MEDAE MELE SI MAE MONGOAY IYANG?

translated by Mariano Laimoh
illustrated by Deby Nakamura

Ho tea ma lulluwalley hare medae mele ho ma mongoay iyang? Ngoa. Ho ma mongoay boa ho kkoeloah. Hare, ho ma mongoay boa ye mmwal halamw. Iwe ngoa, ho golae mele mongoay ma faaor ngal halngomw? Hare, ho golae, ilae ngoa haraamwo ho taay yawli baabiyoar le. Iwe ngoa hare ho toglae, ilae ngoa ho sa yawli baabiyoar le boa ho be golae.

Ye chooaloap makala lu ma hammwal ngal gich. Hare makala si mae teptaep lu iyang. Si be tea chicchi hamwaayu ngoa yoor makala si mae teptaep lu iyang le si towe golae. Siyae chooech lulluwal hare medae tooet makala si mae taepey moa irel lu.

Baalaaw mele ye mwooal towas luul irel mael le re ma soer boa RHINOCEROS BEETLE idal. Mael le ila ye biidiy moa loebooes lae re ma soer boa, South East Asia.

Ye chooaloap lu moa wooal Baalaaw lea mael le ye hatwasi. Iwe yaremat re sa la hasidoh semat maael lea re ma soer boa Scolia wasp mala idal. Iwe moa semat maaes lea re ma soer boa, VIRUS DISEASE.

Mael le (SCOLIA WASP) ilae ma hangi mael kowe ma hattowas lu. Iwe ngoa VIRUS DISEASE le ilae ma lliir. Re be mes ngoa SCOLIA WASP kowe re sa hagiir.

Idel mele semat maael re ma lliir semat maael ilae re ma soer boa, BIOLOGICAL CONTROL.

Paeddol ilae ye paelleng pelaal. Ikae tooet makala si mae teptaep paeddol iyang. Chuug, kili, baach, yaas, piig, duul, iwe moa botoaw. Medae tooet lea haami ha golae?

Faael kasseew ngoa be taelengbat semael yaliweech ngoa semael ma hasi seew mechel paeddol sa halifchiffchi ngali.

Looh ilae ye wa yor faal ngal gich. Si mae haffaaoru looh sa la mel boa yaach yalguw. Si wa ma teptaep yalguw looh irel wooawoor yaliweech kowe re taelengbat .

Medae tooet faaormel lea si mae teptaep looh iyang lea haami ha golae? Tooet ikae: Si wa ma faaor looh boa mwekkal. Tooet yaremat re ma faaor waar legaccheeag re sa teptaep looh boa chiil. Tooet re ma teptaep looh boa sibsibil ngiir.

Iwe ngoa paaeley, medae mele si mae tooangali moa iyang? Tooet makala Si mae teptaep paaeley iyang ikae: Be chooaloap rowael paabiy lea mel guubul, ngoa yaremat re ma teptaep paaeley irel yaeriyoerol raaw. Si wa ma faaor chibel yig sussul moa irel paaeley.

Iwe ngoa ffa kowe irel paaeley, si ma teptaep irel ffaal yiig, moa ffaal mwarmwar. Iwe ngoa yaremat re wa mae teptaep irel ffaal yasol iimw. Iwe ngoa sa medae tooet? Taayor tooet mokowe si mae teptaep paaeley hare ffa iyang lea ha chiil golae?

Ha chooech kamaahoy yamwiyemw. Medae mele si mae taepeeli moa irel yamwiyemw?

Be taaylap yaaemi reek hare yalguw moa skuun, ha te ma teptaep yamwiyemw irel yalguwel chaaol maaey?

Tooet yaremat re ma teptaep yamwiyemw irel faefiy. Iwe ngoa sibis lea re ma hoch hachiimem, re ma taepeeli mokowe yechael yamwiyemw boa yaeriyoerol yaar howah.

Lu ilae ye wa pelleng faal ngal gich. Si mae yulmi ngoa si hangi melwe pel. Iwe ngoa mokowe puyoeloel, si mae itoallong lal sumw boa be faaotooet ngoa siyae tefaael ngali boa si be faaoru boa hoalhoal. Iwe ngoa si wa ma taepe toahoah kowe boa yaach toahoah.

Iwe ngoa cho mele ye wa far paelleng tooet faal ngal gich. Ho tea chicchi? Puyoel we chog ngoa ye chooaloap mele si mae taepeeli moa iyang.

Si mae teptaep puyoel irel faefiyel halach. Iwe ngoa tooet yaremat re ma teptaep irel hayyoar. Irel faaorol waal faeluyach, ngoa yaremat re ma teptaep puyoel irel lull.

Iwe ngoa cho we ilae si mae hangi ngoa si mae taepe yaach chuwaaey (faedwos) . Faedwos le mele seew makala ye paelleng salpiy le ye yoh ngal gich chooal fuluy kae moa iyang. Iwe ngoa toahoah we ilae si mae taepe irel yaach howah. Ye wa mwomwaay toahoah irel faefi.

Yoor tooet yaremat lea re ma faaor buul moa irel toahoah.

Geech moa yaeff mele re ma hattawas cho moa lu. Yaeff ilae re ma geesi geesi mokowe puyoeloel lu yee ye la bang re sa hangi cho we. Iwe ngoa geech, tea tuwgil hare surub hare lu ngoa re ma ngarsi.

Wooal fuluy kala ye ppaalingling, taeppel Hawaay (Hawaii), re ma iteet kkasedep koobrea wooal haahaal lu. Iwe re be le la harahdah geech, re be hola chog koobrea we ngoa re ttaes tefaaeldiy wooatottoal. Iye mele peltael geech moa yuchuul lu.

Yaaed mele sa far paelleng tooet pelaal. Yea ngoa, ilae mele ye yohdoh chael halach mongoay moa iyang. Hachiimem we ilae si bele habchi sa la mel boa luuch. Iwe ngoa faeluuba we, ilae mele mwaal moa tarmwaal re ma itoal yaar nngas iyang llefhaaef.

Iwe ngoa hawwaael ilae si ma teptaep irel hadohdohol yaaef. Mwaal re we ma teptaep irel yaeruyoerol yaar howah. Yoor tooet yaremat lea re ma teptaep hawwaael irel wooawoor yaliweech.

Medae tooet mele si mae teptaep hawwaael iyang?

Haaehaael lu ilae ye chooaloap mele si mae taepeeli moa iyang. Tooet ikae: Si mae teptaep irel suurel iimw. Si mae teptaep irel chomwoallol paabiy. Si mae teptaep irel iraael iimw. Si mae teptaep irel langol irea kae si si mae fela boa wa. Si mae teptaep irel waaelbangel faaormel. Riyyep re ma teptaep irel waydol wooal molooaluul kowe wooal Yaap.

Medae ikowe tooet? Taayor tooet lea ho golae? Woharal lu ilae ye paelleng paelleng faal ngal lu kae yaach. Be tooar woharal lu ilae ngoa tooar sehay lu lea be mmwal lea be su. Ilae ngoa paangal lu ngoa be moarroloah. Tooet yaremat re ma teptaep woharal lu boa yaar taefey. Kassibis re ma teptaep irel faaorol metael layuur biyow. Medae tooet lea haami ha golae?

Activities

1. Kilngi seew liib lea be mwomwaay chog yoddol. Lebaediy seew cho iyang. Be foedoew wiik ngoa ho sa tefaael ho be kamaahoy.

a) Tooar mele ho wiri lea sa tumwulwey moa iyang?
b) Ye haffedeg ngal lu kalaay sa ppaalingling?

2. Faaoru mekae:

a) Faesu seew baach.
b) Faaor seew yalguw looh.
c) Hodmi seew cho ho sa hota.
d) Faaor serea tohoah boa yaamw.
e) Guru serea cho we ho sa soongu hare ye llay.

3. Tefa mekae wooal sedep baabiyoor:

a) Sungali yooangol sehay lu ho sa tefa idel sooelboes moa sooelboes moa uwooal lu lae.
b) Sungali yooangol ruwow faaormel lea si mae faaoru moa irel paeddol.
c) Sungali yooangol serea cho lea be mel yooangol seew faar (piir) iyang.