FIYANGOL
FAELUYAC

Table of Contents

Maleekah
written by: Mariano Laimoh
illustrated by: Eric Woo

Legacheag We John Ye Foeriu
written by: Mariano Laimoh
illustrated by: John Lennon

Semal Gech
written by: Isaac Langal
illustrated by: Joy Goodenow

Geech Moa Yaeff
written by: Mariano Laimoh
illustrated by: Dexter Doi

Hammaereyar
written by: Mariano Laimoh
illustrated by: Joy Goodenow

Yoroor We Mele Ye Chapiy
translated by: Mariano Laimoh
illustrated by: Starla Stone

MALEEKAH

Haatuw ye mwaroro yiuchiul wae we waal sa faffadolloh.  Iwe sa ffasangiu malog bo be dabey irel maleekah.

Malog we sa chiudah yiuchiul iy wae we ngo sa ffasangiu gech bo be dabeer irel maleekah.

Gech we sa harahdah sa ffasangiu pes bo be dabeer irel maleekah.

Healwe pes ye lliutdah chog ngo sa ffasangiu haluuf bo be wa dabeer irel maleekah.

Haluuf we sa harahlong lliuwa ngo ye taguil sa ffasangiu paabiy bo be buudoh dabeer irel maleekah.

Paabiy we ye harahdah chog ngo sa kassiyaer ir mael kowe bo, "Towe dipmi lea iy be kkaengaliu karbow bo be buudoh dabeegich?" Iwe ngo ir mael kowe re sa soer bo, "Ffasangiu bo be dabeegich."

Iwe iy karbow we sa biidah yiuchiul iy wae we ngo sa soer bo, "Towe dipmi lea ha be dabeeyey irel. . .

diudiu?

Legacheag We
John Ye Foeriu

John tayi rray bo toar waal legacheag. Ye dipli bo ye be foeriu seyaey legacheag bo waal.

Ye sa loh sala faffag fadal choal maey bo ye be foer seyaey legacheag bo waal.

Ye sa hatteyli fangali toet choal maey ngo sa buudoh dowelley melwe ye hartal dipli mo liuwol iy choal maey kowe.

Ye sa loh sala hoalhoal hoalhoal yee la lallaay lallaay.  Ye dipli be lallaay melwe yoal iy legacheag we waal.

Iwe ngo ye loh sala dafdef  looh mo irel seew paddol.  Iy looh kowe, ilae mele lohol iy legacheag we waal.

Ye sa hasi iy looh kowe sa happachadah bo chiil iy choal maey we waal legacheag. Iwe ngo ye buudoh hoahoyiu iy looh kowe irel hoalhoal we ye holo.

Ye sa rray hames healwe John irel melwe ye sa yor waal legacheag.  Ye sa hasi chog iy legacheag we waal sa hamdaeloh irel mokwe maerereel.

Ye sa loh sala kowar ngaelir ir mokwe maerereel iy legacheag we sa foeriu. Ye sa kkeal kkeal yaal rray John irel melwe sa mmwal ngaeli lea be foer seyaey legacheag.

SEMAL GECH

Gech mwachoh we ye ma hal semal chog woal yaal mel. Iy gech mwachoh we ye ma peraf loh chog hal.

Ye be peraf chog hal mongoy ngo sa ddar. Iy gech mwachoh we ye ma mel fael sew porow.

Iy yoachoach we imwel iy gech mwachoh we ye choalop fadol lea ye daoloh uwoal.
Seral ngo sa la buudoh irel sew imw bo hadal bo be peraf.

Ye chil sap ngal sew kahool bo ye ngangarsi melwe pegil bo ye be buulong iyang bo ye be peraf hall ngo ye la kalloh sala wiri sew tafich.

Ye togla bo sew tafich iy melwe sa wiri.

Woal iy tafich we ye mel sedep fodogol paabiy uwoal.
Melwe gech mwachoh we ye wiri chog ngo mwal sa sseb ngali bo hadalbo ye be perea iy madipil fodog we bo hall.

Mwal sa leflef ngali iy tafich we yee la harpa ngo sa la siuloh sa kakkalfadal mwo hare yor le ye kakkamaahoy hare toar.

Toar chog le ye wiri mwal ngo sa fal woal tafich we. Ye fal chog ngo sa ttongoangal madipil fodog we. Lea melwe ye ttiugiudoh madipil fodog we ngo sa chobraegloh tafich we. Iwe sa la mmwachloh melwe pecheel moach we lea taay baeng bo be hachiuya.

Healwe geech mo yaff re maereyaer.
Seral ngo re sala yesfaliuy fadal.
Re sa soer bo re be ma hamwale fangalir chog.

Re loh re sala wiri sehay liu.
Iwe ngo re sa batbat.
Re sa soer bo hadal bo haelwe geech mele bla falgi iy liu we.

Iwe, haelwe geech sa harahdah ngo haelwe yaff sa mel fael iy liu we.
Yaff we sa widi chog haelwe geech fael iy liu we.
Iy geech we ye harahdah sala yiul chog mo yiuchiul iy liu we.

Iwe ngo yaff we sa hasi chog, ngarsi chapil iy liu we.
Sa moarloh iy liu we ye mel haelwe geech iyang.
Sala ppungdiy iy haelwe geech.
Yaff sa buudoh yiul iy liu kowe.
Iwe ngo geech taay mmwal le be yiul liu.

Mark idel semal tarmwaal le hasafaliuy yaal haffoiy. Iwe ngo Pedro idel ila semal le hasafaliuy yaal reepiy.

Seral ngo healwe Pedro sa loh irel melwe imwel Mark. Ye la buudoh ngo iy Mark ye mel matal iy melwe imwal lea ye mwaroroloh chog.

Iwe iy Pedro sa kaengalu Mark bo, "Mark, siya loh sibla koakomw wulpiy?"

Iwe ngo iy Mark sa soer bo, "Ila ngo, siya loh."

Resa biidiy healkowe wulpiy resala koakomw iyang. Iy Pedro sa taftaf wulpiy.

Iwe ngo healwe Mark sa foffor waal boot piy. Resa koakomw toet yee, iy Mark ye la kalloh sa la wiri iy melwe Pedro ye tattafa. Sa kassiya Pedro bo, "Yoangol meda mala ho tattafa."

Iwe ngo iy Pedro sa mammal ngo sa kaengalu bo, "Malbo mala yoangomw hare mada." Iy Pedro ye kakkamammal ngael chog Mark iy melwe.

Melwe ngo iy Mark taay kamammal bo sa ssoong. Sa ffalgi iy yoangol melwe Pedro ye tafa.

Iwe ngo iy Pedro sa soer bo, "Yaek ho Mark. Ho togla bo yaach kamammal chog iy mele ngo gel ho sala ssoongloh iyang." Iy Mark taay mwaliliy bo sa cholloh chog. Sa ppoaloh chog.

Iwe ngo iy Pedro sa soer bo, "Ila faal le toar le ma mwechal koakomw ngalug iyang. Mil mala ho be ssoong chog ngo ho sa hattawas."

Mark sa kalngael Pedro lea sa kkael yael ssoong. Sa soer bo, "Ingead seral lea iy hattawas, ngae?"

Iwe ngo Pedro sa kaengalu bo, "Ngo meda iwe ho ssoongchog irel melwe teyoh ngaelug mwiliy we ho sa hattawasi paachiingko we yaal Willy." Iy Mark taay mwalili bo kattoes melwe Pedro ye soer.

Iwe ngo iy Pedro sa soer bo, "Iwe ngo ho gula bo tea yoangomw melwe iy tafa bo yoangol semal haatuw ngo ho sa la ssoong loh iyang."

Mark sa soer bo, "Ila ngo ho soer bo yoangoiy?"

Pedro sa kassiya bo, "Yok, gel semal haatuw?" Iy Mark sa soer bo, "Yaeb te ngaeng samal haatuw " sa ppoeloh chog. Yor makla sa lulluwaley.

Pedro sa darngael Mark sala choaluwa dah uwoal. Sa kaengalu bo, "Hare semal be kaengalug seew kamammal, iwe ngo gel hosa chichii, aey, malbo remtale ye feffoeru seew foarmel le ibe mammal iyang. Hare malbo ye lulluwalley seew foarmel le ibe ma iyang."

"Ila faal le ir Willy mo Joseph re taay ma dabegiich iyang?" Yalool iy Mark. Pedro sa kaengalu bo, "Ngoa, iwe ngo hare be ila sangamw ngaeliyey chog ila ngo taayor saral le ibe chil ma dabooh."

Iy Mark sa mwaroro diy wulpiy sa lulluwal. Malbo siurel Pedro mweka ye sossoer. Ila ye mwomwaay le iy be wilgiy mwo wegdegey. Sa tagul ngal Pedro sa kaengalu bo, "Ngaeng iy taay ssong bo isa gula bo yaach kamammal chog iy melwe."

Iwe ngo healwe Pedro sa kaengalu bo, "Aey kamahoiy, sible ma kaokomw fadal chog seew."

Re sa chiufangal healkowe re sa biidiy letted re sa la diudiu. Re la kalladah re sa wiriir ir tarmwaal kowe toet. Iy Mark sa ttawul dah ireer. Sa soer bo, "Harodoh sibe rool diudiu," le sa rray chog.

Yoroor We
Mele Ye
Chapiy

Semal yiloolap ye mel irel mala imwal. Ye yalguw fadal lal iy melwe imwal yee la riugiu wolfaes seenis. Sa soer bo, "Medae mele iy be foeriu ngael salpiy kae? Iy ble loh iy blae chiuwaeyi semal paabiy bo layi." Sa loh sala chiuwaeyi iy paabiy we loal. Re lolloh mo iy paabiy we yee re la buudoh irel seew yoroor. Taay mwechal iy paabiy we bo be lohoyiu iy yoroor we bo be loh mo reawe serea.

Sa loh iy yoloolap we sala chiungiu semal pes. Sa kkaengalu pes we bo, "Pes! Pes! Buudoh giusiu paabiy le bo ye temwchal be lohoyiu yoroor le." Pes we temwchal.

Sa loh sala wiri setab tabol irea. Sa soer bo, "Irea! Irea! Buudoh wwoadiu pes le bo ye temwchal be giusiu paabiy le ye temwchal lohoyiu yoroor le." Irea we ye temwchal.

Sa wa loh sala wiri seew yaef. Sa kkaengalu iy yaef we bo, "Yaef! Yaef! Buudoh fisgi irea le bo ye temwchal wwoadiu pes le ye temwchal giusiu paabiy le ye temwchal lohoyiu yoroor le." Iy yaef we ye wa temwchal chog.

Sa loah sala wiri seew chaael. Sa kkaengalu iy chaael we bo, "Chaael! Chaael!" Buudoh gulu yaef le bo ye temwchal fisgi irea le ye temwchal wwoadu pes le ye temwchal gusu paabiy le ye temwchal loahoayu yoroor le." Iy chaael we ye wa temwchal chog.

Sa loh sala chiungiu semal karbow. Sa kkaengal iy karbow we bo, "Karbow! Karbow! Buudoh yiulmi chael le bo ye temwchal giuliuloh yaef le ye temwchal fisgi irea le ye temwchal wwoadiu pew le ye temwchal giusiu paabiy le ye temwchal lohoyiu yoroor le." Karbow we ye wa temwchal chog.

Sa loh sala wiri semal choal liliil mael. Sa soer bo, "Choal liliil mael lae! Choal liliil mael lae! Buudoh llimeseloh karbow le bo ye temwchal yiulmi chael le ye temwchal giuliu yaef le ye temwchal fisgi irea le ye temwchal wwoadiu pes le ye temwchal giusiu paabiy le ye temwchal lohoyiu yoroor le." Ye wa temwchal iy choal liliil mael we.

Sa loah sala wiri seew taael. Sa kkaengalu iy tael we bo, "Taael!" Taael!" Buudoh llugu loah mele yuyel chooal liliil mael le bo ye temwchal lliy karbow le ye temwchal yulmi chael le ye temwchal gulu yaef le ye temwchal fisgi irea le ye temwchal wwoadu pes le ye temwchal gusu paabiy le ye temwchal loahoayu yoroor le." Ye wa temwchal chog iy tael we.

Sa loh sala wiri semal gech. Sa kkaengalu iy gech we bo, "Gech! Gech! Ngacholoh tael le bo ye temwchal hoahoyiu mele iuyel choal liliil mael le ye temwchal lliy karbow le ye temwchal yiulmi chael le ye temwchal giuliu yaef le ye temwchal fisgi irea le ye temwchal wwoadiu pes le ye temwchal giusiu paabiy le ye temwchal lohoyiu yoroor le." Ye wa temwchal chog iy gech we.

Sa loh sala wiri semal haatuw. Sa kkaengal iy haatuw we bo, "Haatuw! Haatuw! Ddabey gech le bo ye temwchal ngocho tael le ye temwchal hoahoyiu mele iuyel choal liliil mael le ye temwchal lliy karbow le ye temwchal yiulmi chael le ye temwchal giuliu yaef le ye temwchal fisgi irea le ye temwchal wwoadiu pes le ye temwchal giusiu paabiy le ye temwchal lohoyiu yoroor le." Iwe ngo haatuw we sa kkaengalu bo, "Hare ho bla hasidoh seew tohoah irel meelik mo irel karbow laay bo lemey ilae ngo iy be ddabey gech lae." Iwe iy yiloolap we sa loh irel karbow we.

Haatuw we ye yiulmiloh chog meelik we ngo sa chapi yaal ddabey gech we. Gech we sa chapi yaal ngarsi tael we ngo tael we sa chapi yaal fargiu melwe iuyel choal liliil mael we. Choal liliil mael we sa chapi yaal lliy karbow we. Karbow we sa chapi yaal yiulmi chael we. Chael we sa chapi yaal giuliu yaef we. Yaef we sa chapi yaal fisgi irea we ngo irea we sa chapi yaal wwoadiu pes we. Pes we sa chapi yaal giusiu paabiy we. Iwe ngo paabiy we sa chapi yaal liutliutloh rael yoroor we rea we serea. Re sa chiufangal mo iy yiloolap we re sa loh irel melwe imwal re sala mel iyang. Iwe, sa si.