translated by Mariano Laimoh
illustrated by Robert Fithing

Semal mwalallap lea ye choalop liital. Ye choalop yaal raw mo wa toet peteg. Iwe ngo ye mel chog dapal irel salpiy mo imwoal iy mokwe liital. Seral ngo sa hasi toet iy raw kowe yaal sala tape chiuwaay. Melwe ye choalop salpiy lea ye yoh ngaeli mo irel iy raw kowe, ilae melwe ble tefael swa la hasi iy kowe toet we chil mel irel melwe imwal. Sa chiuwaayiloh pangal iy raw kowe yaal we ye mel irel melwe imwal. Taay mmwal yaal rray iy mwalallap we bo sa choalop salpiy lea sa yoh ngaeli. Sa hatteyli fangali paangal iy salpiy kowe loal sala mel chog lea setab patal hoal. Sa mammal chog malpawe. Sa rruwloh mokwe matal.

Iwe ngo wa tea dapal lea be itol iy patal hoal we loal lal iy melwe imwal bo yarmat re dela wiri re sala perea. Malpawe sa hasi iy patal hoal we sala lebae mo liugiul chog melwe imwal. Paangal ral ngo ye ma buyoy liugiul iy melwe imwal loebos we yemel hoal we iyang. Be harahway sa siussiu fadal mwo ngo ye kakkachaparal foffoer seew faormel ngo ye kakkal fadal hare toar le ye harepdoh. Iwe ngo blea mwoach loh sala kilngi iy patal hoal we loal. Tea ma hallangadah iy hoal we mo lal melwe lebal. Be kilngi lea be lahdah chog ngo sa poaloh tewa kil. Blea kal fadal mwo. Hare toar lea ye wiri ngo blea buudoh doddoafi fadaley iy patal hoal we mo lal melwe lebal. Iwe ngo blea wa rruwloh mokwe matal ngo blea hamaliflif chog.

Tea ma ssiulay yaal kamaahoy iy hoal we loal ngo sa lebae tafaeli. Mill chog melwe yarmat rede wiridoh mo iy loebos we re sala wiri iy hoal we loal. Seral ngo iwe, seral ngo iwe. Hasigsig yee, la rallawe seral ngo swa buyoy bo choal kamahool iy hoal we loal. Taay la sar siussiu mwo bo be ffag yarmat. Yagel melwe paangal ral lea be buyoy ngo toar le ma wiri. Ye buyoy chog mwal ngo sa tteang loebos we yemal iy hoal we iyang. Ye hola chog ngo sa chap yaal kkil. Melwe chil kikkil ngo tuwiri semal yarmat lea ye daddardoh mo liugiul iy melwe imwal. Ye dardoh iy ramtawe semal sala wiri iy mwalallap we yaal kikkil loh chog. Yaal liulliuwal iy ramtawe semal be soer bo hare sa buch iy mwalallap we, yee, ngo swa tabo yaal darloh. Melwe sa daddarloh ngo swa buulong seew liulliuwal lal chamwal. Sa soer bo, "Mal bo te buch mwalallap we. Mal bo yoor salpiy lea ye liblib loboes we ngo mwalallap we ted wiri. Towe si lea ngaeng ibe mweri ngo ibe wiri." Melwe la llefhaefdiy lea ye masorloh mwalallap we ngo sa tafaeldoh iy ramtawe semal, fangal mo yaal sebin mo kuwa.

Ye mwarel kil loh chog siugfed ngo ye lahdah iy hoal we. Iwe ngo mwal ye la halangadah mo lal iy lib we. Sa rruw toet mokwe matal mo imwoal mokwe metal mwalallap we irel yodwe ma buyoy kamaahoy iy hoal we loal iyang. Mwal ye hasi chog iy hoal we ngo ye itollong chog lal tiutiuw we yaal ngo ye ppaesloh. Sa loh lliubugtal sala wolpagloh iyang. Iwe ngo la lemaeliyel chog rallawe seral ngo swa buyoy iy mwalallap we bo choal killil iy hoal we loal. Ye la buyoy, sa sugegdah chog iy lib we ngo taay mel iy hoal we loal iyang. Malpawe sa mwarrodiy mo isrea iy lib we sa taeng. Chil tettaengloh chog ngo sa buudoh semal mwal irel sa kassiyae hare meda mele ye tettaeng iyang. Ngo iy sa kkaengaliu iy mokwe sa wel ngaeli. Iwe ngo iy mwal we semal sa soer bo, "Toer pelaal le hobe taeng. Hare taay mel patal hoal la loamw le pangal ral ngo homa buyoy chog yangsi ngo hoswa lebae tafaeli, ila ngo hosa hasi chog seew porow kala hoswa lebae loboes lae. Paangal ral le hobe yangsi porow la ngo hosa liuliuwaley lea mal bo patal hoal we loamw mala hosa yangsi." Sa loh iy mwal we ngo iy mwalallap we sa kokkoeraeloh, ngo te mele be fedey lea taay mel iy hoal we loal.