translated by Mariano Laimoh
illustrated by Eric Woo

Irea ilae ye paelleng pelaal. Ye paelleng pelaal ngaliir pangeear yaremat. Sehay choeg irea ngoa ye chooaloap mele be buudoh moa iyang. Seew makla pelaal irea ilae be halluru yaremat moa maael.

Siyae chooech kamaahoy yidel soelboes moa soelboes moa irel sehay irea. Uwaal, chaepil, raal, yull hare chaaol, woharal.

ACTIVITIES:
a) Ho loah ligtam ifaael sehay irea kala ye harepdoh. Medae mele ho meeafi? Ifae seew lea ye halloefoeng? Faael llurul irea la hare faael kkaral yaal?

b) Ho la tirgidoh sehay irea kala ye weeachiich boa ho be soer idel sooelboes moa sooelboes moa uwooal.

Ye chooaloap matmatal uwaal irea. Yoor tooet uwaal irea lea si tea ma moangoay. Ye chooaloap tooet uwaal irea lea si mae moangoay boa ye hasafaluy yaal chaelgar. Ifae sangal maangga lea be mmach. Ma rammasow hare ma mechaegchooeg? Ma yor bool? Uwaal irea kala taeppel maangga moa harfad ilae ye mwomwaay ngal halngoch yaremat. Ye wa paelleng pelaal uwaal irea boa ikala mele mael yeyyael re ma moangoay. Choa we yaael mwiliy moa gech yeyyael moa ikowe tooet.

Ye wa paelleng pelaal haahaal irea. Yaremat re ma taepe boa yaar faefi. Wooal fuluy kalaay ye paalingling, re ma faaor baabiyoar moa ireal haahaal irea. Iwe moa paap boa paapal iimw.

Yaremat re wa ma teptaep irea irel waa. Maael re ma faaor hafteear hare imweear yuchuul irea.

ACTIVITIES:
1) Medae tooet makala ye ma buudoh moa irel irea?

2) Sungali makea:
a) sehay irea lea ye mel semael maael yuchuul.
b) haahaal sehay irea.
c) yooangol semat faaormel lea ma buudoh moa irel haahaal irea.

Hare si be ma sopsop loah chog irea, ilae ngoa bala rallkalaay ngoa tea wa yor loah irea le si be taepeeli ngal imwach. Ye mwomwaay lea yaremat re be ma sopsop irea ngoa re sa faedagu tooet.

ACTIVITIES:
1) Ye mel sooelboes lea ruungras (2,000) irea le ye mel iyang. Hare be seew raaeg ngoa limbuguy (500) mele ye sopsoploah moa iyang. Be foedow raaeg ngoa sa retloah irea kea?

2) Seew fuluy lea ruungras irea la ye foad iyang. Be seew raaeg ngoa limbuguy irea lea ye sopsoploah moa iyang. Iwe ngoa ruubguy moa lemeeg mele ye foad tefaael. Fedhay irea lea tea tefaael liiwlil?

Gill irea ilae ye wa paelleng pelaal. Ye chooaloap irea kala si mae taepe mokowe gill irel fooarol fooarmel. Taeppel gulfoey moa yuuch. Yaremat re ma taepe mokowe gill boa yangteear. Iye lepal yaal paelleng pelaal irea ngalgich.

ACTIVITIES:
Habe tafadiy idel gill irea kala ha ma taeptaep irel bugataemi. Ha soer hare medae mele ha ma taeptaep iyang.

Yull irea ilae ye wa paelleng pelaal. Si mae taeptaep yull irea boa taefey, hare chaaol halach mongoay, hare tooatooal wuumw. Si wa ma taeptaep yull irea boa walmaaoroel yaach towa.

Ho be iteetlong bool moa yull waluwol lal seew faaormel ho sa fadhaaloah sooelboes. Be foedow wiik moa wolmwiril ngoa ho sa tefaael ngali ho be kamaahoy hare chiil mel choeg boa yull irea.

Woharal irea ilae ye wa paelleng pelaal. Hare be tooar woharal irea, ilae ngoa paangal irea ngoa be moarroloah. Iwe ngoa wa woharal irea mele ye yoyoah hal irea moa iyang. Hare be tea yoh hal sehay irea ngoa be mes. Makla irea ma kakkangi moa luwol bool ilae tea taeppel makae gich si mae mongoay. Si tea ma wiri.

ACTIVITIES:
a) Tafa yidel semat wohar lea ho ma taeptaep irel bugatamw.

b) Tirgidah sehay walwol kala. Hasuudiyo wooal bool. Ye heeatfae? Chiil mmwal lea be su?

c) Be ppoetaog ngoa ho sa kamaahoy seew teeyel bool. Ye heeatfae? Tea chuyloah tooet moa irel bol kowe?