KKAAY KKOFAL SCIENCE

written by Isaac Langal and Augustin Uolai
illustrations by Todd Kurosawa and Shirley Fukuhara

KAAY KKOFAL SAAYENS

TABLE OF CONTENTS

Ye Hammwarah Yusuwilil Bugat
Terry Ye Kkaay Kkofal Yiig
Laamw Re Taeyikkof
Kkaay Igegel Fadol Faesoel Uwaal Irea
Ma Ifae Sangal Ngoa Siyae Goelae Yaal Bichikkar?
Loah Irel Seew New Habitat
Be Mwomwaay Seew Environment Ngoa Be Ttir Yaal Paelleng Laoh Population Iyang
Kkamahoy Hamwayu
Ye Buudoh Moa Irel Mekea Ye Moloaw?
Mekea Ma Tumwul Lea Ye Hallaaeng Igegel
Igegel Ffaoroel Kkoyaas

Mekea Gilich Ma Piltaegich
Simae Faeying Irel Bugs
Hotwe Fang Losol Maeraereemw
Seew Gilat Moa Wol Gilimw

Iyae Mele Ma Loah Iyang Lea Sibe Ppedaeloah?
Yaach Chaepdoh Rema Taeptaep Mekea Ye Biodegradable
Yoor Mekea Mwooach Buudoh Irech Lea Tea Biodegradable
Yoor Mekea Mwooach Buudoh Irech Lea Pooyson
Be Ifae Sangal Ngoa Siyae Tipngi Hare Si Hammwal Mekea Fuluyach?

Chobol Fuluy, Secret Codes Moa Evidence
Ma Ifae Sangal Ngoa Siyae Goelae Loebole Ye Mel Semat Faaormel Iyang?
Ifae Sangal Iy Mwarroloah Choeg Hare Iy Mmararaloah?
Chobol Fuluy Lea Yaongoel Loebos Kkea Ye Ppaechigchig
Hapaopooel Loeboos Kkea Ye Ddaaw
Hapaopooel Degrees, Secret Codes Moa Kaambees
Wa Tooet Haraeregel Chobol Fuluy
Be Ifae Sangal Ngoa Siyae Goelae?

Ye Hammwarah Yusuwili Bugat

Terry Ye Kkaay Kkofal Yiig...

Mele fiyoanngol semael taerfefel irel yaal belea kkaay semat moa semat faaormel. Taerfefel le ye belea la doddor yiigil loechoel. Yiig kea ye belea la dorfiir ilae luwul chaael mele yaar natural environment. Be buudoh lea sibe hachuyaer semat yiig moa irel loebos kkala re ma faesul mel iyang hare yaar natural environment, iwe ngoa ye hartal mwomwaay lea sibe goelae mekea:

-Medae semat chaael lea ir taeppel yiig kala re mel iyang?
-Medae mongoay kala ir yiig kala re be mongoay?
-Medae temperature hare lapal bichikkar lea ye be mwomwaay ngaliir yiig kala?
-Medae taeppel predators hare maael kala re be dipli re be hangiir yiig kala?
-Ifae lapal light hare werel yaal hare werel deengki lea be mwomwaay ngaliir yiig kala?
-Medae makala ye pooyson ngaliir yiig kala?

Paangal laoh mekea ngoa ye mel choeg lal yaar semat moa semat yiig environment hare loebos kkala re mel semat moa semat yiig iyang. Ye wa yor tooet faaormel lea ye wa paelleng pelaal ngaliir yiig. Yawali, hare haraegi fiyoang le boa hobe goelae makala taerfefel le ye kkaay irel kkofal yiig moa fadah kea ma tumwul boa waluwol.

Lemaaeliyelel seral ngoa semael taerfefel idal Terry re sa chuu fangal moa mala sil re sala duudu lal seew chaael kkil. Ye choaloap yiigil loecchoel kowe lal iy chaael we. Paangal rall ngoa re ma buudoh duudu irel iy chaael we. Iwe ngoa iy lerry tea me luwalley laoh lea be doddor looal ir yiig kowe. La rallawe seral ngoa sa luwalley lea belea doddor looal iy yiig kowe re ma mel lal iy chaael we. Melwe sil iy Terry ye wa dipli lea ye be you looal iy taerfefel we looal iy yiig kowe. Iwe ngoa iy lerry hasfaeluy yaal dipli lea be yoah ngali tooet yiig kowe re ppalingling boa looal. Iwe, belea buudoh paegu fedaeleer ir yiig kowe yee...be la yoah ngali semael, semael mokowe ye mwitiyal.

Iy melwe sil sa dabey re sa buudoh paegpoeg fadal yee...la far yah ngaliir rumael ikowe re ppaalingling. Melwe choeg ngoa sa haasfaeluy yaal rraey laoh iy Terry. Iwe luulwe sa kal fadal yee...la wiri seew pooel koobrea kowe ye mwomwaay lapal. Iwe sala hasi sa buudoh yidifi irel chaael ngoa ye hasi ir yiig kowe loal, yitiliir laong iyang.

Dooelpael choeg yiig kea si goelae ilae yiigil letted. Paangear yiigil letted ngoa re be mes igle re be tea mel letted. Paangear yiigil yooch moa yiig kea re ma mel lal lamw moa meacho ngoa yiigil choeg letter.

Ponds ilae chaell wol fuluy. Medea re ma mel loecchoel hare fresh water environment, ilae te haffedeg fangal moa mekea ma mel letted hare salt water environment. Taeppel maael kala rema mel loecchoel ilae ye hamw ngal choeg mala re tea ma haffedeg ngaliir ikala re mel letter.

Iwe sa hasi ir yiig kow looal sa dabey iy melwe sil resa tefaael laoh irel melwe imwear. Re la hola irooet iwe ngoa iy melwe sil sa kaengalu boa be la ffaeg liliyel ir yiig kowe. Sa hasi doh sa yiteet loang chaael iyaang ngoa ye hasi ir yiig kowe looal yitiliir laong iyang. Sa mwomwaay iy reeal looebo we moa imwoal iy pooel koobrea we boa sa taldaeg yaar ir yiig kowe yiliil fadal iyang. Iy taerfefel we ma yitoal choeg dapal irel yaal kakamwaleer ir yiig kowe looal boa re de mes.

Be soar taeyikkof choeg sugfed chael we lal iy reeal looebo we ngoa sala yid doh chaael sa buudoh yusiwiliylye lapal yael iy taerfeefel le Terry hachaengi ir yig kowe looal. Paangal rall ngoa ye mala doddor pahawacchoel kowe boa halear ir yig kowe looal. Paangal rail ngoa ye ma yitoal choeg dapal irel yaal kakamongoayur ir yig kowe loal.

Environment ilae paangal laoh metmetael makala yor mele ma faor ngal semat moa semat maael hare irea: Irel kkofal maael:

Taeppel:
mongoay - werel yaal hare deengki - maael kea rema wol mongoa- choeg maael - predators, iwe moa lobo kkala semat moa semat maael re faesul memmel iyang.

Be buudoh lea hobe hachuyaer semat maael moa soelbos lea faesul liliyear hare yar natural environment, iwe ngoa ye chooaloap makala be wel ngaliir mael kala. Ilae mwo moa sugfed choeg yaamw wilgi igegel loebos lae faesul liliyear semat maael iwe ngoa belea taeyikkof loah igegear mael kala re ma mel loebos lae.

Be buudoh lea sibe hasi tooet yiig siyae yitiliir laoh moa soelbos lea tea faesul liliyear hare yar new environment, yiig kala, iwe ngoa hare yigil letter, iwe ngoa sibe yitiliir luwul taaed. Iwe ngoa hare yigil loecchoel, ilaeng ye tugul choeg lea sibe yitiliir loecchoel. Ye hartal mwomwaay lea tea tugul hare gigil letter hare yigil loecchoel mele si kaaek iwe ngoa si be ma fang haleear taeppel mongoay kala ye hartal mwomwaay ngaliir taeppel yig kala. H are higil letter ngoa sibe ma yeyusuwiliy taedel, ngoa hare yigil loechoel, ngoa sibe ma yeyusuwili chael lae iyang. Yaamw luluwal, medae mele be faaoru yig le loal Terry?

Iy taertefel le ma yitoal choeg depal irel yaal ma kakamwaler ir yiig kowe loal. Yaal choeg luluwal iy Terry ngoa ye goelae lea ir yig kowe loal resa pepaelleng laoh lemaeliyel ngoa ye la buyoey, sa choaloap ir yig kowe yar yiliil fadal lal iy melwe liliyear. Iy iwe yig feafel moa luwulur ir yig kowe rumael we ye yitiliir laong lal iy reeal loebo we sa faed. Ilae faal mele sa choaloap loah yiig lal iy reeal looebo we iyang.

Dooelpael yiig lea re ma faed. Iwe ngoa bela towa ma kala faediyear, iwe re sawa mellaoh boa yiig resa yiliil fadal luwol taaed hare chaael. Iwe ngoa yigil loechoel le loal Terry ye semat. Be la faed choeg nga mwititiyel yiig ppaechigchig. Re bela ppungdoh choeg ngoa re faesul goelae lea rebe yil fadal lu wol chaael.

Yig kea loal lerry, paangal medea ye mwomwaay ngaliir ngoa yor lal chael le liliyear. Iy yig feafel we, paangal makala be yor loal iyang ngoa yor luwul chael we. Yor ngali choeg paangal mongoay kala ye mwomwaay ngali, iwe moa wa tooet. Ilae faal lea sa yor loal yiig le iyang.

*Paangear metmetael maael ngoa ma mwomwaay yaar mel loeboskkala faesul liliyear hare yaar natural environment. Iwe ngoa iye siyae goelae boa Terry ilae paangal medea yiig kea loal rema dipli ngoa ye ma fang halear. Ir yig kea loal iy Terry haasfaeluy yaar bbedaey. Semat maael lea be paangeal makala ye mwomwaay ngali ngoa yor soelbos we ngoa be yoah lea re be chochoaloap loah.

Sa rumael ikowe re ppaalingling ngoa waelmoel ikowe re ppaechigchig. Iy yig feafel we mwoach faed sla choaloap loah yiig lal iy reeal looebo we. Sa rruw laoh mokowe metael iy Terry irel ir yig kowe re sa choaloap loah.

Population, ilae mala lapear sibis maael lea re be rool mel choeg soelbos. Fedmael yiig lea Terry ye matamwoal yitoaloang lal reeal looebo we? Iwe ngoa igla sa ifae lapal yiig lea re sa mel lal reeal looebo we?

Taay mmwal yaal rraey ir Terry irel ir yiig kowe loal. Sa ddaer sa loah irel seew imw lea ye harepa choeg iy melwe imwear moa iy mel we sil. Sa loah iyang sala kkaengal semael yaelwiich tarmwaal layur choal iy bugat we kkofal ir yig kowe loal. Iwe ngoa iy tarmwaal we sa soer boa ye dipli lea be wiri ir yig kowe ilang be chapar.

Iwe resa chufangal rese loah irel melwe imwel iy Terry moa iy melwe sil. Iwe iy Terry sa buudoh kakangalu iy tarmwaal we kkofal ir yiig kowe re chil ppaechigchig. Iwe ngoa iy tarmwaal we sa kassiyae iy taerfefel we boa, "Towe dopomw lea hobe fang yig lae ma faed boa layi?" Iwe ngoa iy taerfefel we sa soer boa, "Ngoa ye heeat, hasi." Iwe iy tarmwaal we sa hasi.

Iwe iy tarmwaal we sa hasi iy yig we yitoalong lal seew pooel koobrea lea yor chaael iyang. Iwe heealwe sa tefaael loh irel iy melwe imwal. Sa loah yee..la hola iy melwe imwal. Iwe ngoa ye hasi iy kobreal yig we -oal fedagudiy choeg faael deddar. Iwe ngoa mwaal ye ddaer sa la koakomw fadal luwulur yaelwiich. Iwe ngoa iy kobreal yig we loal sala foad choeg faael karkaral yaal.

Iwe mwaal sala koakomw fadal yee... la tefaael ngoa melwe sa palloah yaal. Iwe ngoa sa mwoach mmaeng ngal iy kobreal yig we loal. La loah ngoa ye kkamahoy, sa hacchaael iy yig we moa lal iy pooel kobrea we liliyal. Iwe ngoa ye la dhaddongo pegil iy kobrea we taay mmwal yaal bichikkar. Wa ilae sangal iy chael we lal iy pooel kobrea we boa sawa keeal yal bichikkar.

Iwe iy tarmwaal we sa hasi iy yig we loal we sa mes sala kawar ngal iy taefefeal we. Sa kkaengal iy taerfefel we boa malboa yor semael lea ye yiteet laong chael bech lal iy liliyel yig we loal. Sa buudoh kkaengal iy taerfefel we kkofal iy yig we loal irel yod we la wiri doh iyang. Iwe ngoa iy taerfefel we sa kassiya hare iyae mele ye itoal iy yig we loal iyang? Iwe ngoa iy tarmwaal we sa soer boa, ye itoal choeg ligtam.

-Medae mele ho chichiy ngoa ye faaoru yig we loal tarmwaal we? Ho chichiy ngoa yor semat medae lea ye bulaong lal melwe liliyear yig kowe hare environment we yar yig kowe lea ilae mele re mes iyang? Ho chichiy ngoa tarmwaal le ye itoal depal irel yal hamwale yig le loal?

Yod we Terry moa yaelwiich tarmwaal we re kapatapat fangal iyang ngoa melwe sil iy Terry ye tetaelngae iy mokowe re kakapata. Iwe ngoa ye wa tea lap chaael lea ye mel lal iy pooel kobrea we. Ilae fal lea ye kkardiy choeg yaal uwoal ngoa sa bichikkar loah. Ilae mele ye mes iy yig we iyang. Sa kkengal iy tarmwaal we boa, "Hare ho yitoal yig lae loamw soelbos lea ye llur ilaeng malboa towe mes. Ilaeng bela igla ngoa be chil moloaw.

Yig le sa bichikkar hamaaes yal mes. Bichikkar hare temperature ilae ye paelleng mele ma faaor ngal semat moa semat maael. B e kkeal hames ngaliir semat maael moa soelbos ngoa ye weres lea re be choaloap loah.

- Fedmael yiig lea tarmwaal we ye hasi boa loal?
- Fedmael yiig lea la mel diy boa loal tarmwaal we?
- Medae mele ye tea choaloap loah loal tarmwaal le yiig iyang?

La yod we ngoa iy tarmwaal we sa kassiyae iy taerfefel we boa, "Towe dopomw lea hobe wa fang semael yiig kala loamw boa layi?" Iwe ngoa iy taerfefel we sa soer boa, "Yeeab, ho tea we kaaek. Paangal yig kea re mel lal real loebo le ngoa belea mel choeg boa loach. Gich moa rumael ngoa sibe le ma kakamwaler ir yig kea."

Iwe, heealwe moa luulwe re sama chu fangal re sala ffaeg fadal halear ir yig kowe. Re belea la kaek halear ir yig kowe ngoa re be lea buudoh re sa hamongoayur. Re belea hamongaayur yee...re la maed iwe ngoa ir re belea chu fangal re sala koakomw fadal. Re dedaer laoh lea re ted ddawloah ngoa sa cching seew faormel. Rela ttaegul sa taegulgul diy iy melwe liliyear iy yig kowe layur. Semael haatuw ye sseb fadal woal iy paap we ye mel iy liliyel yig kowe iyang yee...ppusngu iy real looebo we sala taegulgul diy. Melwe ye ppung diy choeg iy real loebo we lea ye sarway choeg iy yig kowe moa iyang ngoa sa choab haatuw we iyang. Sa buudoh haatuw we yal ddorfi iy yig we ye paelleng. Ye ddorfi choeg yal hangi laoh.

Re la hamid tefaeli iy taerfefel we moa iy tarmwaal ngoa taay mel iy yig we ye paelleng boa iy haatuw we luslusuy laoh. Iwe re sala mel diy choeg ikowe re chil ppaechigchig lea re sa taefichfich fadal wotottoal. Iwe sala taeyikkof loah depear moach kowe irel iy yig we layur we iy haatuw we sa hangi.

Tea tugul soelbos ngoa ye mwuslaoh choeg lapal maael moa lapal irea kala ye ma mel iyang. Be buudoh lea semat maael be wa hangi choeg wa semat maael iwe ngoa mael we matamwoa mele si mae soer boa predator: Iwe siyae goelae iye, ilaeng haatuw we be yoah lea sibe soer boa iy semael predator? Iwe ngoa ir yig kowe, be yoah lea sibe soer boa yar pahawechoel predator? Prey ilae taeppel mael kea we toet choeg mael re ma llir re sa hangir. Organisms ilae, maael hare irea. Iwe, ilaeng ifae semat mael kea (haatuw, pahawechoel, yiig) lea be yoah lea b e mel boa predator ngoa be wa yoah lea be wa mel boa prey?

Iwe healwe moa luulwe resa hatfaeli dah iy liliyel yig yar woal seew paap. Iwe ngoa moach kowe re wa loah resala yid doh chaael resa buudoh hasesser laong lal iy real loebo we. La moal ngoa re hasi ir yig mwiriyal kowe hatfaelir laong iyang. Resa hamwale melwe peltal iwe ngoa re chu fangal re sala koakomw fadal luwulur yaelwich.

Re la tefael doh moa irel koakomw ngoa re la hachuyae loah melwe toatoal iy liliyel yig we layur, tayor loah chaael iyang. Paangear loah ur yiig kowe ngoa re hacchaael laoh. Moach kowe re sala luluwal loah hare medae mele ye faaoru choeg ngoa sla tooar loah chaael lal iy liliyel yig we layur iyang. Re sa buudoh kamahoy fedaeley yee...re la wiri lea sa halaal melwe faaedel iy loebo we. Iwe re sala mwoach goelae lea ilae fal lea sa ret laoh chaael moa lal iy liliyel yig we layur iyang. Iwe moach kowe re sa mel lea sa taeyikkof depear.

- Medae tooet fal mele yiig re ma mes iyang?
- Medae tooet fal mele semat moa semat maael re ma mes iyang?
- Be far choaloap hames semat faaormel soelbos hare lal seew environment hare ye far tea lap, ilaeng mael kala re memmel loebos lae ilae ye weres lea re be choaloap loah. Seew ilae rebe far wweachich laoh yee... re ret laoh hare re mes laoh.

Laamw Re Taeyikkof

Gel ho moloaw?
Ngoa, si gola boa ho moloaw. Gich yaremat ila organisms lea si moloaw. Fael kassew ngoa sima wochoeg organisms kea toet. Semael tarmwaal idal Tom iye ye belea kaaay kofal toet organisms ngal yaar environment. Medae ruwow environment factors lea Tome ye belea kaay kofal? Iwe ngoa medae taeppel organisms kala ye belea kaay kofal?

Lemaeliyelel seral ngoa Tom sala koakomw wulpiy. Iy Tom lye Hamwayu koakomwol wulpiy. Sa lutlut fadal ngoa ye hamidi fedaeley woal iy piy we. Sa mwomwaay choeg depel healwe. Ye koakomw loah choeg ngoa sa meyaefiy bechel yaal. Sa keal way ilas moa uwoal. Sa ppach fadal iy piy kowe uwoal.

Sa hamidi fedaeley ngoa ye koakomw fadal woal iy piy we. Sa koakomw fadal yee... sa keal way choeg iy ilas kowe moa uwoal. Sa keal ngali yaal bichikar. Heealwe sa mwoach la chichiy loah ngoa sa mmeal choeg lea belea wwel yaal. Iwe sala mwoach gola lea bechel yaal mele sa iwe sangal yal sa llas iyang.

- Medae mele ye llas Tom iyang?
- Yod fae moa lal seral mele ma keal bechel yaal iyang?
- Yodfae moa la seral mele tea ma keal bechel yaal iyang?
- Yaal mele ye ma fang werel yaeyurael moa bechel faormel.

Iwe healwe sa loah fael toet lu lea ye llur ngoa ye la mwarodiy moa iyang. Sa mwaro iy loebos we sa kasoesoe moa iyang. Sa peyaegus irel yal hamidi fedaeley faeliyoal. Sa mwaro toet yee...sa yolloah sa maesoer. Sa maesoer toet yee...sa mmata gili laoh kukul laamw. Sa ppigiri iy lamw we lugul melwe taelengal. Sa ppach loah iy lamw we lal melwe paol. Ye la kamahoy, hasfaeluy yal hattaereng melwe igegel iy lamw we.

Iwe sa mmat healwe irel iy kukul lamw we sa kakal fadal. Sa sudah ngoa wochoeg boa sa keal yal llur laoh. Ye la kaldah lal laaeng, sa choey laoh irel darmiy rochoppung. Taay llal metael yaal. Sa keal laoh yaal roch loah iy loebo we ye mel iyang. Iwe ngoa sawa rongrong ngingiil laamw. Iwe ngoa ye wa rongrong ngungul par. Sa gola lea blea buudoh laaeng. Sa moetaog moach we. Iwe sa taegul choeg sa tefaael laoh irel melwe bugatal.

- Ifae sangal, laamw ma gusug lea ho bela koakomw faeliyoal wulpiy?
- Ifae sangal, laamw ma gusug lea ho be mel faael llurul irea?
- Ifae sangal, be ppelat laoh metael yaal irel darmi lea be llur laoh, ngoa sa halloefoeng yaaeng iwe, ma choaloap loah laamw hare yeeab?

Sa dedaer laoh ngao ye luluwal. Sa luluwaley hare medae mele toar laamw le ye gusu irel yod we ye koakomw woal iy piy we. Sala mwoach luluwaley laoh ngao yod we ye koakomw woal iy piy we iyang ngoa ye keal karal yaal. Iwe ngoa yod we ye bulaong fael lu we iyang ngoa sa llur.

Medae mele ye llur iyang? Ye llur boa sa pelat metael yaal. Yod we ye llur iyang ngoa laamw sa gusu. Sala ppaey sa luluwal loah choeg. Sa hable hare semael be kaengali hare meda fael lea la iwe sangal iyang. La yod we ngoa Tom sa dipli lea be golae hare medae faal lea: Be llur hare ye roch soelbos ngoa sa kuk laamw.

Iwe ngoa be kar hare ye bochikar soelbos ngoa taay kuk laamw.

Ya hamw ngal mala si ma dipli lea sibe gola hare medae faal lea ye wel sew faormel iyang. Ye mel toet faormel we Tom mwoach faoru. Ho gola hare medae mele Tom ye luluwaley irel iy mekea ye sa wiri? Medae mele be faoru ngoa Tom sa gola kofal medea iy ye dipli boa ba gola?

Tom ye la hola melwe imwal ngoa sa taeyikof fadal lloefodogol. Melwe ye hola doh imw ngoa sa chingi doh iy laeng we. Taay mmwal yaal ssong raaeg yuud, sa wochoeg boa yaremat re kakadgele choeg moa lal taepiy. Iwe healwe sa loah irel melwe giyal sla yoal yee..mmaesoer laoh. Ye la mmat ngoa sa meal choeg lea belea dol yaal. Ya la kalway ligtam ngoa sa roch.

Melwe sil moa pangear yarmatal iy imw we imwal ngoa resa rol mel. Ye la mmat loah choeg ngoa re sa kafelfelel mongoay. Iwe ngoa iy melwe sil sa hagsu habbul we yar sa fadagu lal iy longoab we yar. Melwe choeg ngoa Tom sa chaep yal mongoay. Yig moa dipchigil maaey iy mokowe halear. Iwe sangal yal kabdubud ngoa semael laamw sa ppachlahoy melwe taegrul.

Ye la meal lea be ppigri, towe mmwal boa towe hola. Ye weres lea be holar boa re male kukusu choeg moa woal melwe taegrul. Tom sawa la chichiy laoh hare medae fal lea lamw kowe re kukusu choeg melwe taegrul ngoa re tea gusu woal metal hare lal wubal.

- Medae toet kassiy lea be yoah lea Tome be kassiy?
- Kamahoy mele yaongoel Tom"
- Medae mele ho wiri lea ye tea haffedeg moa iyang? Yidfal moa uwoal Tome mele ye roch?

Re la moal moa irel mongoay ngoa sa choaloap llupung woal melwe taegrul iy Tom. Mil kukul laamw. Ye moal choeg yar haliliyae mongaay kowe ngoa melwe selear sa kaengalur boa semael ir ngoa belea loah irel giyal. Iy melwe selear ye dipli lea ir mokowe loal rebe ma ttiril maesoer boa ilaeng rebe ma yugul mmat llemaeliyel.

Iwe, semael ir ngoa sa loah sala mel liliyal. Melwe re sa fel ngoa iy melwe selear sa guluy laoh iy habbul we yar. Tea sulaey choeg moa wul mwiril yal gul habbul we ngoa Tom sa rongrong ngingiil laamw. Chil kakataelngae iy ngingiil lamw kowe ngoa semael sa ppachlahoy melwe metael mangol. Sa ppigri iwe, ngoa semael sa gusu moa woal melwe taegrul. Sa ppigri iwe ngoa semael sa ppachlahoy melwe taelengal.

Tom sa ssong irel melwe laamw re sala kukusu. Tom sla luluwaley ngoa paangal yaad lea be roch ngoa laamw sa kuk iyang. Sa maesoer laoh bungul rallawe lea taay chuy yaal luluwaley laoh choeg iy melwe.

Chil lemaeliyel choeg rallawe seral ngoa sa mmat healwe Tom. Ye mmat choeg ngoa sawa chaep yal luluwaley hare medae mele mala kuk laamw lloebong iyang. Iwe sa kassiya iy melwe sil boa, "Medae faal lea laamw ma toa gusuyey choeg lea be roch soelbos iyang?" Melwe sil sa kangali boa ye toeglae. Iwe sa kaengalu iy melwe loal boa, "Ho be loah skuun igla ngoa ho sala kassiya yaamw sensey irel science hare medae mele la ila sangal iyang."

We healwe sa loah skuun ralawe. Ye dedabey sew moa sew yal class ngoa tea chuy yal luluwaley lea be kassiya sensey we yal kofal yar laamw ma kuk. La hola yadol recess hare yadol koakomw, pangear yaelwich ngoa resa buyoey ligtam ngoa iy Tom ye tea loah. Ye ppaey choeg yiliimw tea mwech ael buyoey ligtam.

Melwe sa retway yaremat ligtam ngoa iy sa loah irel sensey we yal. Sa loah sala suu lengchel tiis we yael iy sensey we lea tea mmwaliliy. Sa ppaey toet yee...ngoa iy sensey we sa soer boa, "Tom medae mele sa retway yaelwich ligtaam re bela koakomw ngoa gel ho tea loah iyang?"

Tom sa soer boa iy tea buyoey boa yor yaey kassiy. Iwe ngoa Tom sa soer boa, "Iy sa gola lea be roch soelbos ngoa laamw sa gusuyey. Iwe ngoa be loebong lea be wer habbul, iwe ngoa real ngaeng reala ye katab taeng yaaef mele laamw ma toa gusu. Iwe nog iy be mel fael llurul irea, ngoa laamw ma toa gusuyey. Iwe, ngoa iy be mel fael karal yaal ngoa toar semael laamw lea ma gusuyey. Iwe, iy kassiy we yaaey ilae. Medae faal lea la iye sangal iyang?"

Iwe choeg ngoa ye la rruw laoh mokwe metael iy sensey we. Iwe sa soer boa; "Tom, paangal makala sa moal yamw mmasa ngoa ho wiri ngoa paangal ngoa tooes. Paangal makala ho sosoer ngoa ye bung. Iwe ngoa ho gola hare medae iye? Medae faal lea rall kea be keal karal yaal ngoa yaremat resa mel choeg loebos kea ye llur?" Iwe ngoa Tom sa memael sa soer boa, "Mil mala yaremat re ma bichikar. Ila fal lea rall kea be keal bechel yaal ngoa taay choaloap le ho be wiri lea be dedaer fadal."

Iwe ngoa sensey we sa soer boa, "Suremw, yaremat ila towe yoah lea rebe mel soelbos lea be keal hames yal bichikar. Iwe ngoa gel Tom, ho chichiy ngoa semat moa semat maael tea wa soar igegel choeg yaremat yar tea dipli bichikar? Iwe ngoa laamw re ma dipli lea rebe buyoey mel fadal faael karkaral yaal?"

Iwe ngo Tom sa soer boa, "Yak, ila fal lea laamw rema ppaey fadal choeg loebos kea ye llur hare ye roch. Laamw re tea dipli loebos kea ye keal yal bichikar."

Iwe ngoa sensey we sa soer boa, "Ila sangal, suremw. Paangear laamw ngoa ye taeyikel makala halongoar. Be soar bech choeg soelbos ngoa resa mes. Ila fal lea rema ppaey fadal choeg loebos kea ye llur. Be buudoh lea rebe sulay tael karal yaal ngoa re ma mes. Taeppel choeg sehay fadah lea ho be fadagu soelbos. Be keal hames karal yaal soelvos lea ye foad iyang ngoa ye be mes."

Kkaay Igegel Fadol Faesoel Uwaal Irea

Sibe dipli sibe gola igegel seew faormel iwe ngo ye mwomwaay lea sibe yitoal dapach iyang. Tom lea ila fal lea sa gola toet mo irel kkofal semat mo semat laamw bo ye yitoal dapal irel yal kkay.

Be yoah lea sibe gola kkofal semat mo semat fadah igle sibe yitoal dapach irel yach kkaay igegal. Be wa mechraeg yach gola igle sibe kakamahoy fangaliy rumat fadah. Be yoah lea sibe faoru ruwow faormel lea be haffedeg chog. Iwe ngo siya yusuwiliy chog sew mo iyang.

Variable ila seew faormel lea be yoah lea be yusuwel igegal. Sensey we yael Tom ye experiment yigli seew chog variable lea ye dil igegal.

Haraegi fiyoang le ngo hosa kkamahoy hare hobe gola hare meda iy variable le sensey we yael Tom ye luwaley bo be haskuna ngalir yaelwich kea.

Sa moal skuun ngo Tom sa deddaer laoh irel bugatal. Ye sa luluwaley hare ma ifa sangal igegel yar laamw ma ppaoy loebos kkala re dipli. Toe chiy! Laamw re be palpal loah yee...re mes faeliyoal igle re be wochog lapal sulayer yaremat faeliyoal. Semat organisms ngo semat faormel lea re ma taepeli.

Tom swa la metael buuch fadal. Sensey we yal sa kaengali bo be la walsu ngo sa kaaek doh faesoel uwoal irea. Meda mele iy sensey we yal la kaengali bo be faoru iy mele iyang?

La rallawe seral ngo sa rraey choeg healwe Tom. Ila mwo mo melwe sil taay hamaengi ngali lea ye be loah skuun ngo iy sa faesul gola chog lea be loah. Ye paoy fadal skuun lea ye hasi fedaeley chog iy faesoel irea kowe lea ye dudug lal seew chaol maaey.

Sensey we ye kakaskuun ngo iy Tom iwe taay yitoal dapal irel skuun bo sa luluwaley laoh chog hare meda mele iy sensey we yal be kangalu irel iy faesoel ire kowe ye hasi.

Wul mwiril ngo sensey we sa soer boa, "Class, igla Tom ye belea tiping gich irel seew faormel. Tooet faesoel uwaal irea lea fadah ikea ye hasi doh lea sibe le faor yach experiment iyang." Iwe sa kangal lom bo be ngaley iy faesoel irea kowe.

Iwe Tom sa fang ngal sensey we iy faesoel ire kowe ye hasi doh we sala hammwal hamwayu yaal dugmi lal iy chaaol mea we.

Iwe iy sensey we sa hamhalar re sala ruwow group mo iyang. Iwe ngo ye wa hamhala iy faesoel kalbaes kowe hasiyel doh iy Tom. Toet ngo ye ngaler choal sew ir group we ruwow. Iwe ngo iy sensey we sa budoh hamadfa ngalir igegel yar be fadagu iy faesoel kalbaes kowe. Sa kangalur pangal makla re be faoru ngo sa mwomway iy fadah kowe yar. La moal yael iy sensey we hamadfa ngalir choal sew mo sew group mele re be faoru, iwe ngo belea fang ngalir yar babiyoar. Choal sew group ngo ye ngaler sedep bo yar. Iwe sensey we sa tafa dah yaongoel sew chart woal chalkboard we sa kangalur bo rebe tafadiy lal babiyoar kowe sa ngaler. La moal ngoa sa kangalur boa chart we mele re be taepeli irel yar be record yaegli kofal experiment we re belea faoru.

Iwe sa kangalur bo sibis ir ngo re yitoal layur fadah mo soelbos. Sibis ir re be yitoal layur faeliyoal ngo sibis ir re be yitoal layur fael llur. Iwe ngo Tom mo ikowe chilal re sa soer bo ir rebe yitoal layur faeliyoal. Iwe ngo ir choal group we sew re sa soer bo re yitoal iwe layur fael llur.

Iwe healkowe re sala hasi doh ruwow peol kobrea kowe ye mwomway lallapal. Iwe re sa budoh yiteet laong bol kowe ye mwomway iyang. Lee ngo re hasi iy faesoel kalbaes kowe layur fadagudiy lal iy kobrea kowe. Choal sew group ngo re fadagu layur lal yar kobrea. La moal yar fadagu, iwe ngo resa yitet laong kassugfed chaael iyang.

Iwe ir choal group we yael iy Tom resa hasi iy kobreal fadah we yar re sa fadaguway lugul imw faeliyoal. Iwe ngo ir choal group we sew re hasi iwe yar titoaloang yilimw. Re yitoal lugul faedilimwil iy room/ruum we ngo re hasi sedep kahol babiyoar kowe, toatawo ngali. Re toatawo do de kardiy yaal uwoal.

Iwe, pangal ra irel science class ngo iy Tom mo ir mokwe chilal re kamahoy iy experiment kowe yar. Re belea kamahoy fedaeley yee...ngo re belea yidfi ngal chaael. Pangal ral lea rebe kamahoy iy fadah kowe yar ngo re ma hasi chart kowe yar. Pangal mele rebe faoru ngal fadah kowe seral ngo rema tafa loang lal chart kowe yar. Hare be yor sew faormel lea re be wiri lea sa wel igegal moa lal sew iy kobrea kowe ngo rema tafadiy lal chart kowe yar.

Pangal ral ngo iye chog sangal yar faoffaoru. Melwe la fabong ngo choal group we yael Tom re sa wiri lea sa tumwul fadah kowe layur. Wa ila sangear choal group we ruwow ngo sa mwomway depear irel melwe sa tumwul iy fadah kowe yar.

La lemaeliyelel rallawe seral ngo healkowe re swa budoh kamahoy iy fadah kowe yar. Iroruwow iy kobrea kowe ngo sa mwomway day tumwulul iy kalbeas kowe mo iyang. Iwe ngo haliye te haffedeg ddoeloel mokwe yul. Ikowe loal iy Tom mo ikowe choaluwal ye harawraw mokwe yul. Iwe nog ikowe layur ir choal group we sew, ye pparangrang mokwe yul.

Iwe iy Tom mo mokwe choaluwal re sa record yigli laong lal chart we yar mokwe igegel iy fadah kowe layur. Melwe Tom mo chaol group we yal re faoru ngo, wa ila sangal chog mele choal group we sew re faoru. La yod le ngo sensey we yar sa mwoach kangalur faal lea iye sangal ddoeloel mokwe yul kalbaes kowe iyang. Sa kangalur bo werel yaal mele ma harawraw ddoeloel chaol irea hare yul irea iyang. Be toar werel yaal ngo toar semat irea lea be harawraw choal. Tom mo student kowe choaluwal re sala mwoach gola lapal yal paeleng pelaal werel yaal ngal pangal organisms: Matamwo ngo Laamw, ngo sa yaremat ngo igla ngo sa irea kea fadah.

Ma Ifae Sangal Ngoa Siyae Goelae Yaal Bichikkar?

Yor ka ssoelbos ma lal faeyleng le lea ye keal hames haloefoeng iyang. Be lal sew raeg ngo pangal chael kea ye mel ligtam ngo ye ma faes bo ice. Iwe ngo ke soelbos lea be winter hare llifang ngo sa yor ice. Iwe ngo bela summer hare lerreg ngo tayor ice bo sa bichikar. Iwe ngo ka ssoelbos, taeppel woal mekea fuluyach, ye ma hamw ngal mala ye ma bichikar chog.

Organisms ila pangal laoh lal faeyleng le ngo re mel iyang. Semat organisms ngo ye mwuslaoh chog loebos kala re ma mel iyang. Loebos kala semat organism re mel iyang ila mele yar environment. Toet organisms ila loebos kea chog ye haloefoeng mele re ma mel iyang. Iwe ngo toet organisms, ma yoh lea rebe mel loebos kea ye ma kadildil lapal bichikar iyang. Taeppel organisms hare plants har irea kea, be bichikar yaeyurael ngo sa buyoey floras mo iyang. Iwe ngo be la haloefoeng yaeyurael ngo sa wochog melwe sa mes. Iwe ngo bela wol dil yaeyurael ngo swa buyoey floras mo iyang.

Doelpael chog organisms lea re sensitive ngal temperature. Hare, ye taeyikof ngalir taeppel loebos kea ye paeleng yal ma dil igegel temperature hare bichikaral yaeyurael iyang. Semat maael ngo ye fel ngalir chog lapal temperature la ye mel irel bugatear.

Hare sibe kaek maael mo fadah kea ye molow mo woal mekea fuluyach siya kaekway woal Alaska ngo ye tugul chog lea re be mes. Taeppel yaeyureal la ye mwomway ngalir semat maael ila yor toet maael lea re be mes iyang bo taeyikof ngalir.

Ye be mechraeg yach be gola lapal yal dil temperature woal mekea fuluyach taeng Alaska. Hare sibe mel woal Alaska ngo be choalop mengaeguch. Be choalop mengaeguch bo side mes irel yach ffoy. Iwe ngo ka toet maael, ila mwo sugfed chog yal dil temperature soelbos ngo resa mes. Yor toet yiig lea ila mwo sugfed chog yal dil temperature loebos la re mel iyang ngo re mes.

Meda mele sima hapaoyu lapal temperature iyang? Meda mele sima taepeli irel yach hapaoyu temperature hare lapal bichikar? Thermometer mele sima taepe siya hapaoyu lapal temperature. Ye choalop metmetael thermometer. Semat thermometer sima taepe irel hapaopoel bichikaral yaeyurael. Semat thermometer sima taepe irel hapaopoel mekea ye chael taeppel chaael. Iwe ngo wa semat thermometer taeppel mokowe yar taogta, rema taepe irel kakal bichikar hare temperature uwoar yaremat.

Thermometer ila ye mel semat faormel yilal lea ye chael. Thermometer ial ma yor namba lea ma taftaf uwoal. Iy chael le lal thermometer ila ye rigrig fadal. Soelbos lea ye bela ppaolaoh mo iyang ngo ila mele lapal bichikar hare temperature.

Solmat metmetael thermometer ikea:

Iye mele taeppel thermometer le sima taepe irel kakal bichikar uwoar yaremat.
Iye mele taeppel thermometer le sima taepe irel hagelgel bichikaral mekea ye chael.
Iye mele taeppel thermometer le sima taepe irel mala sibe dipli lea sibe gola lapal bichikaral yaeyurael.

Melwe ye igegel chaael we ma mel lal thermometer ila yor mele ma checcha ngo yor mele ma chaeriwriw mala ddoelal. Taeppel iye ma chaeriwriw ddoelal ila mele mercury. Mercury ila poyson ngal gich yaremat. Semat faormel lea tea mwomway ngal halong. Ila fal lea tea mwomway lea sibe haseser fadal mercury loebos kea re ma ppaey fadal yaremat iyang.

Be bichikar ngo sa paeleng laoh mercury we ma mel lal thermometer. Thermometer le ye yaochigchig. Be paeleng laoh mercury le yilal ngo sa bidah. Be biidah ngo sa laoh woal namba kala ye paeleng. Iwe ngo siya haraegi sibe gola lapal yal sa bichikar.

Ifa lapal namba le mercury le lal thermometer le sa hola?

Ifa lapal hare fodow namba le mercury le lal thermometer le sa hola?

Ifa sew thermometer kea ye sa keal yal sa bichikar?

Be haloegoeng ngo mercury we lal thermometer sa weachich laoh. Mercury le ye mel lal iy thermometer le ye yaochigchig ila be haloegoeng laoh ngo sa biidiy irel namba kea ye ppaechigchig. Iwe ngo siya hareagi sibe goela lapal yal sa haloefoeng.

Sa meda lapal bichikar irel thermometer A?

Sa meda lapal bichikar irel thermometer B?

Ifa sew thermometer kea lea sa keal haloefoeng iyang? Thermometer A hare Thermometer B?

Ye choalop fal lea ye la paelleng peleal temperature iyang. Ikea toet mele fal: Gel, yor fael sew lea taogta resa hasi lapal yamw bichikar hare yamw temperature? Taogta resa gola lea ila mwo sugfed chog yal dil yael semael temperature, ilang ngo yor mele remat la sa faoru. Be sugfed chog yal biidah yael semael temperature ilang malbo sa pach ngali misilpig. Be pach ngal gich chog misilpig ngo siya yitoal chog dapach irel halongoch.

Yaelwich le sa pach ngali misilpig.

Wa yor toet organisms lea taeyikof ngalir bichikar. Taeppel snail hare limlimitaoloemw. Be kar loah chog yaal soelbos ngo resa chuy mo iyang resa yadamgil laoh loebos kea ye llur. Meda mele ho chichiy ngo fal lea lilimitaoloemw rema haw taeng karal yaal iyang? Meda toet maael kala ho gola ngo hosa mwoal wiriri lea ma iye sangear?

Yor le sa mwoal wiri semael guchoal lea ye wa haw taeng yaa? Meda mele fal lea ho gola?

Mwaat, taeppel mokowe igegel labud we re ma mel luwul bool. Meda mele fal lea ho gola lea re mala wol haw taeng were yaal iyang?

Seew environment ngo bela lal sew raaeg ngo ye memeal chog lea be lal laoh raeg we lea ma haffedeg chog temperature iyang. Teappel gich woal Yuldiy. Temperature iyang lal seral ila ma mel chog luwul walig 80 degrees.

Tea ma biidah mo uwoal (115) degrees mo wulurael ngo tea ma biidiy moa ifael (60) degrees mo wototoal. Iye mel re ma soer boa temperature "range." Ye chaep mo irel namba la ye hartal totoal sa biidah yee... la hola namba la ye hartal yaegyet mo lal seew environment. Seew environment lal faeyleng le ngo ye mwuslaoh yar temperature range.

Ilang 85 degrees be mel chog lal range irel temperature woal ekea fuluyach?

120 degrees be mel lal yach temperature range?

95 degrees be mel lal yar re Alaska temperature range?

Be ifa sangal ngo hasa gola toet hare meda mele yach temperature range?

Organisms ila ye memeal chog lea pangal laoh environment lal faeyleng le ngo re mel iyang. Igla siya gola lea paangal environment ngo yor temperature range iyang. Iwe siya wol gola lea pangear mael kala re ma memel lal sew environment ngo resa yaoru taeppel temperature range la ye mel lal environment la.

Iwe ngo yor toet organisms lea ye keal yar sensitive ngal temperature. Ila mwo mo lal chog sew temperature range ngo yor loebos kkala semat organisms rebe mel iyang ngo rebe moloaw. Iwe ngo ye wa yor semat organism lea re be mel iyang ngo re towe fel iyang hare sew ila rebe far mes.

Iye mele re ma soer bo "optimum". Optimum ila yel mel chog lal seew temperature range mo lal seew environment. Hala chog iye ila loebos le taeppel organism la re hartal dipli.

Temperature faeliyoal la mele "optimum" ngal guchoal mo mwaat?

Be yoh lea sibe la daer fadal ligtam siya la hapaoyu fadaley lapal temperature solbos mo soelbos. Taeppel; wulpiy, faeliyoal, fael irea kala ye llur, fael irea kea sa moar laoh wototoal, hare tea tugul soelbos.

Paangal loebos kkea ngo sibe wiri lea towe haffedeg fangal temperature iyang. Yor semat maael hare organisms lea sibe wirir mo soelbos kkea lea rebe choalop iwe ngo sibe loah mo soelbos ngo towe yor taeppel mael la iyang.

Ifa sangal,
Be choalop organisms soelbos lea temperature la iyang ila optimum ngalir taeppel organisms kala?

Hare be tea optimum temperature ngalir, ngo rebe choalop?

Ifa sangal, wa yor toet environmental factors kala ma wol yor mele ma faoru ngalir taeppel organisms kala re ma mel loebos la?

Pangal loebos lea si be loah iyang ngoa si mae wiri mael ppaechigchig moa iyang. Ikae mael kae re ma soer boa organisms. Semat mael ngoa re mel moa soelbos lea ye ma yoah haleear hare lemeear chaael moa iyang. Hare ye fel yaeyurraelel loebos lae ngaliir. Ilae mele re ma soer boa "habitat." Habitat ilae loebos kae re ma memmel semat moa semat maael iyang. Medae semat maael lea re ma mel luwul waluwol?

Hare si be loah moa soelbos hare irel seew environment ngoa sa semat maael hare organisms le siyae wiri moa iyang. Be yoah lea habe soer semat maael le si mae wiri moa wulpiy? Iyae mele no chichi ngoa yaar habitat hare bugteear? Mael kae si mae wiri moa wulpiy re haffedeg ngaliir choeg mael kae si mae wiri moa luwol waluwol?

Hare si be loah moa wooal seew fuluy, haffedeg choeg metmetael mael kala re mel wooal seew moa seew fuluy? Taeppel kaayru, yoor kaayru wooal fuluy kala tooet? Iwe ngoa faeliyey yoor kaayru iyang hare tooar? Hare paangal fuluy ngoa yoor kaayru iyang?

Yaremat mele re kakkadoh kaayru wooal mekae faeluyach. Re tea faesul mel choeg igae? Kaayru ilae re ma ttiril chaaoloao poah. Haramwo hal rumael choeg kaayru ngo towe sulay ngoa belea fedbuguy mwo. Malboa tooar kaayru wooal fuluy kala tooet. Medae faal lea bela yoor kaayru wooal tooet fuluy ngoa tooar wooal tooet fuluy iyang? Ye mel semat faaormel lea re ma soer boa "natural barrier." Towe yoah lea ir kaayru ka re be doh loah moa reeal "barrier" lae serea lea giich yaremat sibe tea tipngiir. Medae iy mele re ma soer boa "natural barrier?"

Siyae chooech kamaahoy tappel mael we re ma soer boa sneeyel (snails). Iy sneeyel le ilae ye dipli boa be chuy moa irel mele bugtal, sa loah reeal yallap la reeala serea. Iwe ngoa iy yallap le ilae ye ddaw fetaeng mekae ngech-ngachel. Ye ma kkar loah choeg le ye kkeeal yaal bichikkar lal iy yallap le. Be yoah lea sneeyel le be loah moa reeal "barrier" le moa reeala serea? Hare ye be ppey choeg reeale ye ma faesul mel iyang?

Medae semat faaormel (environmental factor) le be hakkeealae depel sneeyel le hare be loah reeala serea hare towe loah? Semat moa semat maael ilae re ma dohloah soelbos lea hare tooar mele ye peltae yalepeear. Be yoah lea kaayru rebe yaf loah irel fuluy kala tooet? Be ifae sangal ngoa re sa dohloah? Be yoah lea mael yeyael re be kakkodoh faesoel ire moa wooal fuluy kala tooet sala tumwuldah mao wooal fuluy dae? Habe soer soelmat faaormel lea giich yaremat si mae faaoru ngoa siyae dohloah wooal fuluy kala tooet iyang.

Semat faaormel ngoa ye ma ttiril choaloap loah moa soelbos lea ye fel ssaepel moa iyang.

Be taefel igeegel soelbos ngal semat maael lea re mwoach budoh iyang ngoa re towe moloaw. Hadal boa re bela mel lea be fechfech choeg lepal bichikkar hare lepal halloefoeng ngaliir. Iwe ngoa be yor mele rebe ma hangi moa igla. Iwe ngoa towe choaloap mael re ma lliir ir taeppel mael kae.

Yoor soelbos lea kaayru kowe re wiri boa bugteear lea ye mwomwaay? Medae mele ma wel semat faaormel le be mwomwaay loebos la re memmel iyang?

Rochooakala re mel wooal Alaska ilae soelbos lea ye kkeeal kkeeal halloefoeng ligtam iyang. Medae mele giich yaremat simae faaoru boa be mwomwaay choeg lepal halloefoeng hare bichikkar ngalich? Medae tooet faaormel lea simae faaoru boa sibe halloefoeng irel yodle ye kkeeal bichikkar iyang? Yaremat re sa foffoad mongoay lea sa choaloap. Re sa lilliir mael kae ye taeyikof. Pangal loebos ngoa bele mmwal lea sibe mel iyang boa sa yor imw lea sa yor misiinel halloefoeng moa bichikkar iyang. Doelpael maes kae ye wel fadal ngoa sa yor tafeyal. Meda mele sa wewel ngal yaael yaremat population lal faaeyleng le?

Kkamahoy Hamwayu

Ye ma mwomway lea si be kkamahoy maael hare irea. Hala chog iye ye choaloap metmetael maael lea re ma metmetael mwachoh fadal lea be yor yaremat soelbos. Iwe ngo gel ho goelae lea ila mwo mo mwat kowe ngo rema rrig laong lal ngatear lea re be meyaefiy mwaerel pecheel yaremat doh mo woal bool? Faal mala maael rema moetaog gich, ila faal lea si tea ma wiri makala rema faaoru.

Be ifa sangal ngo si ya goelae makala maael rema faaoru irel yod kala ir rebe kacchoeg bo toar le ye kakkamahor? Be yoah lea si bela mel soelbos mo ligtam lea be mwomwaay ngo siya kamahor. Sibe ppaolaoh choeg ngo si towe mmwaliliy. Hamsug laoh bo gel sehay irea lea hotwe bbuslaoh mwo. Mwaro laoh choeg lapal ssulayel lea be yoah iremw ngo hosa kamahor. Maell wototoal kea re ppachigchig mo ikea maell yeyael lea rebe kacchoeg bo gel sehay irea iwe ngo, belea yoah lea re belea mwagudgud fadal lea blea wochoeg bo ho tamel loebos lae. Kkamahoy makala ho ted wiri mwo mo fael sew.

kkamahoy Hamwayu...

We seew faaormel lea be yoah lea sibe kamahor maael iyang ila sibe faaoru seew mwitiyel loebos bo bugatear. Hare be yor chaael iyang bo liliyear yiig ilang, idal ila "aquarium." Terry ye mel seew mwitiyel aquarium yaal.

Be wa yoah lea sibe faaoru seew mwitiyel faaormel bo bugatear irea mo maell wol fuluy. Iye mele rema soer bo "terrarium." Be yoah lea sibe foad irea lal seew terrarium. Be yoah lea sibe yitoaloang fedmael mael kea re ppaechigchig taeppel yusel. Iwe ngo siya hatuguluy lea sibe fang halear mo lemear chaael.

Be yoah lea sibe kamahoy hare medae mel ma hangi medae. Be yoah lea sibe kamahoy taeppel mael kala rema dipli rebe mel soelbos. Be yoah lea sibe kamahoy hare medae mele ye faaoru lapal mael kala rema mel loebos la. Ifae sangal, ye biidah hare ye biidiy?

Sibi mwomwaay mael kala si yitoalong yilal. Si be hatuguluy lea be yor taeppel mongoay kala ye mwomwaay ngalir lea rebe mongoay. Si be hatuguluy hamwayu lea ye lap chaael iyang. Si towe tahcheloah choeg aquarium lae hare terrarium lae faeliyoal ligtam. Bo medae faal?

Bela sew yod lea sibe lae tea dipli lea sibe taeptaep irel mael kea ngo, be yoah lea sibe hammwale yach hatfaelir laoh soelbos lea si lae hasiir doh mo iyang.

Be yoah lea sibe ffaor "chart" bo sibe tafa loang makala si wiri lea ye wel iyang. Ye mwomwaay lea sibe golae read el charts.

Si yae kkaay igegel ffaorol yach chart. Be yoah lea sibe chart igili lapal naambal taeppel semat mo semat organisms kowe ye mel irel yaongoel terrarium we yael Joe. Kalngal yaongoel terrarium we yael Joe. Medae organism kala ho wiri? Be yoah lea sibe record igili lapal semat mo semat organism kala iyang.

Ye Buudoh Moa Irel Mekea Ye Moloaw

Ye choalop faormel lal chog sew environment. Yig we loal Terry ye taeptaep chael kowe ye mwomwaay mo mongoay. Ye tugul lea yor semael mwaal mo semael faefel ilang be yor layur yiig. Iwe ngo yor derel irel yod we predator haatuw we ye ddorfi yig we sa hangi.

Tom ye kkaay ngo sala mwoach gola fal mele werel yaal mo bechel yaal ila tea mwomway ngaliir laamw mo wa toet maael.

Tom mo Terry resa kkaay toet kkofal environmental factors. Ruwow metmetael environmental factors. Semat ila rema soer bo "biotic." Fal mele "bio" ila ye moloaw. Biotic ila pangal metmetael environmental factors kea ye buudoh mo irel mekea ye moloaw.

Mekea ye buudoh mo irel organisms kea ye moloaw hare ye mes, paangal ngo biotic. Ikea mekea biotic factors:

plants................ irea

predators.......... mael kea rema wol lili maael

prey.................. mael kea maael rema lliir

compost............ koyaas

decomposers..... mael kea rema hangi faormel yee la mongoangow laoh

feces................. piyah

mosquitoes........ laamw

human being...... yaremat

Iwe ngo semat ila "abiotic." "A" taftaf le mo igea ila tea mele faal. "Bio" ila ye moloaw. Abiotic ila pangalaoh environmental factors kea ye buudoh mo irel mekea tea moloaw.

Ikea mekea abiotic factors:

wind ........................... yaaeng

heat ............................ bichikkar

light ............................ werel faormel

water .......................... chaael

chemicals (like salt) .... hasiiga

rock ........................... porow iwe mo wa toet

Iy roruwow mekea, "biotic" mo "abiotic" ngo rema tipngi organisms bo rebe moloaw. Biotic mo abiotic ngo be yoah lea rebe lliy seew faormel.

Be yor maelmoel ngo ma hasidah taaed wolfuluy. Be choalop hames ngal fadah ngo rema mes. Hasiiga ila "abiotic."

Hasiiga ila ye mwomwaay ngal chog mekea ma faesul mel letted. Hare sibe kaaek mael letted siya yitiliir laong loecchoel, meda mele rebe faoru? Be hasigsig yee...re taeyikkeel laoh yig kala yee re mes.

Mael yeyael ila "biotic." Ma fang molowal loal igele be faed. Iwe ngo ye wa ma llir laoh toet maael igele be mongoay.

Mekea Ma Tumwul Lea Ye Hallaaeng Igegal

Ho chil luluwalley we sa moal yach kkaay kkofal life cycle irel irea hare mekea ma tumwul? Ikea iy mokwe siya mwoal kkaay:

Siya mwoal kkaay lea irea ila yor moharal. Mekea woharal mele ma mongoay mo iyang. Mongoay kala ma hangi mele ma moloaw iyang.

Cchiy hare hobe gola. Yor semat faormel lea ma wochog irea kea yal tumwul ngo ye hallaaeng mala igegal? Meda faal?

Taeppel irea le tea ma yor woharal.

Taeppel irea le tea ma yor hahaal mo yull.

Taeppel irea le tea ma yor yaedel hare floras iyang.

Taeppel irea le tea ma yor uwaal.

Ye hallaaeng hare: Iya mele ma yor taeppel irea kea iyang? Woal Maram?

Yeeab. Taeppel irea kea ila rema ppaey fadal chog lengchech iwe ngo ye weres yach ma wirir.

Ye farakkataw taeppel iy irea kea ye hallaaeng. Semat lea si tea ma wiri bo ye paechigchig hamaaes. Sibe igil taeptaep microscope hare piipiy kowe ngo siya mwoach wirir. Taeppel irea le rema soer bo bacteria.

Bacteria re fidi fedaeley yaaeng, ngo re mel luwol bool, ngo re wa ma wel luwol chaael. Yor mekea ma mel lloefdoegoech yaremat.

Yor ikala sima wiri ngal chog matach.

Algae hare lumwul letted kowe ila wa semat iy taeppel irea kea ye hallaaeng igegal. Mekea ila ye hartal paeleng pelaal bo ir mele chaepil food chain mo letted, lal lamw kea yaach hare luwol chaael kea ye ma kkil.

Semat iye lea sima wiri ngo ye wa paelleng pelaal. Taeppel iye rema soer bo "fungus."

Ye choalop metmetael fungus lea gel hosa mwoal wiri.

Yor irea lea be mmach uwaal ngo ma iy chog yal ppung diy wototoal. Be ssulaey yal mel woal bool ngo belea buudoh semat faormel mo iyang. Yor mele ma rochoppung ddoelal. Yor beabaey hare maaey kea sa ssulaey yal ppungdiy wototoal lea ho be wiri taeppel mele mo iyang? Hare yor ilang taeppel mala ho wiri ila mala re ma soer bo fungus.

Ho gola bo ye tumwul lea ma fefadaloah? Ho gola bo ye kakasi hal mo irel uwaal irea we sa mes?

We semat fungus ma tumwul mo woal mengaeg hare baabiyoar. Yor maedpil mengaeg hare baabiyoar lea hobe wiri lea sa ssulaey yal ppaey wototoal? Yor faormel uwoal lea ye spoey mo spoey ngo ye rochoppung. Makla spoey mo spoey lea ho wiri ikla mele fungus.

Sehay irea lea be mes sa moar loah iwe ngo be ssulaey loah ngo belea tumwul fungus mo uwoal. Belea tumwul sa pepaelleng laoh. Halear ye bubudoh mo ireal irea we sa mes Yor toet fungus lea ma paeleng taeng gumwchul semael yaremat.

Organisms Kea Re Mes Re Ma Yusuwwel

Be mes semat organism ngo belea yusuwwel. Toet mael lea rema soer bo "scavengers" belea chaep yar hangir. Mael kea rema yedaw mo letted re belea hangir yig kea re patdah wulpiy. Iwe ngo wuumwal re belea hangir wa semat maael.

Be la moalloah yar mael kea mongoay ngo belea mwoach chaep yar guubul taeppel irea kowe ma tumwul we ye hallaaeng igegear. Yor mo fael seew lea sa mmaeng ngalog lea beabaey kowe sa bbilaoh wototoal ila mongoal yar guubul fungus?

Taeppel mekea ye wochog irea lea ma tumwul ngo ye ma mongoay maael mo irea kea sa mes ila rema soer bo "decomposers." "Decomposers" mele rema hangi mekea sa mes yal mongoangow loah.

Ye choalop metmetael decomposers. Bacteria ila semat decomposers.

Si tea ma wiri bacteria. Iwe ngo yor yod kala sima ngoeru bool igele rebe tumwul soelbos. Mael kea ma mes lea sa bboa ila bacteria mele sa kakangi.

Fungus kowe ma tumwul woal hahaal irea kea sa mes ila semat decomposers. Fungus kea yar yengaeng ila rebe hattiri laoh yal mongoangow laoh irea we.

Fungus kowe rema tumwul woal uwaal irea kea ye ppung ila wa semat decomposer. Fungus kea rebe hattiri laoh yal mongoangow laoh uwaal irea we.

Igegal Ffaoroel Kkoyaas

Siya gola lea irea ila rema yul chaael mo irel woharear. Iwe ngo gel ho gola bo irea ye wa ma mongoay? Irea ila rewa taeppel chog organisms kea toet lea rema mongoay.

Ma ifa sangal yael sehay irea mongoay irel mala toar yawal? Re ma mongoay mo irel woharear. Doelpael irea lea rebe mes igele chaael chog mele re ma mongoay. Rema wol mongoay mongoay kea ye mel luwol bood lea ye mwomwaay ngaliir.

Re mwuswe re gola lea irea kea ma tumwul ila ye ma mongoay. Ho ma wirir feafel yar yiteet laong paeddoel mo semat mo semat pees lal towa? Mekea ila be hamwomwayi bool bo be mwomwaay tumwulul fadah.

Yor toet yaremat rall kea lea resa dipli rebe ma taeptaep chemicals kea ye ffaor mo lal factory. Iy chemicals kea ye ma hamwomwayu tumwulul fadah. Hala chog iye sima chuwayi ngal salpiy. Be ifa sangal yach foad loach fadah lea sibe tea la chuwaay mekea ye ffaor mo lal factory.

Re mwuswe rema yiteet chaaol irea mo pees irel chaepil yar fadah. Mekea lea bela mongoangow loah ngo belea mwomwaay ngal fadah we.

Yor toet makla sima faoru bo koyaas lea ye wa mwomwaay. Sew ila rema soer bo "Compost Pile." Ma yor liliyal lea sima faoru sa mwuslaoh mo soelbos. Iwe ngo bela mwomway ngo siya dorhoy ngal bool siya foad faormel iyang. Be iye sangal ilang belea mwomway tumwulul fadah. Iwe ngo be mwomway tumwulul semat fadah ilang be choalop uwaal. Be wua ilang belea choalop halach mongoay.

Ma ifa sangal ffaorol Compost pile?

Ffaoroel Compost Pile

Be yoah lea sibe ffaor yach compost pile. Ma iye sangal ffaoroel.
I. Faoru soelbos bo liliyal
Yor le ma faor liliyel yaal lea ma wochog chomwoalol paabiy kowe. Ma iye sangal bo mil mala de mwadardar fadal.

2. Kaaek doh semat mo semat organisms.

Ikea makla be yoah lea sibe la kaaek doh:

chaaol irea
yig kea sa mes
pelpel kea sa mes
uwaao irea kea sa baa
lumwul letted
pahal maael
falang
pisil mongoay

3. Yitoaloang organism kea lal melwe liliyal we ho faoru

Pangal laoh mekea ngo hobe yitoalong iyang. Iwe ngo hosa hammwale yaamw toatawo hare ho leba bo de buudoh laang iyang.

4. Widi be ruwow wiik ngo hosa guudu fedaeley mokwe ho faoru bo yamw koyaas

Compost pile hare koyaas ila ye ma bichikkar. Haddongo koyaas kowe yamw. Ye bichikkar? Ho bla haddongo ngo sa bichikkar iwe ngo ilang ila yod la hobe guudu iyang. Be ma moal yamw guudu ngo hosa hammwale hamwayu yamw totawo bo de buudoh yiil iyang.

5. Iwe ngo hoswa widi. Bela seew maram ngo belea mwomwaay.

Compost pile hare koyaas kowe yamw ila hobe la kamahoy ngo ho taay gola mele iiy mokwe ho yitoaloang iyang, iland ila yod la sa mwomwaay lea ho belea taepeli iyang. Hobe la kamahoy ngo sa wochog bo sa bool chog mokwe ye mel iyang. Ho tea wa gola bo pisil mongoay hare pelpel.

6. Iwe ngo ho bela foad irea iyang iwe ngo hobe dorgo ngal bool ngo hosa mwoach foad.

Compost hare koyaas kea belea hamwomwayu tumwulul yaamw fadah. Iwe ngo belea choalop uwaal yaamw fadah hare milaaey.

Yitoal dopomw. Paangal yood lea hobe yangsi compost hare koyaas kowe yaamw iyang ngo hobe hammwal yaamw tala pooamw.

Wa semat ffaoroel koyaas ila sima wol kaaek taeppel chog organisms kowe siya mwoal taeptaep. Sima hasi siya lebe diy luwol bool. Siya widi be seew maram mo wul mwiril ngo siya faodiy faormel loebos we si leba diy koyaas kowe yach iyang.

Be yoah lea ho be ffaor fadal yaamw koyaas semat mo semat faormel hobe hagela makla ye be mwomwaay ngo hosa hamaechraegiy yamw ma taepeli.

Faoru rumat koyaas ngo hosa faod irea iyang sibe kamohoy seew lea be mwomwaay tumwulul fadah kala iyang. Ye mwomwaay lea hobe taeptaep chog semat fadah.

Kassiy fadah hare yor le ye ma ffaor yal koyaas. Towe siy lea yor le ye choalop metmetael ffaoroel semat mo semat koyaas lea ye ma faaoru.

Cchiy hamwayu. Paangal fadah ngo rebe fadalloah ngo resa hangilaoh mokwe ye mwomwaay ngalir mo loebos we. Ila hobe la foad tefael loebos we ngo hoswa yiteet tooet koyaas iyang. Be ssulaey yaal mel semat fadah soelbos ngo siya fang koyaas ngali ilang be mwomwaay yaal tumwul.

Gel, ho dipli hobe mongoay paangal rall, hare yeeab?

Mekea Gilich
Ma Piltaegich

Simae Faeying Irel Bugs

INTRODUCTION

Unit le belea tiping gich bo sibe madaf ngo si gola fal lea sibe ma yitoal dapach irel halongoach bo sibe mel lea be mwomway. Mekea halongoach ila ye choalop tamway lea ma pach ngali. Unit le belea tiping gich sibe gola toet kkofal iy tamway kea. Tamway kea sibe le kkaay kkofal igla ila mekea tamwayel wol gilich.

Mekea gilich yaremat ma piltae gich taeng semat mo semat tamway. Hobe hamwale chog halongoamw ngo ye weres lea be pach ngalug tamway. Hala chog iye be masop soelbos mo uwoamw ilang ila yod la mael tamway blea bulaong lloefoedgomw.

Tea paangal tamway kea ma mel wol gilich ngo semat chog mele ye happadohoy. Yor toet lea sibe was ngo ilang siya tamway. Iwe ngo yor toet lea mael tamway kea taeyikof mele ye happadohoy. Iwe ngo ye wa yor toet lea yor chog semat faormel lea ye happadohoy. Lal unit le sibe le kkaay kkofal taeppel tamway kea: loos, ruub hare scabies, mo mekea ma waes mo uwoach.

Mael Ruubul Skibis Ma Kkeal Yaal Faeying Skibis

Ma ifa sangal yach gola skibis? Rubul skibis ye ma kkeal yal faeying. Ikea loebos kkea ma toa buyoey skibis mo iyang: llepadal haddoel paaoch mo haddoel pechech, irel hapilpilil paaoch, lletaerech, metael hapich mo lal dengach. Ikea loebos kkea skibis ma buyoey mo uwoach mo iyang.

Yaelwich mele ye hamw ngalir chog skibis. Semael yaelwich lea be pach ngali akibis iwe ngo be haffohoay irel yal faeying. Ye hamw ngal chog mala lloebong mele ye ma kkeal yal faeying skibis iyang.

Meda mele ye ma happadoh skibis? Cchiy hare meda? Makala mael skibis faor imwear fael mekea yaeyurel gilich resa mel iyang. Sibe kamahoy fael pipiy kowe ye kkeal ngo yor makala imwear lea sibe wiri.

Be pach ngal gich skibis ngo taeyikof lea sibe ma guru. Sibe skibis ngo ma infection. Iwe ngo be infection lea be lla ngo ilang sa taeyikof. Be kkeal yal infection skibis uwoal semael ngo ilaeng sa tamway. Be lea bbaereg hare ye faes lal dangal hare fael paaol iwe ngo belea wa ffoy ngo ye tamway laoh.

Meda mekea sima faoru lea be pach ngal gish skibis? Ikea toet mo irel makala be yoah lea sibe faoru. Be pach ngal skibis ngo pangear laoh yaremat woal bugat we ngo re be la taefey. Paangal choob mo hatoet mo mekea yaremat re maesoer ilal ngo be wubuub sa kapal way fael kkaral yaal.

Ifa sangal, ye mwomway lea hobe ma duudu laoh chog lea hobe skibis? Yak yeengoa! Be pach ngalug skibis ngo hobe ma hamwale chog yamw ma kililiy metael skibis kala. Be pach ngal semael skibis ngo ilang pangal ral ngo be ma duudu ngo ye yusuwiliy y al mengaeg. Pangal giyal mo hoatal ngo be ma wubuub sa kapal pangal ral.

Be yoah lea sibe taefeyae skibis? Be yoah. Skibis ilae sima taefeyae. Yor taefey kala ye mwomway irel taefeyel skibis. Be pach ngalug ngo hosa loah irer taogta bo ir mele rebe taefeyae. Yor semat taefey lea re ma soer bo Quell lea ila mele ye wa mwomway irel taefeyel skibis.

Hotwe Fang Losol Maeraereemw

Ma ifa sangal ngo siya gola loos? Pangach ngo si gola bo loos ila ma buuyoey mo wol gilich. Ye ma boobo way ngo ye ma yor lla iyang. Loos ila ye ma bbaereg ngo ma ramasow ngo ye checcha mala ddoelal. Loos ma wol happadoh mele ma faes lal dangach hare fael paaoch. Be kkeal yal taeyikof losol semael ngo ma tamway laoh iyang. Toar semael lea be los ngo tea ma meyaefiy yal bbaereg.

Meda mele sima los iyang? Loos ila ma buudoh mo irel mekea ye ma waes mo uwoach. Hare mekea taogta rema ddowu gich ngo tea ma mwomway yar kililiy metael dodow we re taepeli. Llaal seew loos be pach ngal semael ngo be wa buuyoey loos mo uwoal. Ila be los semael ngo ilaeng si taay harepa bo de hapcha ngal gich llaal losol swa la buyoey loos mo uwoach. Tea mil palloy mele sima los iyang.

Gel ho soer bo mil palloy hare ppung mele sima los iyang? Hobe kassiyar yarematal science ngo rebe soer bo yeeab. Doelpael yaremat rema soer bo ila sangal. Iwe ngo tea ila sangal.

Meda mele hobe faoru lea hobe los? Ye mwomway lea hobe yitoal sedep mengaeg kowe ye mwomway woal mala metal. Ye mwomway lea hotwe habibiliy fadaley makala llaal. Iwe ngo bela ssoegoel lla mengaeg we ho yitoal uwoal los we ngo hosa hasi hosla fisgi. Hotwe hachuya chog ngo hosa hallifdiyway ligtam. Iwe ngo be pach ngal pooamw lla ngo hosla kililiy ngal chael mo soop. Hamwale halamw mongoay bo de pach ngal lla.

Be ifa sangal ngo siya peltae loos taeng gich? Be yoah igle sibe ma duudu laoh chog ngo si sopa gich laoh chog paangal ral. Paangal yaremat ngo ye mwomway lea rebe ma duudu laoh chog ngo re sopar pangal ral. Hobe wa momongoay choy mongoay kala ye mwomway ngo ye weres lea be pach ngalug loos.

Ma ifa sangal yach taefeya loos? Ye choalop metmetael taefeyel loos. Seew ila sima halloyu mengaeg ngal chael bech siya yetedah uwoal lea be seral ngo fael suluw yaoh faoru. Hobe los ngo hotwe hatara. Ligdi bo be iy chog yal ttar. Ila mwo sa ttar ngo be yoah lea hobe chil kamela ngal chog chael bech. Ligdi lla kala iyang be iy chog yal bubuyoey. Hotwe hafalla. Hobe hafalla ngo be yoah lea be paelleng laoh. Hare ye infection swa la buyoey mo soelbos mo uwoamw.

Toet faormel ikea lea ye mwomway lea hobe gola irel kkofal yamw be chaelbichiy loos:

1. Kkabech chaael hosa yetoaloang lal seew mwitiyel taraay. Ligdi be soar maech sugfed mele hobe la chiy ngo belea mmwal lea hobe cchiradiy pooamw iyang.

2. Limi sedep mengaeg hosa chiri luwul chael bech we. La moal ngo hosa ngongdu laoh toet melwe chal.

3. La moal yamw wongdu laoh chal ngo hosa hachapadah woal metael los we.

4. Chael bech ila ye mwomway ngal loos.

5. Be maech laoh mengaeg le ngo hos wa chiri luwul chael be we ngo hosa hatfaeli dah woal metael los we.

Seew Gilat Moa Wol Gilimw

Paangal yaremat ngo re ma waes. Meda mele sima waes iyang? Ye choalop metmetael mele sima waes iyang. Sima waes irel saaer, reesa, maoloer, hare kobrea. Kukul laamw ngo ma waes gilich iyang.

Be waes chog soelbos mo uwoach ngo siya hamwale chog yach kililiy bo de buudoh baayking iyang. Meda mele sibe faoru lea sibe waes ngo siya toalpa gili loah? Kaengaliyey kkofal! Si faesul gola bo lelea buulaoh baayking iyang. Ila mwo mo seew chog mwitiyal mele ye waes mo uwoamw ngo be yoah lea be paeleng laoh. Infection ila germs hare baayking mele ma happadoh. Germs ila re kkitiitiyal lea sibe tea kalloang lal microscope ngo si towe wiri.

Fael mekea kkuch ila ma wol yor germs hare baayking iyang. Ila be waes soelbos mo uwoach ngo siya guru ngo ilang sa gich chog yach hapacha ngal gich maaes. Mael kowe re mel fael mekea kkuch rebe lea buulaong lal metael gilat we ilang belea infection.

Ifa sangal mekea gilich ye peltae taeng gich germs hare baayking? Ila sangal! Mekea gilich ila ye peltae germs hare baayking bo rede bulaong lloefdoegoech. Ila sibe waes ngo sa bulaong baayking hare germs llefrach ilang siya tamway.

Mekea gilich yaremat ila taepel chog sefaes uwaal irea. Sefaes beabaey lea be mmach toar mele ye hatawasiy mala gil, ilang toar mele be faoru mala yaddol. Iwe ngo hare semael maael sa hatarra mala gil ilang yor mele belea faoru melwe yaddol beabaey we. Yor ikea sima wirir mael kala rema hatawsiy melwe yaddol beabaey we. Iwe ngo ye wa yor semat maael lea be hatawsiy melwe yaddol beabaey we ngo si towe wiri.

Be ifa sangal ngo siya peltae taeng gich infection? Tea ma paangal mekea ma waes mo uwoach ngo ma infection. Hobe waes ngo hosa haduduy ngal chaael hosa sopa. Waes kea ye ppaechigchig ila be yoah lea sibe taepe chog mokwe mill lu.

Iwe ngo waes kea ye ppalingling, ye mwomway lea hobe hamwale yamw kililiy ngael chael mo soop iwe ngo hosa dugmi ngal hotaay hare sedep mengaeg kowe ye mwomway. Paangal waes kea ye ppalingling ngo sibe hasi laob irel taogta. Tea tugul mele ye waes mo uwoamw ngo taeyikof lea hobe haettaer howaal.

Wa seew kkofal yach be peltae taeng gich infection iye. Hobe mongoay kea ye mwomway ngal halongomw ngo ye were lea be pach ngalug tamway. Semael lea be mwomway halongol ngo ye weres lea be tamway laoh chog. Rechoa kea ye mwomway halongoar ila rechoa kea rema mongoay mongoaykea ye mwomway ngo re hamwale halongoar ngo re duudu paangal ral.

Ye mwomway lea sibe ma kililiy chog paaoch ngal chaael mo soop. Iwe ngo si wa suluy kkuch bo de mmwaech baayking iyang ngo si hapacha ngal halach siyaal tamway iyang. Hobe kamahoy lea be lalaay chog kkumw ngo sa yor bool iyang. Ila ye mwomway lea sibe ma susuluy chog kkuch.

Iyae Mele Ma Loah Iyang
Lea Sibe Ppedaeloah?

Yaach Chaepdoh Rema Taeptaep Mekea Ye Biodegradable

Makala yach chaepdoh woal fuluy kea rema mel woal fuluy kea mwuswe mwuswe. Si togla hare belea ifa lapal sengraes raaeg raegel yar mel woal fuluy kea. Re ma hasi halear mo letted mo wol fuluy. Re faor waar mo hapler mo irel irea. Fuluy mo taaed ye paeleng mele ye hammwal ngalir rumwuswe kala rema mel woal fuluy kea. Paangal makala rema taepe ngo re hasi mo letted ngo rewa hasi mo wol fuluy.

Paangal faormel ngo be tayor pelael ngal gish hare taay kkof ngo siya ppedae loh. Toet makla ma pepe loh ila, piyyol, pisil yaas, pisil chil yiig, petal irea kea taay kkof, mo wa toet. Paangal mekea ngo ma paey wol bool yee...mongoangow loh Re mwuswe re gola lea paangal mekea ye mel woal fuluy kea ngo ye mel seew yad lea be tewaes.

Paangal mekea ngo be loah luwol bool ngo yor semat maael lea rema hangi. Ir taeppel mael kala ila bacteria, yeast, hare molds. Ikea taeppel mael kea sibe ppedaeloh pees ngo ir resa buudoh iyang resa hangi yee...sibe la gola ngo sa mongoangow loh. Re belea mongoangow res tafael laoh luwol bool. Iwe ngo irea kea re tumwul re belea mwoach hangi mo luwul bool.

Iwe nge belea buyoey letted ngo yor organisms kala re belea wa la hangir mo iyang. Yor ikala re ppaechigchig ngo yor ikala ppaalingling. Belea hasigsiig yee...la mel bo part irel food chain. Wol fuluy hare letted ngo paangal organisms ngo rema buudoh yee... resa moa loah.

Mekea ye ma buudoh mo wol fuluy hare letted ila rema soer bo "biodegradable." "BIO" ila life hare ye molow. Iwe ngo degrade ila hatawsiy sala mel bo semat faaormel. Biodegradable ila makla toet organisms kala re molow rebe hatawsiy sla mel bo semat faaormel lea tea pooyson. Compost hare koyaas mele sibe wiri yal ma biodegrade toet faaormel iyang.

Yoor Mekea Mwooach Buudoh Irech Lea Tea Biodegradable

Re mwuswe ye mwomway chog yar environment bo paangal makla rema taepeli ngo re kakaesi chog mo letted mo wol fuluy. Paangal makla re taepeli ngo mekea biodegradable. Re be pedaeloah ngo semat maael sa hangi hare maell decomposers re hangi.

Rall kea, sa choalop mekea taeyikof lea sa bubudoh. Yor mekea tea biodegradable lea sa bubudoh. Mekea yema faaor mo lal factory. Taeppel maoloer mo plastic mo kobrea mo wa tooet. Mekea ye weres lea be mongoangow loah mo luwol bool hare tea tugul soelbos. Tooet mekea ye mwomway ngal gich ngo tooet tea mwomway. Be choalop hamaaes ilang sa taeyikof.

Yor makla re mwuswe re taeptaep iyang lea gich fael mwo le si chil taeptaep iyang. Paangal mekea sibe pedaeloah ngo be decompose hare ye mongoangow loah. Mil mala mekea si pedaeloah ila biodegradable, mekea siya yetoaloah bo pees be mongoangow loah.

Hobe loah irel bugatamw hare skuun hare soelbos ngo ho sla kamahoy mekea biodegradable mo ikea te biodegradable. Kamahoy fangaliy hare yor mele be ail mo iyang.

Kamahoy fangaliy ruwow tteyel faormel mo letted. Seew tteyel mekea biodegradable ngo seew tteyel mekea tea biodegradable. Teyal la biodegradable ial yiig rebe hangi hare iy chog yal mongoangow loah letted.

Iwe ngo tteyal la tea biodegradable ila be mel yee...toatoa loah fael piiy ngo toar semat mael letted lea be mwechael hangi. Taepel maoloer mo plastik ahre paarang lea sibe ppedaeway letted ngo bela ruyeeg hare siliig raaeg ngo hobe la buyoey ngo be chil mel laoh chog.

Moaloer mo plastik kantenoer ila ye mwomway irel liliyel chaael mo wa toet faaormel. Iwe ngo yor toet maoloer mo mekea ye ffaor mo factory lea taeyikof. Organisms re te dipli rebe mongoay maoloer mo plastik mo paarang. Re be mel soelbos re sa mel chog. Re tea ma mongoangow loah. Hobe lea toolu toolu yee...la chaolop ilang blea taeyikof.

Tea tugul hare wol fuluy hare letted mele ye mel mekea iyang ngo te ma ttir yal maoloah. Lapal yach totoolu dah ngo ila lapal yal kakadiyae loah semat maael mo irel liliyear. Lapal yach totoolu dah ngo ila lapal pees lea siya kakatteyili.

Mekea biodegradable be hasisig yee wa mel laoh bo bool lea ilang belea mwomway ngal fadah. Paangal mekea biodegradable ngo ikala mele re belea mel laoh bo bool resa hammwal tumwulul fadah bo be choalop uwaal. Iwe ngo maedidipil maoloer mo plastik mo paarang lea be mel luwol bool ngo towe yoh lea be mwomway tumwulul fadah iyang.

Yoor Mekea Mwooach Buudoh Irech Lea Pooyson.

Yor toet faormel lea pooyson hare yor suup iyang. Mekea ye ffaor mo lal factory ila ye mwomway ngal gich. Iwe ngo yor ikala ye taeyikof ngal yach environment. Yaremat re ma hangi makla ye mel lal yar environment. Yaremat rema hangi yig kea re paelleng. Iwe ngo ir yig kea rema hangir yig kea re paechigchig. Yig kea re paechigchig rema hangir yig kea re mmwititiyal toet. Iwe ngo yig kea re mmwititiyal rewa ma hangir semat organisms lea re hartael kkitityal lea si taema wiri ngal chog matach. lye mele rema soer bo "food chain." Food chain mele ye kawar ngal gich lea gich yaremat si tabtob ngal yaach environment irel mongoay. Gich yaremat mele si mel mo hartal mo uwoal mo irel food chain.

Be mwomway yal kilil yach environment ngo ilang paangal mongoay kea sima hangi ngo ye be meomway ngal halongoach. Iwe ngo be yor pooyson lal yach environment ilang be yoah lea yaremat reve hangi pooyson kala. Gich ngo si gola lea pooyson hare suup ila taeyikof ngal gich.

Rall kea ngo scientist resa gola lea re Maeriken doelpear lea sa mel kassugfed pooyson lloefdoegoer. Semat pooyson ila DDT. DDT ila mil liliil maael. Sima pooma dah woal fadah bo be me maael mo iyang. Iwe ngo belea ppaotaog sa dah loah luwol bool. Belea buyoey letted slal pach ngalir yiig. Iwe ngo yaremat resa hangir yiig kala sala pach ngalir DDT.

Pooyson ye ma chochoalop loah lal food chain. Wol fuluy ngo wa iye sangal mo iyang. Seew ila toet fadah lea sibe pooma ngal pooyson. Maeloeg belea budoh sa hangi iy fadah kowe. Iwe ngo yaremat resa hangi iy maeloeg we. Iwe ilang belea yor pooyson lloefdoegoel remtawe sa hangi maeloeg we.

Tea mechraeg yach ma ttiril gola hare sa yor pooyson uwoal semael. Felal chog lea scientist rebe hasi chaal remtawe re sla kamahoy. Iwe ngo ngo rewa hasi chael ddur feafel re sala kamahoy hare yor semat pooyson iyang. Chael ddur feafil Maeriken ila sa yor semat mo semat metmetael pooyson iyang. Taogta resa mwarah bo mekea ila taeyikof ngal ir yaelwich. Yor le ma soer bo sa tamway irel pooyson ila mwo ye togla hare ifa sangal yal buulaong pooyson llefraal.

Gich si yobuw bo toar taeppel pooyson kea lal yach food chain. Toar taeppel pooyson kala woal Maeriken woal mekea fuluyach. Hala chog iye ye mwomway lea sibe gola kkofal pooyson yal ma buulaong lal food chain bo sibe piltae taeng gich. Fael kkafaessew ngo ma buudoh taepel pooyson kea woal mekea fuluyach. Ila sibe yitoal dapach iyang bo ye hammwarah.