RIIL
LOAL TAMWOOL
WRITTEN
BY: MARIANO LAIMOH
ILLUSTRATED BY: ERIC WOO
Semal lefeechig mo mala sill lea sa kkeal yaal
yiloolap. Re ma mel lal tabol seew fiuliuy.
Paangal lemaeliyel ngo iy melwe sill iy lefeechig
we ma kkaengalu iy melwe loal bo be ma biidiy diudiu letted mo
imwoal mala be tahach Yaal.
Iwe sa ma iwe chog sangal iy lefeechig we.
Paangal lemaeliyel wolommwoal mala be tahach yaal ngo sa biidiy
diudiu letted.
Iwe ngo ye mel semal tarmwaal lea loal mala
tamwoll iy fiuliuy we.
Yor yaal hachi lea ye mel taboll fiuliuy we
re ma mel iir yiloolap we mo lefeechig we loal iyang. Paangal
lemaeliyel ngo ye ma buudoh hoch iy loboes we.
La rallawe seral ngo ye la mmat iy lefeechig
we ngo sa siulay yal tahach Yaal. Sa siudah chog sa ddar sa biidiy
letted. Sa la diudiu ngo teawiri iy tarmwaal we le ye mel yiuchiul
hachiy we yaal.
Iy tarmwaal we sa kaladiy sa la wiri iy lefeechig
we. Sa harahdiy mo yiuchiul iy hachiy we sa la widi iy lefeechig
we.
Iwe ngo iy lefeechig we sa diudiu loh chog
lea sa hattiri chog. Sa nngat chog bo yarmat re de wiri.
Sa diudiu chog yee ye mmol chog ngo sa biidah
mo letted. Ye dardah chog ngo iy tarmwaal we sa ffasangu.
Iy tarmwaal we sa kassiya bo, "Ho buudoh mo
iya lea wochog bo mwoach igla mele iy wurug mo igea?
Iwe ngo iy lefeechig we sa kkaengalu bo, "Fael
chog mala pecheemw ngo ho towe lliiyey bo ngaeng ila ngaeng loal
mall haffohoy."
Iwe ngo iy tarmwaal we sa kkaengalu bo, "Ho
towe motog ngo iy towe lliug bo iy dipli lea iy be hasug bo gel
riiy."
Ngo iy lefeechig we sa kkaengalu bo, "Ila
ngo hosa widiyey bo iy be la kkaengalu mala seley ngo iy sa tafael."
Iwe sa loh feafel sa la kkaengalu iy melwe sill.
Ye la kkaengalu mokwe yalool iy tarmwaal we
ngo iy yiloolap we sill sa soer bo, "Ho sa wiri melwe iy
kkaengalug layi, bo hobe ma diudiu chog mo wolommwoal mala be
tahachdah Yaal. Ila si bele heatfa igla?"
Iwe ngo iy lefeechig we sa soer bo, "Ila
ngo iy bele heatfa?" Iy yiloolap we sa kkaengalu bo, "Ho
loh ho bala dabey ngo ho sa itol dopom irel mwakla be ma kkaengalug."
Iwe iy lefeechig we sa dabey iy tarmwaal we
re sa biidiy irel melwe bugtal.
Tamwool we ye wiriir chog ngo sa hangiungiu
tawiy we loal.
Sa rray bo sa yor riil molwe loal. Sa kkaenguluur
pangear yarmat bo rebe ffagdoh mongoy bo yael melwe loal guubul.
Iy yiloolap we mwo ngo ye buudog irel iy guubul
we. Iwe re sa mel le re sa rray.