translated by Mariano Laimoh
illustrated by Joy Goodenow

Semael tarmwaal moa mala tamal re ma fetae loah chog. Paangal rall lea re be loah fetae ngoa re bela tefaael ngoa sa yugmmwaay loah ffa kowe yaar. Paangal metmetael yigil yoch ngoa re ma hola.

Taay chu depeear moa irel iy fetae we yaar. Irel yodla ngoa hasafaluy yaal figir yiig. Re be buyoy letted ngoa yiig ye yiyyil fadal chog lengcheer. Haraamwo re yiyyil loah ngoa re tea ma lew iir yig kowe.

Iwe ngoa halaachog ilae iy tarmwaal we moa melwe temal, re sa hallemechraeg chog irel iy fetae we yaar. Re ma kakk kolooraaks (Clorox) re sa la hasesser loah letted. Towe ssuulay ngoa re sa mes loah yiig. Iwe ngoa re buudoh haapiyep. Re bele haapiy chog ikowe re dipili ngoa re tahcheeloah ikowe tooet.

Loah seew raaeg, loah seew raaeg, lea iy we chog mele re foeffaaoru. Yea ngoa, re be heeat we tea ma ret kolooraaks moa lal kaantiin. Sa mwomwaay chog depeear irel iy melwe. Re sa wiri paar moa iyang.

La foedow loah raaeg moa wolmwiril ngoa sa wewweeachichdiy lapal yig kowe re ma hola. Sa ssoong iy mwaal we temael tarmwaal we. Sa soer boa, "Haale, medae mele sa faaoru lea sa ma hal fedmael yiig lea siyae ma hola? Saal ma chooaloap chog rallakowe yee?"

Ye mel semael mwaal lea ye la dabey seew ttey sooelboes yee la tefaaeldoh. La llefhaaefel seral ngoa sa buudoh irel iy tarmwaal we moa melwe temal. Sa kaengaluur boa iy ilae mwooach buudoh moa irel seew ttey lea kkofel yooch moa yiig.

Sa kaengaluur boa yooch ilae ye moaloaw. Ye ma doddaaoloah. Iwe ngoa kolooraaks ilae ma lliy loah mael kala ye ppaaechigchig le iir mele re hamoalwa yooch. Be mes yooch ngoa si te ma golae boa re tea ma ppisdah lea be woochog yig kowe re be mes ngoa re sa ppisdah.

Iy mwaal we sa wa kaengaluur boa, yoor yig kala ye mommongoay chog yoch kala ye moaloaw. Iwe ngoa hare be mes loah yooch, ilae ngoa re bele wa mes loah iir yig kala boa tayor mele re be chiil hangi.

Iwe ngoa sa wa kassiyaaer hare chiil ma yor yig kowe ye ppaalingling le re chiil ma wiri moa lengchel yoch kowe. Loebooes kowe re ma teptaep kolooraaks iyang. Iy tarmwaal we moa melwe temal re sa soer boa taayor yig kowe ye paelleng lea re chiil ma wiri. Mwaal we sa kaengaluur boa, "Faael mala re taay buudoh iyang, ilae mel mala taayor mele re be hangi. Boa yig kowe re ppaaechigchig mele re kakkangi ngoa taayor. Iwe ngoa taayor yig kowe ye ppaaechigchig boa sa mes yoch we re ma hangi."

Taay bbusloah mwo iy melwe temael tarmwaal we. Ye pedassuulay loah ngoa sa soer boa, "Haelwe, iy tea la chicchiy loah mwo lepal mele iy sae faaor ngal yiig moa yooch igla. Medae mele sa raaeg moa raaeg yaaemem lilliy loah chog yooch. Ifae sangal lea ilae chog moalwach ilae ngoa si lae buudoh lilliy loah chog. Giich chog yaach kakkafoahoayu gich.

Mwaal we sa kaengaluur boa taayor pelaal raeg kowe boa sa moal. Ikae mooach bubbuudoh mele si be lulluwalley. Mwaal we sa ligdiir sa loah ngoa iir re sa lulluwalley iy mokowe re kapata.

Yodla chog ngoa taayor seral lea re chiil ma fetae irel kolooraaks. Iwe ngoa hare semael iir mokowe looal iy mwaal we be la fetae irel kolooraaks ngoa iy melwe temeear ma wwoadu.

Ilae hare si be paoloah moa irel yaach ma teptaep kolooraaks, ilae ngoa be chooaloap chog yiig ngoa ye mwomwaay chog yoch kae yaach. Ilae ho la peppey gel semael ngoa ho lulluwalley hare ifae mele ye mwomwaay le si be faaoru. Hare si be ma teptaep kolooraaks hare si towe ma teptaep. Haami, medae yaaemi lulluwall iyang?