongoy yee rela maed, ngo semal ir ngo ye la hoalaeloh mo soelbos. Re sa giuliuloh yaef we. Iwe ngo ye buyoy iy dangki we sala masor ligtamw. Ngo ye biidah malog we sala masor woal wungiul imw we. Pes we sa mel liugiul hatam we ngo haatuw we sala mel mo isrea falang we.

Melwe la ligdi liugiulbong ngo ir choabelaes kowe re sala mel chog mo meadaaw re sa kakkalloh irel iy imw we. Mwal we yaar sa soer bo, "Giich chog yaach kakkamatagiugich. Loh semal hami bo bla kamaahoy hare yor yarmat irel imw laay."

Ye la loh iy ramtawe, toar le ye wiri. Iwe sa buulong iliimw bo be hagsiu yaef we. Be kachog hare yafwe lea ye fachfach mokwe metal iy haatuw we. Sa yangali bo be habulae yaal la yanglong lal metal iy haatuw we. Melwe ngo haatuw we sa liut ngal melwe metal sala rrabsi.

Mwal ye ppoedaeloh chog haatuw we ngo sa ttaeng hatam we. Ye fadal ngal hatam we ngo pes we sa ngarchapploh woal melwe pechpechal pecheel. Mwal ye difngi chog melwe pecheel ngo sa lliutwey ligtam. Melwe ye lliutwey ngo dangki we sa hammaliyae ngael seew chepchep mokwe metal hapil sala ngarchap mo meadaaw. Fiyel melwe ye langdah ngo sa koegoe malog we. Ngo ssaloh ramtawe lea wochog bo yarmat re hatahcheloh liuwol waliuwol kowe.

Sa loh iy ramtawe irel mokwe chilal sa kkaengaliur bo, "Healwe, iy dar ngael falang we ibe hagsiu yaef we ngo semal yalius le ye lellaay makla kkiul sa rrabsi mele metay. Iwe ngo isrea hatam we, ye mel semal mwal le ye hasi seyai saer sa ffala mele pecheey. Isae buyoy ligtam, ye mel semal yalius lea ye hasi setab irea sa hoalpagi ngaeliyey. Iwe ngo ye mel tamwol la yaar woal wungul imw we lea ye soer bo, "Ha hasidoh ramtala irey." Melwe chog ngo tayor seral lea re chiil ma buudoh ir choableas kowe loebos we. Iwe ngo Ir re sa foeriuloh iwe bo imwear.

Iye sangal wiuliulliur yalius kowe lal fiyoang le.

Iwe ngo iye sangal wiuliulliul mala choabelaes kowe re liuliuwaley ngo re wiri. Gel sa yor mwo yaamw moetog irel ngangael seew faormel hare rochol seew faormel? Kaengaliur chiilamw mele gel ho wiri.